“أحمد سالم” المعروف إعلاميًا “بالمطرب النقاش” صاحب موهبة غنائية مميزة وسلطانه نتذكر من خلاله نجوم الطرب أمثال “عبد الحليم حافظ، فريد الأطرش، الموسيقار محمد عبد الوهاب ومحمد فوزي”.
استضاف الإعلامي عمرو أديب المطرب أحمد سالم والموسيقار هاني شنودة، في برنامج “الحكاية” المذاع عبر قناة Mbc مصر مساء أمس، ليكشف سالم من خلاله عن سبب إلغاء حفله في دار الأوبرا المصرية مع المطربة السورية أصالة.
أحمد سالم يروي سبب إلغاء حفله مع أصالة خلال مهرجان الموسيقى العربية
وقال أحمد سالم: “قالولي هتطلع في مهرجان الموسيقى بحفل الختام ومكنتش مصدق اني هقف جنب أصالة، روحت وعملت البروفة، ويوم الأربعاء الساعة 8 جالي تليفون من مكتب أصالة وقالولي عندك مشكلة في الأوبرا”.
وأضاف: “روحت أشوف المشكلة في الأوبرا فقالولي غير مصرح بيك ومحدش بلغنا، كنت عامل البروفات جوة الأوبرا فاستغربت لأن محدش قالي على الورق، الحاجة دي كانت هتفرق معايا كتير وقولت لهم أي المطلوب مني وأنا أعمله، رفضوا وقالولي مش هنعرف نبلغ بيك حد دلوقتي، كلمت مكتب أصالة وقالولي لو فيه جديد هنكلمك”.
وعن الفيديو المتسبب في شهرته ذكر سالم: “كنت عامل الفيديو بتاعي في دبي، كنت شغال هناك من سنتين، وبعد السنتين لقيت الناس بتقولي أنت ترند، ودا توفيق من ربنا”.
هاني شنودة يختبر أحمد سالم على تمارين فوكاليز
أشاد الموسيقار هاني شنودة بموهبة أحمد سالم متوقعًا له مستقبلًا غنائيًا مميز قائلًا: “أنا أول مرة أعرفه دلوقتي في البرنامج، ودخل مزاجي على طول لان عنده كاريزما، لكن عشان أقول هو موهوب لازم أعمل له تدريب صوتي، وأنا سألته لقيته مش عارف معنى فوكاليز”.
وعقب إجراء اختبار صوته علق قائلًا: “ودنه وعربه كويسة، وشكله حلو و احنا في زمن الشكل هو كل حاجة، هو مرشح يكون مطرب ومن أكبر نجوم الطرب في مصر الفترة الجاية، وأنا مستعد ألحن له ونكسر الدنيا مع بعض”.
وأردف: “أنا عندي مبدأ مختلف، لو موهوب يبقى زميلي، بغض النظر عن الورق أو كارنيه أو السن، أو أحد الأدوار المهمة للأوبرا البحث عن المواهب الجديدة، أنا عملت أغنية لواحد يلعب على طشت، وبقى نجم كبير في محافظته، ولما طلبناه يطلع حفلة معانا قال أنا مشغول في الأفراح”.
أضافه شنودة: “مستعد ألحن لك حاجة ونكسر الدنيا المرة الجاية، أنا ملحنش لحد إلا لو شايف إنه بعد مليون سنة الناس تقول الراجل ده مغلطش، شفت محمد منير وعمرو دياب إنهم مستقبل”.
وفي هذا السياق كان من المقرر أن يحيي المطرب أحمد سالم حفل مع المطربة السورية أصالة ضمن حفلات مهرجان الموسيقى العربية في دورته الـ 31 لكن تم استبعاده.
