كتبت: نورهان مجدي الغنام
أنوشكا موسى هي مطربة من ضمن فرقة بنات مصر التي يقودها المايسترو محمد عثمان، أنوشكا متزوجة من فنان مثلها أيضًا ومن أخر أعماله مسرحية “حلم جميل” بطولة الفنان سامح حسين.
لديها ابن وهو “سليم” ويبلغ من العمر 3 سنوات.
قام والدها بتسميتها هذا الاسم، منذ أن كانت في المرحلة الثانية الابتدائية، ألتحقت للدراسة بمعهد “الكونسرفاتوار” قسم بيانو، وكان شقيقها أيضًا معها في نفس المعهد ولكن قسم تشيلو.
التحقت بفرقه كورال الأطفال مع المايسترو سليم سحاب وكان في دار الأوبرا، بالإضافة أيضًا إلى دخولها إلى فرقة “أنغام الشباب” تحت سن ال18 عامًا، وبعد ذلك التحقت بمسابقة “يامزيكتي يانوكيا” في f.m مع أحمد موسى.
عندما وصلت إلى سن 18 دخلت مسابقة “سوبر ستار” والتي أقيمت في لبنان، وكانت تعتبر هي المصرية الوحيدة هناك، وحصلت على المركز التاسع على الوطن العربي، وعلى مدار حياتها استطاعت أن تكتب اسمها في عالم الغناء، وقامت مجلة هافن بعمل حوار مع أنوشكا موسي، وإليكم نص الحوار..
مين اللي اكتشف موهبة الغناء عندك؟
أختي كانت بتغني في “كورال” الجامعة زمان، وخدتني معاها بروفة وشالوني حطوني على المسرح غنيت حرمت أحبك ووقتها المايسترو محمد الهمشري وكان وقتها عمري 4 سنوات فقط، والمايسترو قالها أختك هتكون مطربة وفعلًا ماما وبابا خدوا بالهم إني بغني صح وبحفظ أغاني كتير قديمة وصعبة فقرروا أنهم ينموا موهبتي ودخلوني معهد “الكونسرفاتوار”، والحقيقة أن عيلتي وعيلة جوزي كمان مليانة مواهب.
دخلتي فرقة بنات مصر أمتى؟
مش من مدة طويلة دخلت من حوالى 3 أو 4 شهور.
إزاي شاركتي في فرقة بنات مصر؟
شوفت الإعلان بتاع الفرقة من سنتين، وبعت للمايسترو لكن سبحان الله كل حاجة بتيجي في وقتها لما ربنا بيريد، ولقيت صحبتي “أسماء دغمة” من فرقة أيامنا الحلوة بعتالي عايزة فيديو ليكي بتغني فيه بعتلها قالتلي أن المايسترو عايز يشوفني والحمدلله روحت عملت انترفيو واتقبلت، ودخلت فرقة بنات مصر.
ما هي خطتكم أو طموحات الفرقة في الأيام القادمة؟
بالنسبة للخطة المايسترو محمد عثمان هو اللي بيوجهنا، أما بالنسبة لطموحات الفرقة هو أكيد أننا نحقق نجاحات أكتر، ويبقى لينا جمهور كبير من كل أنحاء الوطن العربي، وبما أن أول ظهور لينا حقق النجاح ده فأنا متفائلة خير جدًا.
كلمينا عن الكواليس مع الجميلة إسعاد يونس؟
كنا مبسوطين جدا والكواليس جميلة جدًا وعمرها ما هتتنسي كنا كلنا واحد وأجواء كلها حب وضحك وتشجيع، والمعاملة راقية جدًا من كل التيم والبلاتوه مريح جدا، و إسعاد يونس إنسانة وفنانة جميلة وراقية وكانت مبسوطة بينا أوي ومن الحاجات اللي سابت جوايا ذكري حلوة اوي.
هل في شروط لدخول فرقة بنات مصر؟
أكيد طبعًا في شروط ومن ضمنها هي الصوت يكون حلو ومميز.
بعد نجاح الفرقة كلمينا عن طموحاتك؟
طموحاتى هي أن الفرقة تنتشر بشكل كويس وتحقق نجاحات وأرجع زي زمان وابتدي اتشاف واتسمع بشكل كويس، والإضافة كمان إني أقدم فن راقي يناسب الذوق الغالي وأكون عند حسن ظن المايسترو دايما.
شايفة نفسك فين كمان خمس سنوات؟
شايفة نفسي بعد خمس سنين إني من أشهر مطربين الوطن العربي أن شاء الله.
مين الفنان اللي تتمني تغني قصاده؟
أتمنى أغني مع شيرين عبد الوهاب جدًا، ومش غنى بس لا نفسي كمان أعمل ديو معاها.
