حل الإعلامي ممدوح موسى ضيفًا مع الإعلامي خيري رمضان بحلقة الأمس من برنامج حديث القاهرة، المذاع عبر قناة القاهرة والناس.
وتحدث موسى عن مشواره الإعلامي، وعلاقته بالعديد من المشاهير من نجوم الغناء والتمثيل في مصر والعالم العربي.
وفيما يلي أبرز تصريحات ممدوح موسى لبرنامج حديث القاهرة.
عمري ما دفعت جنيه واحد لأي حد
عمري ما دفعت جنيه واحد لأي فنان، ولا عادل إمام ولا عمر الشريف ولا أي حد، كانوا بييجوا علشان أنا بعمل شغل مختلف، دي صناعة صناعة إنك تعمل حاجة حوارية مع فنان، ده موضوع تاني خالص غير أي حاجة.
بتميز بالاجتهاد، بإني بجري ورا شغلي أكتر حاجة، يعني اللي شاف شغلي وعرفني عن قرب، عارف اجتهادي في الحتة دي.
عمرو دياب كان بيتعرض عليه ملايين ومابيطلعش
عمرو دياب ممكن يطلع معايا، عمرو عمره ما خد مني جنيه، وكان بيتعرض عليه وأنا قاعد وإحنا بنسافر بره، بنسافر في كل حتة، بيتعرض عليه من كل القنوات، من كل البلاد اللي بنسافرها ملايين مابيطلعش.
ودلوقتي بيتعرض عليه فلوس كتير جدًا، وبرضو مابيطلعش، والفنان عادل إمام نفس الشيء.
معظمهم اللي عندي علاقة معاهم كويسة مستمرة هييجوا.
عمرو دياب هيطلع لو عاوز يطلع
عمرو دياب هيطلع، إذا كان عاوز يطلع، حتى أيامي برضو إذا كان هو عاوز يطلع، وعمرو دياب بيشتغل لمصلحته، فلمصلحته دي أنا عاوز اطلع النهاردة هيطلع، عاوز أختفي 10 سنين هيختفي.
عمرو دياب من غير يتكلم أنا عارف هو عاوز يقول إيه
وقت ما يقول عاوز أطلع ييختار ممدوح موسى؛ لأنه أصلًا من غير ما يتكلم أنا عارف هو عاوز يقول إيه.
شيرين وتامر حسني لو جيت أطلعهم هيطلبوا فلوس
أنا طلعت شيرين في شارع النجوم قبل آه يا ليل، لو جيت أطلعها دلوقتي هتطلب فلوس، وتامر حسني هيطلب فلوس.
بعمل مشوار حياة حماقي وفاضل لنا 5% والبرنامج يبقى جاهز
حماقي أنا بعمل له مشوار حياته بقالنا ست سنين شغالين فيه، فيها كل اللي أنت تتخيله، أنا بسأل السؤال من بلد، بيتجاوب عليه من خمس بلاد، لسه ماتعملتش كفكرة في برامج حوارية.
قطعت 95% من البرنامج، فاضل لنا 5% والبرنامج يبقى جاهز.
حماقي عمل ألبومات في جيل عمرو دياب معدية الكلام ده كله
حماقي محترم أوي، والناس طبعًا عارفة إنه محترم، وإنه فنان أوي، إنه أحسن واحد بيعمل مزيكا في الجيل ده.
ألبوم مابلاش فيه تسع أو 10 أغاني أحلى من بعض
عمل ألبومات، وفي جيل عمرو دياب هو عمل ألبومات معدية الكلام ده كله، يعني مثلًا الألبوم بتاع مابلاش، عنده تسع أو 10 أغاني أحلى من بعض، وحقق أرقام خيالية، ده من اجتهاده.
المنظمة لحفلة حماقي في الرياض قالت لي أكتر جمهور جاء لنا حماقي
أنا لسه كنت مع حماقي في الرياض من كام يوم، أنا شفت بعيني الحفلة مليانة على الآخر، واحدة ست المشرفة المنظمة قالت لي أكتر جمهور جاء لنا حماقي.
