نشر الفنان محيي إسماعيل، الملقب بالقيصر، فيديو، عبر حسابه الشخصي بموقع الفيديوهات تيكتوك، ظهر خلاله، وهو يتحدث عن أديب نوبل العالمي الراحل نجيب محفوظ.
وكشف إسماعيل عن كواليس لقائه بمحفوظ، والذي جمعه به، قبل تقديمه لدور المأمور بفيلم شهد الملكة، الذي لعبت بطولته نجمة الجماهير نادية الجندي.
قالوا لنجيب محفوظ اللي هيعمل دور المأمور في شهد الملكة ممثل اسمه محيي إسماعيل
وقال إسماعيل: “نجيب محفوظ الجميل نوبل العظيم، أنا رحت له العجوزة، كان فيه فيلم اسمه شهد الملكة، فالفيلم ده بيقولوله اللي هيعمل دور المأمور ممثل اسمه محيي إسماعيل”.
وأردف: “فكروني عايز أعرف مين محيي إسماعيل، عايز أفتكره، فكروني بيه كده شوية، فقال هات بؤك عند ودني وعلي صوتك، فقلت له طيب حاضر”.
عملت مع نجيب محفوظ فيلم اسمه تحقيق أنا وإلهام شاهين
وتابع إسماعيل: “والله يا أستاذ نجيب أنا عملت أول فيلم لسيادتك اسمه تحقيق، كنت أنا وإلهام شاهين، كانت أول مرة تمثل بطولة كان قدامي في فيلم تحقيق، فده كان تأليف سيادتك، قالي أيوه افتكرت، هو أنت بتاع فيلم تحقيق، اللي بتدور طول الفيلم على القاتل، االي لابس جزمة بني في أبيض”.
عايز بقى المأمور ده سيكوباتي
وأضاف: “قلت له آه، قالي افتكرتك، محيي إسماعيل مظبوط، المهم قالوله هيعمل دور المأمور، قال كويس يعمله، بس أنا عايز بقى المأمور ده سيكوباتي، راجل سيكوباتي”.
وأكمل إسماعيل: “سيكوباتي يعني راجل مابيحسش وراجل ظالم وقناص، فاعملوله هيبة، شنب ويخوف، قلت له لأ إن شاء الله هعمل الدور كويس، بس أرجو من سيادتك إنك تبقى تشوف الفيلم، قالي خلاص يا محيي جدع برافو عليك، قلتله طيب اسمحلي أقول لسيادتك دعابة كده سريعة نكتة، قالي اتفضل أنت نُكتي بتقول نكت كمان، يعني أنت كوميدي”.
قلت لنجيب محفوظ نكتة
وأتم: “قلتله لا مش أوي، قالي قول النكتة، وعلي صوتك، قلتله حاضر، ورحت قايل النكتة، قلتله مرة واحد إلى واحد هدية شوية مانجة، فاللي خد المانجة ده زعلان، فبيقوله أنت زعلان ليه، قاله يا راجل أنت بتديني مانجة بايتة، قاله يا سلام، وهي يعني كانت بايتة عند حد غريب”.
آخر ظهور لمحيي إسماعيل
يذكر أن إسماعيل قد حل ضيفًا، مؤخرًا، مع الإعلامية أسما إبراهيم، في حلقة مكونة من جزأين، ضمن حلقات الموسم الثالث من برنامج حبر سري، المذاع عبر قناة القاهرة والناس.
والجدير بالذكر أن الفنان محيي إسماعيل كشف، خلال الحلقة عن كواليس أعماله الفنية، بالإضافة إلى العديد من الخفايا والأسرار، التي تخص حياته الشخصية والفنية.
