تنوعت أدواره ما بين الخير و الشر، خطف الأنظار بشخصيته الأخيرة في مسلسل “أزمة منتصف العمر”، ذلك منذ عرض أولى حلقاته، حيث جسد شخصية شاب يدعى “زياد” ويحاول إعادة ميراثه، هو موهبة فريدة يدقق في اختيار أدواره ويتحسن أداؤه بشكل ملحوظ.
حقق أبطال مسلسل “أزمة منتصف العمر” نجاحًا كبيرًا، وكان من بينهم النجم عمر السعيد، الذي حرصت مجلة “هافن” على التواصل معها ليكشف لنا عن كواليس العمل وأصعب مشاهده ، وكان نص الحوار على النحو التالي :
ترشيحك للعمل كان عن طريق مين ؟
الترشيح كان من شركة الإنتاج، ومن إدارة MBC وشاهد وكريم العدل، ودي رابع مرة اشتغل مع المخرج كريم العدل، وتالت مرة اشتغل مع صادق الصباح، واشتغلت أكتر من مرة مع منصة شاهد.
هل توقعت نجاح مسلسل أزمة منتصف العمر؟
كان نفسي المسلسل ينجح، وأنا كنت متراهن معاهم أنه ينجح تحديدًا أنا و أستاذ أنور الصباح، لأن كان باين من الشغل والتعب والأحداث، وإن المسلسل هينجح.
هل يتشابه المسلسل بالفعل مع المسلسل التركي العشق الممنوع أم الحلقات المقبلة ستكشف مفاجأة أخري ؟
المسلسل مالوش علاقة بالعشق الممنوع، معرفش مين طلع الإشاعة دي، وأي حد متابع المسلسل هيلاقي ان مفيش وجه شبه، وأنا مشفتش مسلسل العشق الممنوع بس سألت كل اللي حواليا وقالوا إنه مش شبه.
من وجهة نظرك أي أصعب مشهد قدمته في المسلسل وهل أتعرض ولا لسه؟
المشاهد كانت بيني وبين مراتي “هاجر عفيفي”، لسه متعرضتش لحد دلوقتي.
كيف ترى شخصية زياد شرير أم عايش بالطول والعرض؟
المفاجئة إني مش شايفه شرير، وكان لازم عشان اعمله اشوف أن عنده حق، وكان بياخد حقه من خالوا عشان سرق ورثه.
كلمني عن تجربتك مع كريم فهمي و ريهام عبد الغفور و رشدي الشامي ؟
أنا مبسوط إني اشتغلت مع كريم فهمي بعد “سكر مر”، لأن بقالنا كذا سنه مشتغلناش مع بعض، اشتغلت مع ريهام عبد الغفور كتير بس للأسف متقبلناش غير في مشاهد قليلة، ومبسوط أننا تعاونا، أستاذ رشدي الشامي انبسط بالشغل معا جدًا، و أول مرة اتعرف عليه إنسانيًا، وهو محترم و مثقف و شاطر ومجتهد.
هل ستشارك في السباق الرمضاني المقبل ؟
لم أشارك في السباق الرمضاني المقبل، وكان نفسي يبقى عندي، وشايف إني أبقى برة رمضان أحسن، لأن رمضان بيبقى زحمة، خمسين واحد بيتفرج على خمسين مسلسل، المسلسلات مش بتتعمل كويس أوي وتنزل بره بتنجح أكتر من نزوله في رمضان.
تفضل العمل في رمضان أم خارج رمضان؟
أنا بحب العمل في رمضان وخارج رمضان، بس أنا بالنسبالي بره رمضان ببقى مبسوط أكتر لأننا بنخلص تصوير براحتنا، الشغل مخدوم كويس، مش الحلقة تبقي لسه مكتبتش، وفي مسلسلات كنا بنصورها الصبح وتتعرض بليل وده مش طبيعي في عُرف الشغلانة.
ما هو العمل الذي جذب انتباهك في الفترة الماضية؟
مسلسل “الليلة واللي فيها”، ده احلى مسلسل شاهد عملته في الفترة الأخيرة، لأنه كان معمول بدقة عالية، وزينة كانت بتمثل تمثيل “بوم”.
تفضل من بين رضوي الشربيني و ياسمين عز ؟
بدون نقاش أفضل ياسمين عز، وعلى فكره 95٪ من آراء ياسمين بتعجبني، وأنا مش شايف ان الست بتقول حاجة غلط، ممكن أوقات بتهزر في حاجات زيادة بس مبتقولش حاجة غلط أبدا.
ما هي أكثر الترندات المثيرة للجدل بالنسبالك؟
أنا مريح دماغي من موضوع الترندات مبحبش اوجع دماغي الصراحة.
ما هو رأيك في تقديم السيرة الذاتية للشيخ الشعراوي؟
أكيد السيرة الذاتية للشيخ الشعراوي موضوع مهم، اتقدمت قبل كده لكن أكيد هيقدمه برواية جديدة، وكل الناس ليها حرية اللي عايز يعمل شخصية الشيخ الشعراوي يعمل واللي عايز يعمل شخصية مايكل جاكسون يعمل، أنا معرفش ليه الهجوم في الموضوع ده.
