الفن نيوز

عمرو أديب يوضح الدرس المستفاد من أزمة منة شلبي

علق الإعلامي عمرو أديب، خلال حلقة الأمس من برنامج الحكاية، والمذاع عبر قناة mbc مصر، على أزمة الفنانة منة شلبي، والتي تم إلقاء القبض عليها بمطار القاهرة، ظهر اليوم، وبحوزتها كمية من المواد المخدرة.

وكشف أديب عن الدروس المستفادة من هذه الأزمة، موضحًا أن شكل المخدرات اختلف عن السابق، ولم يعد الشكل التقليدي، الذي يظهر في الأفلام السينمائية، كما طالب الأباء بضرورة الانتباه لما يجلبه أبناؤهم معهم.

وقال أديب: “حطوا موضوع منة على جنب، عايز بس اقول حاجة للناس، أنا طبعًا ليست عندي أي تفاصيل، التفاصيل والحمد لله دايمًا النيابة المصرية بتفيد المجتمع بالبيان، بيان النيابة انتهينا، مفيش أصل فيه موقع قال، والأخبار بتقول، لا النيابة قطعت كل قول انتهينا”.

وأردف: “إيه الدرس؟ فيه درس مهم جدًا بنقوله غير موضوع منة، وهذا درس هام جدًا، يا جماعة وده للمواطنين، اللي في البيوت، لم تعد المخدرات في الشكل، اللي بشوفه في الأفلام، اللي هو كيس البودرة، السلوفانة بتاعت الحشيش لا”.

وأضاف: “انسى الأفلام دي خالص، دلوقتي الأشكال تأتي في 100 شكل وشكل، ويبدو عليها، أنا مابتكلمش برضو على موضوع منة، إنها حلويات، إنها بونبون، إنها لبان، تبان كده”.

وتابع أديب: “يعني أنت يعود لك الشاب ابنك في البيت وهو رامي عبوة، وعاوز أوري حضراتكم العبوات، اللي كانت في المضبوطات، اللي في المطار، اللي في عهدة النيابة الآن، هتشوفوا شكلها عليها فراولة، علبة عليها فراولة، عليها برتقال، أنت لم تتخيل أن هذه فيها مادة الماريوانا، أنا مابقلش إن دي حاجة منة، لكني بقولك خد بالك، الغلاف عامل إزاي”.

وأشار: “لم يعد الغلاف بتاع زمان، اللي هو الحقنة، والكيس اللي فيه الكوكايين ولا الهيروين، القرش بتاع الحشيش، اللي ملفوف في السلوفانة خالص، لم تعد هذه الأشياء، فيه موضة تانية جديدة، اللي هي هذه الأشياء”.

وأكمل: “ليه، لأنه مادة القنب، اللي هي الماريوانا أو الحشيش عندنا، المادة دي أصبحت مش مجرمة في عدد من الولايات الأمريكية، وعدد من الدول الأوروبية، فبقوا يصنعوها، غير الماريوانا الطبية أو الحشيش الطبي، بقوا يصنعوها في شكل لطيف، ما هي بتتباع في محلات”.

وواصل أديب: “يعني فيه محلات، كان زمان بس هولندا همَّ اللي يعملوا الكلام ده، الناس كانت تاخد المادة الخام أو زيت الحشيش، إنما الآن هي تأتي في 100 شكل وشكل، تأتي باسم شركات وبراندات تقوم بعمل حلويات”.

واستكمل: “توزع حلويات في دول، وتوزع حلويات أخرى ومواد أخرى في دول أخرى متلبسة مخدرات، متلبسة كوكايين، متلبسة حشيش، ولكن بيعها شرعي في الخارج”.

ولفت: “ولذلك يجب برضو إننا نقول لشبابنا، اللي ماشي في الشارع بره وهيسافر، لقى محل من دول، فجايب معاه حتة، مش حتة كيس، وطبعًا يبدو إحنا عندنا ناس في الجمارك شاطرة جدًا، من مناظرة الحالات، الخبرات عندهم بتتراكم، كل ساعة وكل دقيقة”.

ونوه أديب: “فهمَّ عارفين ده إيه، أنت بتبقى متخيل أنا جايب كيس عليه فراولة، عليه برتقال، عليه خوخ، أنا جايب شاي، ده شاي أنت مش شايف شاي؟، هو عارف الشاي ده انهي واحد، لأنه شافه مع اللي قبل، وقبل اللي قبلك”.

ثم أضاف: “فهذا هو الأمر، ولذلك بعض الناس يتخيل إنها سلعة لطيفة دمها خفيف، ماحدش هياخد باله، فتجد نفسك في حالة ليست جيدة، وتجد نفسك في مشكل ممكن يدمر حياتك، ولذلك أنا بس بقول للأهالي وللشباب، خدوا بالكم أن هذا الأمر أصبح متوفرًا بسهولة”.

