وجه الفنان أكرم حسني لجمهوره ومتابعيه رسالة أمل وتفاؤل تدعوهم إلى النجاح، حيث شارك متابعيه سؤالًا عبر خاصية استوري بحسابه الشخصي على موقع تبادل الصور والفيديوهات “إنستجرام”.
وقام بنشر صورته، وكتب عليها قائلًا:”الأوقات الصعبة في كتير من الأحيان بداية لكل قصة جميلة، النجاح قصة بدايتها الشجاعة والأمل، إيه قصتك؟، وراها قصة”.
وشاركه أحد المتابعين قصة نجاح وتعرضه لوعكة صحية بمرض ثقب في القلب، وقام أكرم حسني بنشرها عبر خاصية استوري بحسابه على “إنستجرام”.
وقال المتابع: “قصتي يا أكروم لما تعبت من زمان وأنا عندي ٨ سنين وكان عندي ثقب في القلب ومكنتش أعرف عنه من أول ما أتولدت لحد مابلغت ٩ سنين، والثقب كبر ووصل لمراحل كبيرة أنا طول عمري رياضي وسباح وكنت لما بعووم في التمرين أو في بطولات الجمهورية والجيزة كنت بتعب جامد جدًا جدًا وبنهج جامد جدًا جدًا حتى لما كشفت بالصدفة مكنتش حتى مخطط إني أكشف إكتشفت موضوع مرضي”.
وأضاف المتابع:”والدكتور قال ساعتها أنت متأخر بس كويس أننا أكتشافها وساعتها قرر أنه يحول أوراقي لمستشفى مجدي يعقوب بأسوان، بصراحة ده صرح عظيم جدًا جدًا جدًا جدًا فوق وصف الخيال، بعدين عملت العملية بعد أخويا ما عمل القسطرة وخرج على طول بس أنا فضلت في المستشفى لمدة ٣ شهور مكنتش عارف أكل ولا أشرب ولا حتى أمشي”.
وأضاف:” كنت بنام ٢٠ ساعة من الـ ٢٤ ساعة مكنتش حاسس بالأيام وكان عندي إمتحانات وغبت عن كذا بطولة في السباحة فضلت في العملية لمدة ٦ ساعات وبعدها في العناية المركزة لمدة ٣ شهور وبعدها في العناية العامة لمدة شهرين ومكنتش عارف أكل ولا أشرب ولا حتى أمشي وكانت أيام صعبة جدًا جدًا عليا وعلى عليتي كنت بين الحياة والموت وأقرب للموت كمان، بعد ما كنت سباح كنت على فراش الموت عنيت كتير جدًا جدًا جدًا وكل الدكاترة وقفوا جنبي لحد ما نجحت وعديت المحنة دي حتى الدكاترة إتصوروا معايا وقالوا نتصور معاك يا محمد عشان لما تبقى سباح كبير قد الدنيا نكون أول ناس إتصوروا معاك ولما تنجح في حياتك نكون فخورين بيك”.
وإختتم حديثه:”من ساعتها قررت أطلع دكتور وفعلًا إشتغلت جامد جدًا جدًا جدًا جدًا جدًا حتى السنة اللي فاتت في تالتة ثانوي عملت الإعجاز عشان أبقى دكتور قلب وأشتغل في مجدي يعقوب بس للأسف مجموعي جايب تجارة، والحمد لله طلع ربنا بيكافأني ودخلت تجارة القاهرة إنجلش برنامج جورجيا الأمريكي وده من أكبر التجارة في مصر أن لم يكن الأكبر، أنا حاليًا شغال في دراستي وواثق إني هعمل المستحيل زي ما عملته قبل كده”.
يذكر أن آخر أعمال الفنان أكرم حسني كان مشاركته بمسلسل مكتوب عليا في موسم رمضان الماضي.
وشاركه العمل آيتن عامر، هلا رشدي، هنادي مهنى، حنان سليمان، إسماعيل فرغلي، وآخرين.
