احمد منيب بدء الموسيقى فى سن السابعه وتعمق فى الفن بشكل محترف اشتغل وحقق حلمه فى اوروبا بدء من الصفر ونجح فى مجال الموسيقى واشتغل على نفسه خلص دراسه اربع سنين دراسات عليا فى الكونسرفتوار…
ازاى اتعلمت الكمانجة ؟
أنا بدأت أتعلم كمانجة بشكل محترف من و أنا عندي 7 سنين .. أنا أصلا من عيلة فنية و دي أكتر حاجة أنا بعتبر نفسي محظوظ فيها لأن لولا كده ما كانوش خدوا بالهم من موهبتي و خلوني أبتدي دراسة في كونسرفتوار القاهرة .. والدي د.نبيل منيب أستاذ بالمعهد العالي للفنون المسرحية .. مخرج مسرحي معلم أجيال وناس كتير من المشاهير حاليا درسوا على ايده .. والدتي خريجة كلية تربية موسيقية و هي اللي كانت بتجهزني لاختبارات القبول للكونسرفتوار في طفولتي و عمتي أستاذ البيانو بالكونسرفتوار و كانت عميدة المعهد في التمانينات
….
كلمنا عن الكونسرفتوار ؟
الكونسرفتوار باختصار هو معهد عالي لتعليم الموسيقى و شئ عظيم موجود في مصر و مش ناس كتير تعرف عنه .. الواحد بيدرس فيه المواد الدراسية العادية بتاعت وزارة التربية و التعليم و بعد الظهر بندرس المواد الموسيقية .. وبنستمر كده لحد ما بناخد الثانوية العامة و الثانوية الموسيقية .. طبعا مش كل الناس بتكمل للمرحلة دي .. لأن الواحد لازم يكون موهوب و بيتدرب تدريب شديد جدا عشان بندرس برامج كلاسيكية صعبة جدا من باخ لموتسارت لبيتهوفن لتشايكوفسكي .. وبعد مرحلة الثانوية الواحد بيقرر لو عاوز يكمل الكارير بتاعه في الموسيقى أو يقدم كأي طالب خلص ثانوية عامة في جامعات تانية
..
المزيكا بتعنى لك ايه ؟
بالنسبة لي كان الطريق واضح جدا .. الموسيقى هتكون كل حياتي وهي الحاجة الوحيدة اللي بلاقي نفسي فعلا و أنا بعملها .. فكملت 4 سنين دراسة عليا في الكونسرفتوار و اتخرجت بتقدير امتياز منه و بعدها اشتغلت لمدة 3 سنين في أوركسترا القاهرة السيمفوني ودخلت الجيش قبل ما أقرر اني حابب أتعلم اكتر و أسافر أوروبا عشان أعمل ماستر في الموسيقى و الحمدلله اتقبلت بعد اختبارات صعبة جدا في جامعة ميونخ للموسيقى و هي من أهم وأصعب الجامعات الموسيقية في الدراسة وسافرت للدراسة لوحدي ومن غير أي جهة بتدعمني أو أي منحة أو مساعدة من حد ..
هل قابلت صعوبات فى طريقك وازاى عديتها ؟
كان عندي عربية و بعتها و بعت أي حاجة أقدر أبيعها و سافرت طبعا الفلوس خلصت في أول 7 شهور و ما كانش فيه أي فرص شغل و خصوصا اني كنت مصمم ما أشتغلش في أي شغل غير مجالي عشان ما أضيعش وقتي وجهدي في حاجة مش هتفيد فقررت اني اخد الكمانجة و انزل الشارع و اعزف للناس والموضوع مشي معايا بشكل أنا ما كنتش متوقعه و بقت الناس تحط فلوس كتير والمزيكا اللي بعزفها فعلا بتأثر فيهم و بيسألوني لو بعمل حفلات أو ليا سيديهات ببيعها و كان ساعتها ده مش متوفر للأسف .. الموضوع كمان كان صعب جدا لأني كنت بضطر كتير أعزف في درجات حرارة توصل لسالب 7 و ممكن الدنيا تكون بتمطر تلج عليا و ده فيه مخاطرة كبيرة على كمانجتي لأنها ممكن تبوظ بسهولة بس ما كانش ادامي حل تاني عشان أعرف اكمل
..
ممكن نعرف موسيقى الجاز اضفت لك ايه ؟
هو انا خلصت ماستر في الموسيقى الكلاسيكية و قررت كمان أعمل ماستر تاني في موسيقى الجاز في نفس الجامعة لأني مهتم جدا التأليف الموسيقي و موسيقى الجاز بتضيف كتير لأي حد عاوز يألف مزيكا .. وفعلا خلصت الماستر في شهر نوفمبر اللي فات وخلال فترة دراستي اشتغلت لمدة سنة في أوركسترا ألماني اسمه رويتلنجن الفيلهارموني في نفس الوقت كونت في مصر في وقت أجازاتي مع عازف البيانو محمد فؤاد فريق حاليا معروف بشكل كبير في مصر .. فؤاد و منيب .. الفكرة قايمة على موسيقى الكمان و البيانو و بنقدم مؤلفاتنا الخاصة وعملنا حفلات كتير جدا في أماكن مهمة زي أوبرا القاهرة و أوبرا الاسكندرية و مكتبة الاسكندرية واتعرفنا في وقت قليل جدا من 2015 لحد دلوقتي
..
