تصدر نقيب المهن التمثيلية الفنان أشرف زكي تريند جوجل، بعد استضافته ببرنامج “حبر سري” مع الإعلامية أسما إبراهيم يومي الخميس والجمعة على قناة القاهرة والناس.
وكانت أبرز تصريحات الفنان أشرف زكي من برنامج حبر سري
كل الممثلين اللي طلعوا جرحوا في بعض فيه منهم كتير اتحولوا للتحقيق، وفيه ناس خدت إنذارات وعقوبات تانية، وكل يوم عندي قضايا ممثلين بنقابة المهن الموسيقية، مصر أهم حاجة وكل اللي غلط فيها شطبته.
عادل إمام صحته زى الفل وكل الإشاعات دي ملهاش أساس من الصحة، إحنا دايمًا على تواصل مع أولاده، وكلمني من فترة بشكل شخصي وهو بخير.
تعبت من عدم التقدير من بعض الناس وتوقعوا مني مفاجأة ولكن مش عايز اتكلم عن موقفي من خوض انتخابات النقابة المقبلة.
قرار ابتعاد النجمة الكبيرة عبلة كامل عن الفن قرارها الشخصي.
حاولنا نكلم عبلة كاملة كتير وهي اللي قررت وردها الدائم اللي فيه الخير يقدمه ربنا، وأنا على تواصل معها واحنا أصدقاء جدًا.
أزمتي الصحية الأخيرة تعلمت منها أن الصحة مهمة ونعمة من عند ربنا لازم نحافظ عليها وكمان عشان بناتي، وكل اللي كنت بفكر فيه بناتي ومش نفسي وكمان الناس المسئولين مني والإهمال في الصحة مسألة قاسية وشوفت حب الناس الصادقين مش المنافقين.
معرفش في ابن لسمير صبري ولا لأ، ودي حاجات اللي يحسمها الوصية والميراث الشرعي، ومحدش قالي، وأنا ما حاولتش أعرف ولم أبذل مجهودًا في الموضوع.
علاقتنا أنا وروجينا زي ما هي من أول يوم، وأنا دائمًا أنصح أي حد بيتجوز من فنانة إذا لم يقدر ظروف عملها لا يتزوجها لأنك لما تزوجتها عارف طبيعة شغلها.
كل واحد فينا أنا وروجينا يقدر ظروف التاني ودي معادلة النجاح وهي محترمة تفرغي للنقابة وخدمة زملائي وأنا محترم تفرغها لمهنتها وإلا لن تحقق شيء.
أنا عصبي مع الأغبياء فقط وممكن أقتل الغبي البليد ولا أتعامل معهم وده اللي بيعصبني والموضوع ده بيجنني غير كده مفيش عصبية، وخرجت عن شعوري قبل كده وندمت.
صرحت قبل ذلك برفض إعطاء تصريح تمثيل للفنانة حلا شيحة حال طلبها العودة إلى عالم الفن بعد تصريحاتها عن التمثيل والفنانين ولكني أرى أن قرارها وقتها كان انفعاليًا، لو هى موجودة حاليًا وعايزة تصريح هستشير أهل الفن الأول وأهل الفن طيبين.
