إستعاد الفنان تامر حسني ذكرياته مع منظم الحفلات أدهم بكري على حساباته الرسمية على السوشيال ميديا، حيث كان تامر حسني من أوائل الداعمين له في بداية حياته العملية والآن أصبح أدهم بكري من كبار منظمي الحفلات في مصر، وهو من قام بتنظيم حفله الأخير بفندق جولدن جويل بمدينة الإسكندرية، ومن خلال قصة نجاح أدهم بكري، وجه تامر حسني رسالة لجمهوره تحمل معنى كبير عن النجاح والمعافرة والصبر.
وكشف عن ذلك الفنان تامر حسني من خلال خاصية الـ “ستوري” على حسابه الرسمي على موقع تبادل الصور والڤيديوهات “إنستجرام” حيث نشر صورة مضى عليها أعوام عديدة تجمعه بـ أدهم بكري، وصورة أخرى من حفل الإسكندرية، وعلق قائلًا:”وهو صغير قالي أنا بحبك ونفسي أنجح زيك، شجعته وفضلت أدعمه لحد ما كبر والنهاردة أصبح أهم منظمين الحفلات الكبار في إسكندرية وهو صاحب حفلة إمبارح اللي اتصنفت أنجح وأكبر حفلة في تاريخ حفلات مصر، ده بقى حب إيجابي لفنان مش بس تحبه عشان أغانيه وأفلامه، لا المفروض المفروض تحبه وتتأثر بنجاحه وتنجح زيه في المجال اللي بتحلم بيه”.
وأكمل:”لو كل شبابنا اتأثروا بقصص نجاح مثلهم الأعلى هيعلوا وينجحوا زيه واللي مالوش مثل أعلى يشتريله مثل أعلى بجد الجملة دي مهمة أوي وألفتها من مشواري صدقوني لما بتحبوا حد أوي ممكن تنجحوا زيه وأكتر كمان بس مش بس نحب ونتأثر لازم نجتهد ونعافر ونصبر وكل واحد يتأكد إنه ليه لازمة كبيرة في الحياة والا مكنش ربنا خلقه”.
ليرد منظم الحفلات أدهم بكري على هذا الكلام ويقول: “أنا مهما قعدت أتكلم وأوصف أنت بالنسبالي أيه مش هوفيك حقك على كل حاجة بتعملها معايا أو اتعلمتها منك أنت فعلا زي ما أنا قولت وكان من قلبي أنت زرار النجاح اللي في عقل كل اللي بيحبوك ربنا يباركلك على كل اللي بتعمله مع الناس كلها مش أنا بس، أنت قدوتي وأنا هفضل دايمًا واحد من جمهورك وأخوك الصغير، شكرًا تامر حسني”.
وفي سياق متصل يذكر أن الفنان تامر حسني طرح أول أمس أغنية جديدة من ضمن أغاني فيلم “بحبك” وهى أغنية “حياتنا”، التي قاربت أن تصل مشاهداتها إلى المليون مشاهدة في يومين فقط.
وتقول كلمات الأغنية:
في حب يعجزك بدري
حب يموتك جواك
وإيد تتمد تمسكها
تغمي عينيك تقوم خانقاك
في وش يبان ملاك طيب
في ضهرك يتقلب أبليس
في حد بتشتريه غالي
وهو قصاد مرايته رخيص
وهو قصاد مرايته رخيص
حياتنا عبارة عن أشخاص
ما بين غاليين وحبة رخاص
في ناس بتزود الواحد
وناس عايشة بتاخد وخلاص
ما بين الصح والمفروض
بنتعود على المرفوض
في كام واحد في تعبك غاب
وكام واحد فضل موجود
