استضافت الإعلامية لميس الحديدي الفنان القدير محسن محي الدين في حلقة خاصة من برنامج “كلمة أخيرة” المذاع عبر قناة ON التي تحدث من خلالها عن بداياته الفنية.
وقال محسن محي الدين: أخويا الكبير كان مهندس ديكور في برامج الأطفال في التلفزيون، وكنت أنا طفل شقي، كنت بكسر السراير، وشقي والدتي قالت له خده معاك يمكن يعمل حاجة.
وأضاف: يوسف شاهين أول ما شافني قالي بيقولوا عليك ممثل كويس، فقلت له: شكرًا يا عم، فانبسط من جرأتي، وعلاقتي بيه كانت قوية جدًا تقترب إلى الصداقة.
محسن محي الدين – كلمة أخيرة
وتابع محي الدين: كنت باخد مساحتي في كل الأعمال اللي قدمتها مع يوسف شاهين، بس أول خلاف حصل بينا كان في فيلم اليوم السادس، كان مكتفني وهنا انا رفضت.
واستكمل حديثه: كان عايز إني ألعب دور عوكل بطريقة قناوي، أنا شوفتها بطريقة مختلفة، وكنت عايز أقدم شخصية القرداتي بشكل تاني، وصل الحوار بينا إلى خلاف، فأنا مش عايز اكون نسخة منه، وده اللي خلاني محسش بالراحة، وفي اللحظة دي قلت له مش هكمل معاك واتصدم، ولكن أنا كنت أخدت القرار ومشيت.
وأشار إلى مساعدته ليوسف شاهين: كنت بساعد يوسف شاهين في كتابة السيناريو والإخراج في بعض الأحيان، ويوسف شاهين بيحب الرقص والمزيكا والتمثيل، وأنا كده، وكنت بفهمه بسرعة.
وعن ندمه بعد ترك يوسف شاهين، قال: لم أندم تمامًا، أنا برج العقرب يعني لما بحس بعدم راحة من حاجة بخلع عادي، ومش ندمان، وأنا كنت شغال قبلها أفلام مع كبار.