سينمائيًا تامر حسني أكتر نجومية وغنائيًا حماقي
تامر حسني سينمائيًا أكتر نجومية من حماقي، غنائيًا حماقي.
حماقي عنده مشروع تمثيلي إن شاء الله، بس هو عشان متأني أوي في الحتة دي، عنده مشروع غنائي هيبقى حلو أوي.
أسرار النجوم بدأت بعمرو دياب ونهيت بعادل إمام
أسرار النجوم بدأت بعمرو دياب أول حلقتين، ونهيت بعادل إمام آخر حلقتين، وما بينهما طول الشهر أي حد أنت عاوزه في مصر أو في العالم العربي.
عمرو دياب عاوز يعيش اللي معاشوش من 30 سنة
عمرو دياب مجتهد جدًا وراجل بيحب شغله جدًا، وضحى بحاجات كتير أوي؛ عشان خاطر شغله، لا بينزل، يعني الأيام اللي أنت شفته فيها دي كان ابتدى ينزل، قبلها ماكنش بينزل، ولما كان بنسافر بره، برضو مابينزلش، يعني في أي حتة، في تونس في المغرب في لبنان في أمريكا.
بس بعد كده ابتدى يقعد، لكن الأول ماكنش بيقعد، وقفل على نفسه المدة دي كلها، دلوقتي بقى يطلع في أي حتة بيروح أي حتة، عاوز يعيش اللي معاشوش من 30 سنة.
فيه حاجة مهمة جدًا، نجاح عمرو دياب السبب الرئيسي فيه عدم ذكاء الآخرين، هو مش عبقري هو مش هيرو، عدم ذكاء الآخرين.
عمرو دياب هو مدير أعمال نفسه
الحقيقة عشان أبقى واضح وصريح عمرو ماكنش عنده إدارة أعمال، هو مدير أعمال نفسه، طول عمره هو بيفكر لنفسه، حتى لما يكون معاه مديرين أعمال بيرجعوا له.
الحاجات المادية والحاجات دي كلها ليها ناسها، لكن هو يقدر يقول أنا هطلع إمتى أنزل إمتى أروح إمتى، يعني هو اللي بيدير نفسه بنفسه.
دخولي معاه في البداية، ابتديت أصنع حاجة، ماكنش لسه الناس شافتها، مش في عمرو هو نجم، بس أول واحد صور الحفلات، وصور عمرو دياب وهو ماشي وهو خارج، والناس بتسلم عليه، ماكنش الناس بتشوف الحاجات دي كلها، دي كانت بالنسبة لي جديدة على الناس.
دخول عمرو دياب في أي مكان بيقلب المكان
عمرو دياب حاجة تانية خالص، عمرو ومازال، دخول عمرو دياب في أي مكان بيقلب المكان.
لعبت دور مع ناس كتير، أنا عندي حياة مع لطيفة، حياة مع يسرا، حياة مع أنغام، أنا بادي مع أنغام من وهي عندها 16 سنة، عندي حياة مع ناس كتير جدًا، وكنت أول واحد يطلع منى زكي وأحمد السقا.
فضل شاكر أول مرة الناس تشوفه شافته معايا
وفضل شاكر أول مرة الناس تشوفه شافته معايا، وعاصي الحلاني، وراغب علامة كان بادئ قبلي، أو بدأت معاه، عملت معاه مشوار برضو، ففي مشوار لناس كتير ساعدت في شغلهم.
كنت بنقي الأغاني وعندي رؤية مع الفنان
لأني برضو ماكنتش مذيع عادي، كنت بنقي الأغاني، المقربين من الفنانين والفنانين سامعني دلوقتي، أنا كنت بنقي الأغاني، بعمل حاجات كتير جدًا للفنانين، وبقول له ممكن تقول دي في الحفلة وماتقولش دي، عندي رؤية فنية مع الفنان.
قصة فيديو لنور الشريف يدعو فيه الناس للتبرع لمستشفى 57357
في نفس الشهر اللي عمل فيه الحاج متولي، جبته هو والستات الأربعة، وعملت دَخلة جامدة جدًا، جبت نور الشريف بالعربية والستات جم بالحنطور، عملنا زفة يعني موضوع جامد جدًا.
