كشف الفنان كريم محمود عبد العزيز عن عدد كبير من التصريحات الجريئة، أثناء استضافته في برنامج “ادينا بندردش” عبر موقع الفيديوهات الشهير “اليوتيوب” مع الإعلامية شيرين عرفة.
أبرز تصريحات كريم محمود عبد العزيز
بعد ما بنتي الأولى اتولدت ابتديت أفهم إن في مشاهد معينة مش هقدمها، وقررت أقدم أعمال عائلية أكتر.. واللي هيتجوز ممثلة لازم يكون فاهم الشغلانة ومقدرها مليون في المية.. ومببقاش عايز أطفال الشوارع تشوف ولادي مش علشان ممكن يحسدوهم.
مفيش أي مشاكل عائلية حصلت بيننا وبين بوسي شلبي بعد وفاة والدي.. واحترامنا أنا وأخويا لوالدي قبل الوفاة زي بعد الوفاة، ومش هنقدر نعمل مشاكل مع حد تضايق أبويا.
هبطل تمثيل لو لقيت نفسي خلصت كل حاجة عندي.. وكنت فاكر إن الشهرة ممتعة، لكن طلعت متعبة لأي حد بيطلع على الشاشة.
بكيت في العرض الخاص لـ موسى لأن كان نفسي أبويا يشوفني.. وبقول لوالدي لو سامعني هعرفك إنك مخلف رجالة هتكمل وتكون معتمدة على نفسها.
أثناء مسلسل هوجان، حصلي موجة اكتئاب صعبة ومبقتش فاهم الدنيا، وقررت أروح لدكتور نفسي، وفي يوم صحيت لقيت رقم غريب بيتصل عليا وكان وحيد حامد فرديت وقالي إنه مبسوط بيا واتفرج على هوجان، وقالي أنا عايزك تجيلي عشان في فيلم، ومن بعدها شعرت بالنجاح وخرجت من شعوري بالاكتئاب وفكرة اللجوء لطبيب نفسي، واكتسبت ثقة فنية فى نفسي.
فكرة الموت كانت شاغلاني دايمًا وأنا صغير، ومكنتش عارف أعيش بسبب التفكير في الموت، وكان دائمًا كل اللي في دماغي هو إن مينفعش أبويا يموت، ولما كان يسافر كنت دائمًا أفضل أقول يا ترى هيرجع ولا لا وكنت خايف ييجي يوم ويموت، ولكن حاليًا مبقتش فكرة الموت عندي زي زمان خاصة بعد التعرض لعدد من الصدمات.
آخر أعمال الفنان كريم محمود عبد العزيز
شارك الفنان كريم محمود عبد العزيز في فيلم “شلبي” مع كل من بيومي فؤاد، روبي، حاتم صلاح، وعدد من ضيوف الشرف، ومن إخراج بيتر ميمي.