هل لديكم جمهور ؟
معظم حفلاتنا بتكون شبه كاملة العدد و جمهورنا معظمه من الشباب رغم إن نوع موسيقتنا مش من النوع الدارج و كمان الناس في مصر مش متعودة أوي تسمع موسيقى بس من غير غنا والوحيد اللي كسر القاعدة دي هو الفنان الكبير عمر خيرت و اللي بنعتبره قدوة لينا في حاجة زي كده و بنتمنى ان احنا نكمل على نفس خطاه و موسيقانا تجذب عدد أكبر من الناس في مصر و برة مصر وفعلا عملنا الفترة اللي فاتت حفلتين برة مصر واحدة في فيينا وواحدة في المغرب و الجمهور تفاعل معانا بشكل كبير جدا وحاليا بنخطط اننا نقدم موسيقانا بتوزيع لأوركسترا كبير يصاحب موسيقانا على الكمان و البيانو على غرار الفنانين الكبار
..
مين مثلك الاعلى ؟
اكيد الفنان عمر خيرت دايما كان حلم عندي من صغري إن العازف الموسيقي يتحول لنجم مستقل الناس تعرفه و بتسمع مزيكته من غير ما يكون شرط إن الموسيقى تكون أغنية ليها كلمات و مغني .. أحيانا الموسيقى المجردة بتعبر أكتر بكتير من الكلمات .. وهي دي كانت رؤيتي اللي بشتغل و مكمل بيها .. كمان حاليا كونت فريق موسيقي في ألمانيا بقدم من خلاله مؤلفاتي واللي هي عبارة عن خليط من موسيقى الجاز و الموسيقى العربية و أول حفلة لينا هتكون يوم 7 يناير الحالى في ميونخ وعندي أمل كبير إن النوع ده من الموسيقى يلاقي نجاح كبير في أوروبا
ايه اخر جولاتك الفنيه ؟
حاليا أنا في جولة حفلات بين مدن ألمانيا و سويسرا و النمسا بعزف كصوليست و قائد مجموعة الوتريات بالأوركسترا البافاري الفيلهارموني مع المغني الألماني المشهور قنسطنطين ڤيكر و في نفس الوقت بعيد مؤلفاتي و مؤلفات فؤاد عازف البيانو عشان هننفذها بمصاحبة الأوركسترا في فبراير٢٠٢٠.
اشتغلت حاجه مؤثره مع الباند بتاعك ؟
بالنسبة للباند الألماني بتاعي فاحنا عملنا أكتر من حفلة السنة دي في برلين و ميونخ و من ضمنها حفلة مهمة جدا في حفل توزيع جوايز السلام للفيلم الألماني بمسرح كوڤيلييه بميونخ و اللي اتطلب مني تأليف مقطوعة مخصوص ليه و ألفت مقطوعة بعنوان روزيتا أو حجر رشيد. وكمان سجلت مع الباند أول ألبوم بمؤلفاتي و هيتم نشره قريب.
هل لطموحك حدود ؟
بالعكس .. انا عايز موسيقتي توصل للعالمية و أكون كل يوم بعزف مؤلفاتي في بلد مختلفة مثلي الأعلى في الموسيقى في مصر عمر خيرت لأن الوحيد تقريبا اللي عرف يعمل إقبال رهيب للمصريين إنهم يحضروا حفلة موسيقية مفيهاش غنا عكس ما الناس متعودة في مصر مثلي الأعلى في النجاح هو محمد صلاح اللي يعتبر سفير لمصر في العالم كله و خلى ناس كتير تحب مصر وتهتم تعرف عنها أكتر و أنا حاطه أدامي مثال للي أنا عاوز أحققه في مجالي.. إني أكون سفير لبلدي في العالم بموسيقتي و نجاحي..
اخبار العائد المادى من الموسيقى ايه ؟
لحد دلوقتي مفيش مكسب مادي حقيقي من الفن بالعكس بيكون فيه صعوبات مادية لأني باخد قرارات للموسيقى بتكون عكس القرارات اللي المفروض أخدها عشان أعمل فلوس ومن ضمنها وجودي في ألمانيا لأن في مصر ممكن أعمل فلوس أكتر بكتير من اللي بعملها في ألمانيا لأن المعيشة هنا مكلفة جدا
ايه عوامل النجاح بالنسبه لك؟
الحافز للنجاح بالنسبة لي إني شايف نفسي سفير لبلدي باللي بعمله زي ما كمان أي دكتور أو مهندس أو عالم مصري أو أي حد ناجح في مجاله بيكون واجهة مشرفة لبلده وبيحسن انطباعات العالم عننا وخصوصا مع الإعلام العالمي الموجه لتشويه صورة الشرق الأوسط بشكل عام
