فن

نجل السيناريست مصطفى محرم يتقدم بشكوى لنقابة السينمائيين ضد المخرج جمال عبد الحميد بسبب ريا وسكينة

أثارت تصريحات المخرج جمال عبد الحميد حول مسلسل ريا وسكينة ببرنامج معكم مع الإعلامية منى الشاذلي، والمذاع عبر قناة cbc، استياء السيناريست دكتور حسين مصطفى محرم، نجل السيناريست الراحل مصطفى محرم.

ونشر محرم مقطع فيديو، عبر حسابه الشخصي بموقع التواصل الاجتماعي الفيسبوك، رد فيها على تصريحات عبد الحميد ونفى تمامًا ما قاله بالبرنامج، وأنه لو أراد أن يصنع تريند أو يلفت الأنظار إليه، لا يكون ذلك على حساب والده الراحل.

السيناريست الراحل مصطفي محرم

وقال محرم في الفيديو: “مساء الخير طبعًا أنا عمري مابطلع أعمل فيديوهات ولا برد على حد، حتى لو حد انتقد أعمالي أو أي حاجة، سواء مسلسلات أو أغاني، وبسيب إن شغلي هو اللي يرد دايمًا”.

واستدرك: “لكن الحقيقة النهاردة أنا طالع أرد، لأن الموضوع مايخصنيش يخص والدي، والدي ده السيناريست الكبير مصطفى محرم، السيناريست اللي عمل أكتر من 100 فيلم”.

وأردف: “السيناريست اللي أهم 10 أفلام في القرن في له منهم تلاتة أفلام بتوعه، السيناريست اللي كتب لن أعيش في جلباب أبي والحاج متولي، أعتقد إن هما يمكن أكتر مسلسلين نجحوا في تاريخ الدراما المصرية”.

وتابع: “ولغاية دلوقتي بيعرضوا ولغاية دلوقتي هما تريند، فهو مش محتاج دفاع لكن أنا إمبارح فوجئت بفيديو، طبعًا أنا بلوم في الأول على قناة cbc، وبلوم الإعلامية الكبيرة منى الشاذلي إنها سمحت بإن ده يحصل وإنه يتقال ومردتش”.

واستكمل: “أنا بطالب الـcbc بحق الرد، قناة محترمة ومذيعة محترمة وبطالب منهم حق الرد، لأني اتصدمت إن ماكنش فيه أي رد فعل على اللي حصل”، موضحًا: “اتفاجئت إن المخرج جمال عبد الحميد طالع بقول إنه لما جاله مسلسل ريا وسكينة، كتابة مصطفى محرم، رفض النص ومكنش عاجبه وطالع بيضحك”.

وأردف: “وبيقول إنه قعد مع الأستاذ صلاح عيسى، رحمة الله عليه، وكتب المسلسل من الأول للآخر، وقال حاجة غريبة أوي إن في الكتاب فيه في الآخر الحوار بتاع ريا وسكينة إنه هو ده حوار المسلسل”.

وواصل، متعجبًا: “مش قادر لغاية دلوقتي إزاي يحط حوار بتاع تحقيقات يبقى هو حوار مسلسل 40 حلقة بالمشاهد، ما علينا المهم إنه قال إنه هو اللي كتب المسلسل بالكامل، وده طبعًا عاري تمامًا من الصحة، مفيش أي حاجة زي كده حصلت”.

متابعًا: “وأنا كلمت طبعًا المنتج الكبير جمال العدل وحكيت له اللي اتقال، والراجل اتصدم وماصدقش لدرجة إني بعت له الفيديو، فاستغرب جدًا طبعًا واتضايق جدًا من الكلام، لأنه كلام عاري تمامًا من الصحة”.

مردفًا: “أستاذ جمال عبد الحميد لو حضرتك عايز تعمل تريند أو عايز تلفت النظر ليك أو أي حاجة مايبقاش على حساب سيناريست كبير أوي، زي السيناريست الكبير مصطفى محرم والدي”.

ولفت: “ولو كنت فاكر إنه عشان توفاه الله مش هتلاقي حد يرد لا، فهتلاقي حد يرد ومش أنا بس هتلاقي مصر كلها بترد عليك، لأن مصر كلها بتحب لن أعيش في جلباب أبي، الحاج متولي، هتلاقي مصر كلها بترد عليك”.

