✍ياسر خالد
حل، أمس الثلاثاء، الموافق للـ21 من فبراير 2023، نجم الأهلي ومنتخب مصر السابق، والملقب بـ الحاوي، وليد سليمان ضيفًا مع الإعلامية المتألقة والفنانة القديرة إسعاد يونس ببرنامج صاحبة السعادة، والمذاع عبر شاشة فضائية dmc.
وتحدث الحاوي عن مسيرته الكروية، وكيفية انضمامه للنادي الأهلي، إلى جانب العديد من الأمور والمواقف، التي تخص حياته الكروية، وفيما يلي أبرز تصريحات وليد سليمان في صاحبة السعادة.
مش من هواة السوشيال ميديا
فعن تعامل الحاوي مع السوشيال ميديا، أوضح: “أنا مش من هواة السوشيال ميديا، وأخو زوجتي شادي هو اللي عمل لي الأكونتات على السوشيال ميديا، وأنا ما كنتش عاوز، بس هو قال لي لازم والدنيا كلها بقت كده”.
قلت لـ إمام عاشور أنت زي أخويّ الصغير
وحول خلافه مع إمام عاشور، لاعب الزمالك السابق وميتلاند الدنماركي الحالي، قال الحاوي: “موقف وعدا، وهو إمام تواصل مع لاعيبة كتير جدًا في المنتخب من عندنا في النادي، وكلمني واعتذر لي، وأنا قلت الموضوع انتهى، ومفيش أي حاجة، وأنت زي أخويّ الصغير، وجه في ماتش واعتذر لي، قلت له الموضوع انتهى خلاص، مفيش حاجة”.
الحاوي يكشف بدايته الكروية
أما عن بدايته الكروية، كشف سليمان: “ابتديت في مدرسة الكورة في بني مزار في المنيا لحد سن 15، وبعد كده رحت اختبارات الأهلي في أسيوط قي القوصيّة، ابن عمي عصام هو مخرج في قناة المنيا، قال لي في اختبارات الأهلي في القوصيّة، أنا عامل لك لي مفاجأة ولازم تيجي”.
وأضاف: “رحت الاختبارات كان وقتها الكابتن شطة والكابتن بدر رجب، وكان فيه مدرب أجنبي، ويومها كنت كويس، والناس كانوا مبسوطين بيّ، وقالوا لي خلاص أنت إن شاء الله تيجي لنا فرع النادي الأهلي في مدينة نصر، واستبعدوني علشان جسمي صغير”.
وأردف الحاوي: “التصفية النهائية، اللي بتبقى في مدينة نصر، ودي بترجع للراجل الأجنبي، كابتن بدر رجب للأمانة، هو والكابتن شطة اختاروني، لكن الراجل الأجنبي قال لأ هو جسمه صغير”.
وبخصوص رد فعله على رفضه في اختبارات الأهلي، قال: “عياط ومفيش أكل وزعلان، بس المدرب في البلد عندنا قال لي أنت لسه صغير، والعب واثبت للناس دي إنها غلط”.
وتابع سليمان: “اشتغلت واتمرنت، وبعدها جاء لي عرض من حرس الحدود، ناشئين حرس الحدود، كان الكابتن طارق العشري والكابتن محمود عطا، أول ما رحت لهم خمس دقايق وكانوا مختاريني، الحمد لله لعبت معاهم سنتين، وفي السنة الأولى اللي أنا رحتها اتصعدت درجة أولى مع كابتن حلمي طولان، ولعبت كام ماتش في الدوري الممتاز، كانت تقريبًا 2002″۔
وأكمل: “وبعدين رحت الجونة، لعبت سنة في الجونة، عملت موسم كويس جدًا في الجونة، وجاء لي عروض كتيرة جدًا، الأهلي، المقاولين، المصري والإسماعيلي، لدرجة إن صحابي هربوني في شنطة عربية بيجو سبعة راكب، عشان أروح الإسماعيلية أوقع للإسماعيلي”.
وواصل الحاوي: “رحت قابلت كابتن جعفر عزب، ورجعت حصل حاجة كده، وأنا ما كنتش مرتاح، قعدت مع الكابتن شوية، وقلت له لازم أمشي”.
جاء لي انهيار عصبي عشان ما وافقوش يودوني الأهلي
وعن انضمامه للأهلي، قال سليمان: “كنت بتواصل مع الكابتن عماد النحاس، هو من مغاغة من البلد عندنا، وقال لي الكابتن حسام البدري مقتنع بيك، بس الناس عايزين يشوفوك، الحمد لله كان عندنا ماتش في كاس مصر بين الجونة والاتحاد”.
وأشار: “في اليوم ده ماكتش فيه حد في الناحية الشمال سليم، كلهم كانوا مصابين، جاء الكابتن محمد عبد السميع قال لي أنت الوحيد اللي بالشمال، اللي ينفع تلعب في الحتة دي، وعملت يومها ماتش كويس جدًا، والأهلي كان عنده مشكلة في الباك الشمال”.
مضيفًا: “خلاص الأهلي كان هيخلص، وبعدين مستر مانويل جوزيه قال لأ، أنا ماجبش حد من الدرجة التانية ومانعرفوش، إحنا جبنا كذا حد قبل كده من الدرجة التانية وماكنش فيه توفيق”.
مستكملًا: “رحت بعد كده بتروجيت مع كابتن مختار، وعملت كذا موسم كويس، وكل سنة الأهلي بيطالب، طيب ما أنا كنت ببلاش في الجونة، وكل سنة كنت باخد وعود وأنا في بتروجيت إني هروح الأهلي، ولما أروح لرئيس الشركة يقول لي لأ مفيش”.
مردفًا: “لحدما في آخر سنة رحت لرئيس الشركة، فضلت عنده يوم كامل، كان رافض يقابلني، تعبت وجاء لي انهيار عصبي، ودخلت المستشفى، ولما فقت جاء ناس من الوزارة قالوا لي الوزير عايز يقابلك”.
وأتم الحاوي وليد سليمان: “رحت والوزير وعدني إنه هيوديني الأهلي، وقال لي أنا أهلاوي، بس العب سنة في إنبي، الخواجة مالدينوف عايزك، وأنا كنت لعبت معاه سنة في السعودية، لعبت سنة في إنبي وبعدها رحت الاهلي”.
