تصدرت الفنانة زينة تريند جوجل بعد استضافتها في برنامج “الحكاية” الذي يقدمه الإعلامي عمرو أديب عبر قناة MBC مصر، وأزاحت الستار عن العديد من أسرارها العملية والشخصية.
5 سنوات بدون عمل بسبب شخص ما
أكدت الفنانة زينة أن نجاح مسلسل الليلة واللي فيها هو سبب بقائها في الوسط الفني قائلة: “ميهمنيش اشتغل كتير، اللي يهمني اشتغل حلو، ولكن في الوسط الفنى يمكن التضييق على فنان أو فنانة ولا يتم الاستعانة به أو بها”.
وأضافت: “فضلت 5 سنين بدون عمل بسبب تضييق شخص ما، متفهمش فيه إيه، لافتة إلى أنها دائمًا ما تسمع شائعات عن نفسها لا تصدق مثل أنها تتأخر في المواعيد”.
شخصية رشا تعبتني نفسيًا
قالت الفنانة زينة إنها تعرضت لضغوط نفسية ومتاعب صحية أثناء تجسيدها شخصية “رشا” قائلة: “من أول ما قريت المسلسل وانا مخضوضه جدًا، ومش عارفة هيعملوه ازاي، لأن الكتابة كانت قاسية، والموضوع جريء جدًا بطريقة مش متعودة عليها، لكن معمول بشكل هايل”.
وتابعت: “الموضوع كان صعب لدرجة إنه أثر على ضربات قلبي أثناء التصوير، وكنت بقول للمخرج هاني خليفة إني تعبانة ومش قادرة أكمل، لكن كان بيصمم إننا نعيد”.
مسلسل الليلة واللي فيها كان طوق نجاة
كشفت الفنانة زينة عن مسلسل “الليلة واللي فيها” كان طوق نجاة ليا وأضافت: “كنت حاسة إن في سكاكين محطوطة على رقبتي بالعمل ده، يا إما أندبح بيها يا إما ربنا ينقذني من الشر اللي حواليا وينصرني، والحمد لله ربنا مافرحش حد فيا”.
وتابعت: “لما جالي المسلسل مسكت فيه بإيديا وسناني، لإنه كان طوق نجاة، يا إما أكمل في التمثيل يا إما أشوف شغلانة تانية، ومكانش في حاجة تقدر تنقذني غير إنه يكسر الدنيا”.
بحتقر كل اللي بيقول الست متقدرش تعيش من غير راجل
أعربت الفنانة زينة عن استيائها لـ مقولة “الست متقدرش تعيش من غير راجل”، قائلة: “بكره الجملة دي وبعدت عن إحدى صديقاتي بسببها، لأنها تزوجت بعد طلاقها بفترة قصيرة، وعندما سألتها عن السبب كانت اجابتها مقدرش أعيش من غير راجل”.
وأضافت: “أنا أحتقر كل من يقول هذه الكلمة، اخدمي نفسك، إحنا بني آدمين نقدر نشتغل وننتج، محدش يتحكم فينا و تقدري تفكري انتي عايزة إيه، الحمد لله الواحد بصحته، ويقدر يخدم نفسه ويساعد ولاده”.
أنا مرة نمت على سماعة في فرح.. زينة تكشف رد فعلها عند شعورها بالحزن
كشفت زينة، عن رد فعلها، عند شعورها بالحزن، وهو أنها تخلد إلى النوم، قائلةً: أنا مرة نمت على سماعة في فرح، رحت ساندة عليها نايمة، مش عارفة إيه اللي ضايقني في الفرح.
غبت العام الماضي لانشغالي بتصوير الليلة واللي فيهاوأوضحت زينة أنها غابت العام الماضي عن الدراما بسبب انشغالها بتصوير مسلسل الليلة واللي فيها، وأنها اتفقت على مسلسل لرمضان القادم، لكن لم يتم التعاقد حتى الآن.
“احنا زملكاوية بالوراثة”.. زينة تكشف انتماءها الكروي Id
وكشفت زينة عن انتمائها الكروي في نهاية الحلقة، وذلك بعد أن سألها أديب عن ذلك، قائلًا لها: سؤالي الأخير، أخبار الأهلي والزمالك معاكي إيه؟.
لتسأله زينة: هو الماتش النهاردة، حصل إيه؟، قاصدةً مباراة الزمالك و إليكت التشادي بإياب دور الـ64 من دوري أبطال أفريقيا.
ليجيبها أديب: كسبنا، لتسأله زينة: كسبنا كام/كام؟، فقال لها: كسبنا 2/صفر، لترد عليه، متسائلةً: طب هو مين اللي كسبنا، إنت عارف إني زملكاوية؟.
فقال أديب: زملكاوية طبعًا، هو انا هدخل الأستوديو حد مش زملكاوي؟، قاعد أقولك حلوة والمسلسل حلو، معقولة يعني هتكوني أهلاوية؟، كسبنا طبعًا زيزو.
وعلقت زينة: ابني بيحبه أوي، ليرد أديب: وإنتِ أكيد بتحبي زيزو، لتجيب زينة: كلنا بنحب زيزو هو وشيكابالا.
ووجه أديب سؤالًا لها: بتحسي بالماتشات، زي ما انا بحس بيها كده، لترد زينة: بص انا كنت نسيت موضوع الماتشات ده، بعد وفاة بابا الله يرحمه، احنا زملكاوية بالوراثة، و احنا زملكاوية أوي.
وأردفت: زمان لما كان الزمالك بيكسب، كان بياخد صناديق الحاجة السابعة ويفرق على الناس، فأنا واخواتي كلنا زملكاوية، بس مامتي أهلاوية، ولادي أنا حاولت أخليهم أهلاوية، ليسألها أديب: ليه؟، لتجيب زينة عشان مايحصلش فيهم اللي حصل فينا.
وأكمل أديب: هو إيه اللي حصل فينا، ما إحنا زي الفل، سنتين ورا بعض، لتستدرك زينة: بس قبل كده، ليقول لها: لما تصحي ابنك من النوم، قوليله كل اللي قلتهلك عن الأهلي غلط، لتعلق: لا ما خلاص إخواتي خيلانهم محوا الموضوع تمامًا من دماغهم.
وأضافت: ولادي حياتهم الكورة وبيحبوا محمد صلاح، ليسألها: يعني الولاد رجعوا للطريق الصحيح وبقوا زملكاوية تاني؟، لترد: الحمد لله آه، بس بيشجعوا ليفربول عشان صلاح، ليعلق: كلنا بنشجع ليفربول عشات محمد صلاح، بس احنا زملكاوية يا زينة، لتمازحه: إحنا ليفربول، ليرد: ماشي.
يذكر أن آخر أعمال زينة مسلسل الليلة واللي فيها، والذي عرض عبر منصة شاهد vip، ولاقى نجاحًا كبيرًا.
والجدير بالذكر أن المسلسل من بطولة زينة، أبو يوسف، محمد شاهين، سماح أنور، آلاء سنان وغيرهم، ومن إخراج هاني خليفة.