وتساءل: “بسأل حضرتك سؤال مهم، المسلسل ده إنتاج سنة 2005 يعني بقاله 17 سنة، حضرتك ليه مقولتش الكلام ده من 17 سنة، ليه طالع تقوله دلوقتي، إشمعنى دلوقتي؟”.

مواصلًا: “ولا هو عشان والدي اتوفي السنة اللي فاتت، وإنت أول لقاء تعمله السنة دي، فقلت بقا خلاص محدش هيعرف حاجة وماحدش هيعلق، فإيه أرميها وأقول إني مؤلف مسلسل ريا وسكينة”.

ونوه: “مع احترامي لحضرتك أنا مشوفتش إن حضرتك عملت مسلسل من تأليفك ناجح، ومشوفتش غير إن حضرتك عملت مسلسل تقريبًا لمحمد سعد وتقريبًا حضرتك سبته، كان تأليفك تقريبًا ومحمد سعد مرضيش يكمل المسلسل”.

مضيفًا: “أنا مش عاوز أخش في تفاصيل أنا مليش علاقة بيها، بس ده اللي أنا بسمعه بس مقدرش أؤكد حاجة أو أجزم، مش عاوز أغلط نفس الغلطة اللي حضرتك غلطتها، أنا ماليش علاقة بس مش شايف إن حضرتك عملت مسلسلات ناجحة من ناحية الكتابة”.

مكملًا: “ممكن تكون عملت مسلسلات ناجحة من ناحية الإخراج طبعًا، لكن ماشفتش مسلسلات ناجحة من ناحية الكتابة، فأنا الحقيقة تقدمت بشكوى لنقابة المهن السينمائية وللنقيب الأستاذ مسعد فودة، علشان يحقق في الكلام ده”.

وأشار: “لأن طبعًا أنا عمري ما هسيب حق والدي مهما حصل، وأنا آسف إني بعمل فيديو زي كده، مكنتش أتخيل أبدًا إني ممكن أعمل فيديو زي كده، إن الناس بقت تفتكر إن عشان حد مات نقدر إننا نجور على حقوقه، لا الكلام ده غلط، إحنا عمرنا ما نجور على حقوق حد ولا نقبل إن حد يجور على حقوقنا”.

وأتم محرم: “معلش طولت عليكم بس كان لازم أرد رد صوت وصورة، لأن الموضوع بصراحة ماكنش يتسكت عليه أبدًا، وطبعًا طريقة التهكم والضحك اللي حصلت في الفيديو دي من الأستاذ جمال عبد الحميد مرفوضة تمامًا بصراحة”.

يشار إلى أن المخرج جمال عبد الحميد كان قد حل ضيفًا على الإعلامية منى الشاذلي بحلقة الجمعة الماضية من برنامج معكم عبر قناة cbc، وتحدث خلال الحلقة عن كواليس أعماله وبينها أرابيسك وريا وسكينة.وكان حديثه عن ريا وسكينة هو سبب الأزمة، التي نشر على إثرها السيناريست دكتور حسين مصطفى محرم هذا الفيديو، للرد على ما قاله عبد الحميد في البرنامج حول كتابته لمسلسل ريا وسكينة.

علمًا بأن ريا وسكينة من بطولة عبلة كامل، سمية الخشاب، سامي العدل، رياض الخولي، صلاح عبد الله، أحمد ماهر وغيرهم، وهو عن كتاب رجال ريا وسكينة لصلاح عيسى، سيناريو وحوار مصطفى محرم، إخراج جمال عبد الحميد وإنتاج العدل جروب جمال العدل.

وتم تكريم المخرج جمال عبد الحميد من مهرجان القاهرة للدراما العربية في دورته الأولى، برئاسة عملاق الدراما العربية دكتور يحيى الفخراني، الرئيس التنفيذي للمهرجان، تقديرًا لمسيرته الفنية الحافلة في الإخراج التليفزيونية.

يذكر أن هذه الأزمة ليست الفنية الأولى خلال هذه الفترة، حيث نشبت أزمة مؤخرًا بين الفنان فكري صادق والمونتيرة هند سعيد صالح، ابنة الفنان الكوميدي الراحل سعيد صالح، بسبب ما قاله عن والدها ببرنامج كلمة أخيرة مع الإعلامية لميس الحديدي أنه فنان عادي.

اطلب برنامج ويبو للمدارس والجامعات اطلب برنامج ويبو للمدارس والجامعات
error: Content is protected !!