الفن نيوز

شيري عادل:أنا وطارق صحاب من 6 سنين وزواجي منه كان مفاجأة

✍🏻هدير أشرف

حلت الفنانة شيري عادل ضيفة عبر برنامج “the insider بالعربي” على تلفزيون دبي، وخلال لقاءها في البرنامج تحدثت عن إرتباطها وزواجها من الفنان طارق صبري، وتحدثت أيضًا عن أعمالها الفنية القادمة.

وترصد “مجلة هاڤن” أبرز تصريحات الفنانة شيري عادل في برنامج “the insider بالعربي”.

•أنا وطارق صبري نعرف بعض من 6 سنين، من بنات سوبر مان، وصحاب جدًا، وموضوع الإرتباط ده فجأة كده حصل، يعني مفيش موقف معين.

•أنا بتكسف أتكلم، ومعرفش إيه بيخليني في التمثيل مش بتكسف، بس باجي أتكلم ببقى مكسوفة شوية.

•أنا مش بيمنعني إني أظهر كتير غير الكسوف، بس برضو مقدرش أقول لأ لأي برنامج لإن ده حاجة مهمة، بس ممكن أختار الحاجة اللي عايزة أظهر فيها، وأحب لما أطلع يبقى عندي حاجة أقولها مش أطلع وخلاص.

•أنا بحب التفاصيل جدًا، وده اللي بيخليني في الأدوار أطلع لها كام حاجة وأحب الأحاسيس في حتة معينة، وأشوف تفاصيلها، يعني دي حاجة بتساعدني وحاجة أنا بحبها فيى حتى لو حاجة عيب، وحاجة بتفدني في شغلي.

•إن شاء الله طالعة ضيفة شرف في فيلم، بس مش هقول اسمه لإن مش أكيد هروح، بس إن شاء الله دا أقرب حاجة هتنزل بس لسه مصورتش.

•أنا بحضر فيلم ليا إن شاء الله من بطولتي، وهيبقى كوميدي، وأنا مبسوطة بيه لإن وحشني الكوميدي أوي، والمفروض تصويره هيكون في شهر 3 إن شاء الله، ولسه مفيش تفاصيل خالص.

•أنا وطارق إن شاء الله هنعمل مسلسل مع بعض، بس لسه مش عارفين رمضان ده ولا اللي بعده، لأن أوقات بتبقي بتحضري حاجة ممكن تبقى بعد رمضان وممكن فجأه نقوم مصورين.

•أنا طالعة بشخصية اسمها (ندى) في مسلسل “جروب الدفعة”، والشخصية دي بتحصل لها موقف ما خلال الأحداث، والموقف ده بيغير حياتها بشكل كبير، والموقف نفسه بالنسبة لي مهم أوي وجديد وخلاني من أول ما عرفت إيه الموقف اللي بيأثر في حياتها جامد أوي خلاني أبقى نفسي أقدم الدور ده والشخصية دي، وحبيتها أوي وتأثرت بها أوي، وإن شاء الله يارب يعجب الناس، وبحب الناس تقول رأيها في الدور.

•دوري في مسلسل” جروب الدفعة” مش يعتبر كوميدي، والمسلسل نفسه إجتماعي، وفيه حبة كوميدي، وفيه علاقات إنسانية، بس هو الدور نفسه مش كوميدي.

•أنا إلي الآن مُجتمعة مع صحابي من أيام المدرسة، وإحنا 12 بنت وتقريبًا مليش صحاب غيرهم بالقرب ده وبطول المدة دي، لإني معاهم من حضانة وبالنسبالي هم أقرب ناس وهم الجروب بتاعي.

•أنا وصحابي من أيام المدرسة عمرنا ما الدنيا أخدتنا ولما الدنيا بتسرقنا في شغل أو جواز أو حاجة بنرجع تاني نتجمع كل شهر حتى لو في بيت واحدة مننا، وأنا بحبهم جدًا وبعتبرهم صحابي الحقيقيين.

•أنا كنت بحب دراستي جدًا في الجامعة، وأنا دخلت تجارة فرنساوي، وعشان مدرستي برضو كانت فرنساوي، قلت بقى أكمل وأبقى خلصت الشهادة برضو بالفرنساوي، وبحب التجارة والحساب ومليش في الحفظ، بس بحب أفهم الحاجة.

علاقة الحب التي جمعت شيري عادل وطارق صبري

جاء خبر الإرتباط الرسمي بين الثنائي شيري عادل وطارق صبري مفاجأة للجمهور، حيث عاش الثنائي قصة حب منذ فترة ولكن لم يعلنا عنها، وحرصت شيري عادل على الحفاظ على خصوصيتها، وكان ظهورهما الأول معًا خلال عرض مسرحية “زقاق المدق”، والتقط الثنائي حينها صورة معًا برفقة الفنانة دنيا عبد العزيز والفنان كريم الحسيني.

عمل تستعد له شيري عادل

تواصل الفنانة شيرين عادل تصوير مشاهدها في مسلسلها الرمضاني الجديد الذى يحمل اسم “جروب الدفعة”.

تدور أحداث المسلسل في إطار اجتماعي تشويقي، حول مجموعة من الطلبة في إحدى الجامعات، وتدور بينهم الكثير من الأحداث المختلفة، ومن خلالها يتم طرح الكثير من المشاكل التي تواجه الشباب في هذا السن.

أبطال “جروب الدفعة

شيري عادل، عمرو وهبة، ولاء الشريف، بسمة داود، محمد عادل”، ومن تأليف هاني سرحان، وإخراج محمد عبد السلام.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!