علق الإعلامي عمرو أديب، أمس الأحد، الموافق للـ29 من يناير، خلال حلقة برنامجه الحكاية، المذاع عبر فضائية mbc مصر، على بيان اتحاد الكرة، الذي صدر، أمس، وأعلن فيه عن إيقاف التعامل مع المستشار مترضى منصور، رئيس نادي الزمالك.
وترصد مجلة هافن في السطور التالية، ما قاله الإعلامي عمرو أديب في تعليقه على بيان اتحاد الكرة الصادر أمس.
قلت أول إمبارح أنا لا أتحدث في الرياضة ولا في الكورة، أنا بتكلم على القانون والأصول، النهاردة اتحاد الكرة المصري أصدر بيانًا، وخليني أقول لحضراتكم لو ماكنش البيان ده طلع، كان بصراحة وجود اتحاد الكورة أو هيبة اتحاد الكورة أو شرعية اتحاد الكورة هتكون محل تهديد.
يعني البيان، اللي هما طلعوه ده، هو بداية رد شبه قوي على اللي اتعمل في الكورة المصرية، وهي الناس كانت بتقول إيه؟، طبعًا هو حد قادر يعمل حاجة؟ هو اتحاد الكورة يقدر يرد؟ هو فيه حد يقدر يرد؟ هو فيه حد يقدر يكلم حد؟ هو فيه حد ممكن يشتكي؟، ده كان كلام الناس.
إنما أن يبدأ اتحاد الكورة يرد على كل الأشياء، اللي هي حصلت، وموضوع كلاتنبرج وموضوع لجنة الانضباط، وموضوع السباب المستمر من رئيس نادي الزمالك لعدد من الشخصيات الكروية في مصر والرياضية، وإنه مانشُفش حلول أو نشوف إجراءات من اتحاد الكورة، كان بدأ الناس يقولوا شكرًا جزيلًا، خلاص كده مفيش كورة، ومفيش تحكيم، ومفيش حياة رياضية، ومفيش أي حاجة.
لكن طلع اتحاد الكورة بيان، وأخد فيه قرارات، عدم قبول اعتذار لجنة الانضباط، والتمسك باستمرارها في عملها كقامات قضائية وقانونية مستقلة، حيث أن تواجدها في اتحاد الكورة المصري يرسخ مبادئ العدالة والانضباط، داخل منظومة الكرة المصرية.
ويؤكد المجلس على كافة صلاحيات اللجنة الانضباطية والأخلاقية، طبقًا للائحة الانضباط والأخلاقيات، ودعمه الكامل لما تتخذه من قرارات، إيقاف التعامل مع رئيس نادي الزمالك ولجانه، وإحالة جميع تجاوزاته ضد مجلس إدارة الاتحاد المصري لكرة القدم إلى لجنة الانضباط، مع احتفاظ المجلس بحقه في التصعيد، حال استمرار تلك التجاوزات.
التلات سطور دول مهمين وعاديين، يعني إيه مهمين وعاديين؟، مهمين إن اتحاد الكورة يقول أنا مش هسيب حد يتهجم عليّ وهاخد حقي، بس العادي إيه؟، هو ده الطبيعي، هو ده كان الطبيعي، أما حد يتهجم عليك تاخد حقك.
يذكر أن اتحاد الكرة المصري، كان قد أصدر بيانًا أعلن، خلاله، إيقاف التعامل مع المستشار مرتضى منصور، رئيس نادي الزمالك، بعد تجاوزاته المستمرة في حق اتحاد الكرة وكذلك لجنة الانضباط.
