حوار: نورهان مجدي الغنام
لميس أمين فنانة شابة إحدى عضوات فرقة أيامنا الحلوة، دخلت الفرقة منذ أن كان عمرها 18 سنة وتواجدت في الفرقة منذ عامين.
تدرس لميس حاليًا في كلية الآداب بجامعة القاهرة، وهي تبلغ من العمر 20 عامًا، ولدت في محافظة القاهرة.
وظهرت فرقة “أيامنا الحلوة” يوم الإثنين الماضي في برنامج “صاحبة السعادة”، التي تقدمه الإعلامية إسعاد يونس، وهذه ليست المرة الأولى التي تظهر فيها الفرقة برفقة إسعاد يونس بل ظهروا أكثر من مرة وقدموا عددًا من الأغاني الشهيرة.
وتم تأسيس فرقة “أيامنا الحلوة” عن طريق المايسترو محمد عثمان في عام 2003 وتضم حوالي 20 مطرب ومطربة، وقامت مجلة هافن بإجراء حوار خاص مع المطربة الشابة لميس أمين، إليكم نص الحوار…
حدثنيا عن أول يوم غناء ليكي؟
غنيت وأنا عندي 6 سنين كانت أول مرة أغني فيها على مسرح كان مسرح المدرسة، كنت دائمًا في الحفلات في المدرسة أنا اللي ببقى متصدره كانوا مسميني أم كلثوم المدرسة.
وأول مرة أغني على مسرح كان في “متحف أم كلثوم” كان عندي 11 سنة، غنيت “الأولة في الغرام” مع المايسترو “محمد عبد الستار”، وبعد كده دخلت سنة في المعهد ودرست فيه وكنت في فريق المعهد، وحاليًا أنا في فرقة “أيامنا الحلوة”.
دخلتي فرقة “أيامنا الحلوة” امتى؟
دخلت من حوال سنتين شاركت فيها عن طريق المايسترو طبعًا، أنا عارفة الفرقة من زمان جدًا عن طريق برنامج “صاحبة السعادة” شوفتهم ودؤ كانت أول مرة، وبعد كدا المايسترو “محمد” عرفني عن طريق “الفيسبوك” سمع صوتي لإني كنت بنزل فديوهات على الصفحة بتاعتي والمايسترو عرفني وتواصل معايا، وكان بينا تواصل كتير لحد أول لقاء بيني وبين المايسترو مباشرة، كان في فرقة “بنات مصر” وبعد كده دخلت معاه في فرقة “أيامنا الحلوة”.
ماهي خطتكم في الفرقة؟
الخطة دي بتاعت المايسترو، لكن أنا كعضوة في الفريق أنا وزمايلي طموحنا الأكبر هو أن الناس تفضل حبانا، وأننا نفضل مصدر سعادة وبهجة للناس، ودا الحمدلله بالفعل بيحصل.
ماهي شروط الإنضمام لفرقة “أيامنا الحلوة”؟
المايسترو “محمد عثمان” ليه معاير خاصة أولية رؤية خاصة للي حابب يدخل الفرقة، عشان يكون مناسب للفرقة، وخاصة عشان هي فرقة كبيرة.
كلميني عن كواليس تواجدكم مع “إسعاد يونس“؟
هو ما خلف الكاميرا بيبقى شاق ومتعب جدًا بس في نفس الوقت متعب بالطريقة الممتعة، كنا مبسوطين جدًا بالي إحنا بنعمله وكانت الإعلامية إسعاد يونس مبسوطة بينا أوي، مدام إسعاد هي مشجعة جدًا وطبعًا فريق العمل كان تحفة لأبعد الحدود، وناس ذوق، أنا كشخص جديد أول مرة يطلع في برنامج زي دا محستش بالإحراج أو الكسوف نهائي حسيت إني وسط أهلي من أول فريق العمل لحد الفرقة طبعًا.
وفي أحداث كتير بتحصل من فريق العمل ومننا علشان الحلقة توصل للناس بالشكل اللي أنتوا شوفتوا.
التعامل مع إسعاد يونس كان إزاي؟
التعامل معها كان حاجة ممتعة جدًا، وهي في منتهي الذوق وهي Professional جدًا سواء ورا الكاميرا أو قدام الكاميرا، رغم إني حسيت بشوية خوف وتوتر لما أقعد قدامها لإنها تاريخ كبير أوي، بس هي كانت بتكسر الحتة دي عندي من ساعة ما أقعد، لأنها في الأسئلة كانت بتعرف إزاي تحتوي اللي قدامها وبتعرف تحسس اللي قدامها إحنا عادي بنتكلم عادي مش إننا في حوار.
إسعاد يونس صاحبة السعادة هي فعلًا اسم على مسمى، هي صاحبة السعادة وفعلا السعادة.
هل دي أول مرة تظهري في برامج؟
لا، أول ظهور ليا كان في برنامج “القاهرة اليوم” مع المايسترو محمد عبد الستار، وطلعت في صدى البلد في برنامج “in box”.
ماهي طموحاتك الفترة القادمة؟
النجاح على المستوى الفني والدراسي، نفسي أعمل حاجة توصل للناس وتكون حاجة بمعاير معينة حاجة تكون خارجة عن المألوف شوية تكون مختلفة ومميزة ومتكونش موجودة قبل كده.
نفسي أخد المزيكا لحتة تانية يعني حته تكون شبهي مش اللي هو واو لا يعني حاجة تكون شبهي وشبه صوتي وشخصيتي، زي أي فنان دلوقتي سواء عمرو دياب أو أنغام الناس الكبار دول خدوا المزيكا من حتتهم معملوش الحاجة اللي تمشي مع الناس على قد ماهما عملوا حاجة نفسهم فيها، وده يعتبر أكبر طموحاتي.
شايفة نفسك فين كمان خمس سنين؟
مخلصة جامعة أولًا، في حتة فنية كويسة عندي جمهور سواء بنيت الجمهور ده عن طريق السوشيال ميديا أو عن طريق إني أغني في حفلات كتير وبطلع على مسارح كتير.
آتمنى يكون عندي جمهور كبير وناس بتحبني وبتقدر الفن اللي أنا بحبه وأوصل صوتي وموهبتي للناس.
لما تتشهري هتسيبي الفرقة ولا لأ؟
موضوع الشهرة دا يا تصيب يا تخيب، بس أتمنى إن ربنا يكتبلي حاجة زي دي، بس إني أسيب الفرقة لا مأعتقدش أسيب “أيامنا الحلوة”، لأنها مش مجرد فرقة موسيقية لا هما عيلتي فعلًا، وبتحتوي أي حد بيدخل الفرقة يعني أنا في وقت قليل خدت عليهم لدرجة أنهم بقوا عيلة مش مجرد زمايل شغل بس.
مين الفنان اللي تتمني تغني معاه في حفلة؟
أتمنى أغني مع صابر الرباعي، لأن هو أغانيه صعبة جدًا ومحترف وموهبة جميلة جدًا بالإضافة كمان لأن مساحته الصوتية فظيعة.
ونفسي كمان أغني مع كاظم الساهر بحبه جدًا وبحب إحساسه وهو راقي جدًا في الأغاني بتاعته، وأغني كمان برفقة محمد عبده.
