في مداخلة هاتفية لبرنامج آخر النهار الذي يقدم الإعلامي محمد الباز عبر قناة النهار تحدث الكاتب محمد توفيق عن تفاصيل أزمته مع أسرة الراحل أحمد زكي وإتهامه بالإساءة له ولأسرته في كتابه أحمد زكي ٨٦.
بدأ محمد الباز حديثه عن الكاتب محمد توفيق وأزمته مع عائلة الفنان الراحل أحمد زكي من خلال برنامجه الذي يقدمه على قناة النهار.
حيث بدأ قائلًا: طب في مشكلة، امبارح الحقيقة بعض المواقع تداولت خبر يتعلق بصديقنا وزميلنا العزيز الكاتب محمد توفيق.
أصدر محمد توفيق كتاب مهم عن الفنان الكبير أحمد زكي اللي هو “أحمد زكي 86” والكتاب الحقيقة كتابة راقية يعني على عادة محمد توفيق أنه بيتعب على الشغل بتاعه وبيقدملنا حاجة مختلفة، لكن إحنا فوجئنا إن في بعض الأخبار اللي بتقول أنه أسرة أحمد زكي بتتهتم محمد توفيق بإنه أساء إلى الراحل الكبير أحمد زكي في كتابه.
وتابع الباز: أنا مش هبقى منحاز لأنه انا قريت الكتاب الحقيقة في وقتها وكنت شايف إنه في جِهد طيب جدًا قام بيه محمد توفيق لكن حكاية الإساءة إنه كيف أساء وتحديدًا أشارت شقيقة أحمد زكي إنه قال أو ذكر معلومات يمكن أن تكون فيها إساء إلى عيلته أو لوالدته
وفي مداخلة هاتفية للكاتب محمد توفيق كشف عن الجمل التي وجهوا بها الإتهام إليه، ووجه إليه محمد الباز سؤال قائلًا:
قولي إيه الحكاية الأول، مسألة هذا الإتهام إنت إستقبلت الإتهام إزاي، وأنا عارف إنك عامل هذا الكتاب بحب شديد.
أجاب محمد توفيق معلقًا: أنا الحقيقة في الأول إفتكرت الناس إن المسألة ليها علاقة بالسخرية إفتكرت المسألة فيها هزار متصورتش خالص إن المسألة إن حد بيتكلم جد لدرجة إن أول ماصحفيين زمايلنا كلموني أنا الحقيقة رفضت التعقيب إعتبار إنه لا واضح إنه في حاجة مش حلوة.
وإستكمل: الكتاب أقرب للإحتفاء بأحمد زكي بشكل كبير جدًا وحضرتك قريته،
الحاجة التانية فكرة التعامل مع احمد زكي أنا بتكلم عن فنان كبير من خلال أعماله مش من خلال أسرته، هما طول الوقت فكرة إنت بتتكلم عن الأسرة والحقيقة الكتاب مش على الأسرة خالص أنا حتى رجعت للكتاب من كتر الإلحاح بفكرة إنه في إساءة فقعدت أشوف فين مواضع الإساءة فين أسرته في الكتاب فلقيت أسرته كلهم مش موجودة في أكتر من ٣ صفحات والكتاب ٣٨٠ صفحة دي أول نقطة، النقطة التانية أنا الحقيقة قعدت بلح عايز أعرف أيه الجمل اللي إستوقفتهم، فأتبعتتلي جمل أنا الحقيقة لحد اللحظة دي مش فاهم بردو فين.
وسأله محمد الباز عن من أرسل إليه الجمل هل شقيقته
وأجاب توفيق: لا هي بعتتها لأحد الزملاء والزميل بعتهالي، ودي الجمل المفروض اللي بيتهموني فيها بالاساءة.
وكشف توفيق عن تلك الجمل قائلًا: الجمل: “ظل إحساس أحمد بالغربة يسيطر عليه بل كان يزداد حين يرى الشفقة في عيون من حوله”، دي جملة من اللي أنا أساءت فيهم لأحمد زكي،
جملة تانية “إستقر أحمد في بيت الأستاذ محمود والست وطنية التي قررت أن تقول أنه إبنها، دي جملة تانية المفرض أساءت فيها، جملة تالتة “أمسك عبد المنعم بيد أحمد وذهب به إلى بيت محمود راتب وزوجته الست وطنية التي بمجرد أن رأت الولد الصغير الأسمر النحيل الذي لا يستطيع أن يرفع عنينه من الأرض من شدة الخجل، إحتضنه ليطمئن قلبه”، دي التهمة.
وأوضح توفيق: دي الجمل اللي واخدينها وكاتبين عليها ثبوت التعدي على الحق الأدبي بعبارات الإساءة والإحتكار وتلفيق أحداث في حق الأم والأخ.
وعند سؤال محمد الباز له قائلًا: هما قالوا إنهم هيقاضوك، هل هما قاضوك ولا المسألة حتى الآن صحفيًا؟
رد توفيق معلقًا: هما الحقيقة قالوا للإعلام كله إن هما قاضوني وقالوا إن الدعوة القضائية في طريقها إليا، لكن أنا مخضوض من فكرة إن هما مقروش الكتاب للأسف حتى بعض زمايلنا مقروش الكتاب وبيقولولي إنت أساءت لأحمد زكي في إيه وبيعتبروني كإني متهم وبدافع عن نفسي.
ووجه الباز رسالة لعائلة أحمد زكي قائلًا: قد يكون أحد المحاميين قرأ الكتاب وبيعمل بيه موضوع وده يخليك تضم صوتك لصوتي إنه الكلام عن أحمد زكي والكتاب ده من الكتب الحقيقة اللي بتنصف أحمد زكي وبتديله حقه وبتتعامل معاه بما يستحقه كنجم كبير فأنا أتمنى إن العيلة لا تستجيب لده، لو أن الأسرة القصة الحقيقية لأحمد زكي إتكتب الاسرة هتزعل إنت مكتبتش حاجة.
وقال توفيق: صحيح، أنا كنت بتكلم عن أحمد زكي 86 يعني هو قصة حياة أحمد زكي وهو صغير دي قصة تتعمل كتاب لوحدها
وقال الباز في برنامجه داعمًا لمحمد توفيق: أنا صوتي معاك طبعًا ومساند وداعم ليك لو حد قاضاك يعني، ولكن في نفس الوقت بقول لا ياجماعة إحنا لما الصحفيين أو الإعلاميين أو كاتب مهم زي محمد توفيق يعمل كتاب بلاش حالة التربص دي لإن إحنا بنتعامل مع نجومنا، يعنى أحمد زكي مش ملك عيلته مش ملك أخته ولا ملك قرايبه أحمد زكي ملك للجميع.
وعلق توفيق: أنا أتمنى بس الناس تقرأ الكتاب أنا اللي خضني أنه بعض الإعلاميين بيتكلموا معايا بإعتباري قاتل أحمد زكي مش بإعتبار إن ده كتاب.
وإختتم الباز حديثه قائلًا: نجومنا دول ملكنا كلنا والجمل دي مش فيها إساءة لأحمد زكي وأتمنى المسألة دي تنتهي على خير.