وأياميها كان دكتور شريف أبو النجا، المدير التنفيذي للمستشفى، جاء لي وقال لي يا ممدوح أنا عاوز أعمل دعاية للمستشفى في بدايتها، فأنا كل يوم كان عندي فنان بصوره.
جبت الفيديو ده عشان يكون صدقة جارية على روح نور الشريف
فصورت نور الشريف، وجبت لك الحتة دي؛ علشان كمان تبقى صدقة جارية على روح نور الشريف، لأنه من أحسن الناس اللي اتكلمت في الموضوع ده.
كله بتتمنى وفيه ناس كتير بتكلمني بتقول لي ارجع؛ عشان عايزين نطلع معاك، وفيه ناس ماطلعتش معايا، نفسهم يطلعوا حتى دلوقتي، اللي ماطلعش معايا أياميها وهو بيتفرج على النجوم دي.
أنا من النوع اللي ماحبش أكرر حاجة ناجحة
كل سنة من السنة للسنة بقعد أفكر أعمل إيه؟، إيه الجديد اللي أعمله، فأنا من النوع اللي ماحبش أكرر حاجة ناجحة، يعني شارع النجوم ده ناجح جدًا، كنت ممكن أعمله سنة تانية، ماعملتوش عملت برنامج اسمه زي القمر.
بعدها فكرت في نعمل الأتوبيس المكشوف ده، وأروح المحافظات للناس اللي هي أصلًا مابتشوفش، يعني أنت كل محافظة تشوف الجمهور اللي نزل 60 ألف 70 ألف للفنان بلاش.
وكان فيه محافظات مابتعرفش مين الفنان، اللي جاي لها، فأنا جبت فرقة رقص من البرازيل، شوف تكلفتها أد إيه؟، جبت أعلى مصورين وأعلى بتوع إضاءة، وجبت الأتوبيس ده، وبمشي لغاية أسوان أصور 700 كيلو؛ عشان أطلع ربع ساعة في التليفزيون في رمضان.
لأن صفوت الشريف أياميها الله يرحمه قال لك البرنامج النص ساعة، مش عايزين أكتر من 15 20 دقيقة بالكتير كله إعلانات.
أنتجت البرنامج وخسرت فيه 3 مليون
فلقيت نفسي صرفت صرف جامد جدًا، أنا اللي أنتجت البرنامج، وخسرت 3 مليون جنيه، سنة 2000 مثلًا، اللي هما يساووا دلوقتي 30 40، زي ما أنت عاوز بقى.
أرقام جامدة جدًا، فالموضوع كان صعب جدًا، بس سعادتي إن كان بينزل لي مدير الأمن والمحافظ وفرقة أمن، حاجة رهيبة، تشوف الراجل قاعد بالجلابية.
لو شفت الشوت بتاع إليسا، قاعد الراجل بيشرب شاي بالجلابية، وبيتفرج إليسا تحت رجله، كان أول حوار لإليسا في مصر، قبل شارع النجوم، يعني دي ماكنش حد يعرف إليسا في مصر، عرفوها إمتى؟ من شارع النجوم، لأن ده كان معمول للشو تايم.
الناس قاعدين بعيالهم بيتفرجوا على إليسا لايف
في برنامج الأتوبيس خدتها معايا الأقصر، وقابلنا محمود إدريس هناك، وعمل لنا دبايح وعمل لنا حاجات جامدة جدًا، المهم عملنا حلقة جامدة جدًا.
وأنا اتبسطت لقيت الناس قاعدة فوق البيوت الصغيرة، بيشربوا شاي وقاعدين بعيالهم بيتفرجوا على إليسا لايف، أنت عشان تروح ليالي التليفزيون بتدفع فلوس.
والله العظيم ببلاش، ماخدتش ولا جنيه من أي حاجة، وفي الآخر منعوني من دخول التليفزيون بعد البرنامج ده.