ليكمل: “يعني مثلًا تلقى الكيس من دول في أمريكا، هذا أمر تقرره النيابة، حاجتها مش حاجتها، هاتولنا البيان تاني، علشان نشوف النيابة، ماذا تقول بالظبط، إثر ضبطها بمطار القاهرة، قد تلقت إخطارًا يوم الجمعة الموافق 25 في كذا، بضبط الممثلة منة شلبي بمطار القاهرة الدولي، حال عودتها من الخارج، وذلك أثناء الإجراءات الجمركية”.

مردفًا: “وكان بحوزتها عدة حقائب تحوي متعلقاتها، التي بوضعها على جهاز الفحص بالأشعة، تبين وجود كثافات عضوية بداخلها، فتم تفتيشها تفتيشًا دقيقًا، أسفر عن العثور بها على مواد يشتبه من كونها مخدرات”.

موضحًا: “ده بيان النيابة، التحقيقات المستفيضة، طبعًا أكيد هيتم استدعاء السادة مأموري الجمرك في مطار القاهرة، يتم استدعاء السادة الظباط، اللي كانوا مسئولين في النبطشية دية، ويتم فهم الإجراءات اتعملت إزاي، وهل الإجراءات سليمة؟ هل الإجراءات ناقصها حاجة؟، طبعًا المعلومة، اللي عندي أن الأخ الزميل الأستاذ المحامي، اللي كان معانا على التليفون، ليس المحامي الوحيد، فيه محاميين آخرين، يعني موجودين في هذه القضية”.

متابعًا: “طبعًا زي ما بنقول، وعرفنا في التحقيقات، أن منة قالت أن هذه الأشياء ليست ملكًا لها، وليست في حقيبتها، فكلام منة موجود، كلام الإخوة في مطار القاهرة موجود، وسيكون القول الفصل للنيابة المصرية”.

وحذر أديب: “أرجوكم يا جماعة خدوا بالكم من هذه الأشياء، عندي ليكم خبر هتضحكوا لما أقوله لكم، إنه حتى الآن المخدرات ممنوع تداولها في مصر، أنا آسف كان لازم أقول لطم كده، علشان لو فيه حد متخيل إنه فيه أي شيء اتغير في الدنيا، المخدرات ممنوعة في مصر، تعاطيها، تداولها، تجارتها، أيًا كان”.

وأكد: “لا شرعية للمخدرات في مصر، ولا شرعية للمخدرات في عدد كبير من دول العالم، ولا شرعية للمخدرات في عدد كبير من الولايات الأمريكية، فيه ولايات مسموح فيها، وفيه ولايات غير مسموح فيها، فأرجو إن الموضوع ده يكون واضح، وأرجو إن الأهالي يدققوا أنت جايب إيه معاك؟ ده إيه؟ حلويات؟ توفي؟ بونبوني؟ أرواح؟، طبعًا حضراتكم ماتعرفوش الأرواح، دي أجيال حديثة كلها، ماتعرفش إيه هي الأرواح”.

مشيرًا: “يعني ربسوس؟ نوجة؟ لبان؟ طيب إيه النوع الغريب ده؟، كن فضوليًا، أنا مابقلكش ضايقه، بس أنا بقول لك السؤال ماحرمش، طيب اديني أدوق، طعمها إيه دي؟، ما الأهالي ليها مليون طريقة إنها تتكلم في هذا الأمر”.

وكرر: “وأرجع تاني وأقول إن القانون بيأخذ مجراه، منة شلبي طبعًا فنانة عظيمة وكبيرة وكل شيء، ولكن القانون بيتطبق على كل الناس، النيابة تأخذ مجراها، كل شيء يمشي تمام إن شاء الله، خدوا بالكم برضو، أنا عايز أقول حاجة، إن وارد الناس ماتبقاش فاهمة هي بتجيب إيه”.

وأتم الإعلامي عمرو أديب: “أو ماتبقاش، أنا بتكلم بشكل عام يعني، شايفة أو فاكرة إن الأمر عادي، وارد يعني، فإن شاء الله نتابع مع حضراتكم هذه القضية، وزي ما قلت لكم، إحنا اول ما طلع البيان كان معاكم تسمعوه وتعرفوه”.

ويذكر أن النيابة كانت قد أخلت سبيل الفنانة منة شلبي بضمان مالي قدره 50 ألف جنيه، مع إرسال المواد المضبوطة بحوزته إلى مصلحة الطب الشرعي، لفحصها وبيان طبيعتها ومدى احتوائها على أي من المواد المخدرة، ويجري استكمال التحقيقات.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!