• سبب غيابي عن السينما قراري بأني لن أقدم أدوار نص نص.
• النجومية في وقت “يسرا، إلهام شاهين، ليلى علوي” كان ليها مقام مختلف.
• يسرا أنتمتي وجزء من قلبي وبنشتغل مع بعض عمياني.
• بحاول أركز في الكوميديا في حياتي عامة، حاجة ترفع من معنوياتنا شوية وتحسسنا بإحساس إيجابي.
• طول عمري كنت حابب أقدم شخصية خالد بن الوليد.
• عرض عليا تقديم شخصية عمر الشريف بما إني أشبه.
“تامر هجرس” فنان موهوب، له كاريزما خاصة، تألق في مجال عروض الأزياء، والتي كانت سببًا في دخوله عالم الفن، حيث استطاع أن يثبت موهبته من خلال مشاركته في العديد من الأعمال الفنية التي تعلق بها الجمهور والتي قدم من خلالها الأدوار المميزة، حيث قدم أدوارًا مختلفة، وشارك كبار نجوم ونجمات الفن وكبار المخرجين العديد من الأعمال السينمائية والتلفزيونية.
تألق الفنان “تامر هجرس” في الأعمال الدرامية والرومانسية، كما كان له بصمته الخاصة في الأكشن، ولكنه لم يكتفي بذلك وفاجئ جمهوره ومحبيه بمشاركته في الأعمال الكوميدية وتألقه ونجاحه الملفت بها.
قدم الفنانة “تامر هجرس” العديد من الأعمال السينمائية المميزة ومنها: “التجربة الدنماركية، الديزل، الحفلة، البلد دي فيها حكومة، ما تيجي نرقص، بركان الغضب”.
كما تألق في الأعمال التلفزيونية والتي كان منها: “أحلام سعيدة، بدل الحدوتة 3، مأمون وشركاه، باب الخلق، زي الورد، شربات لوز، خاص جدًا”.
ويشارك الفنان “تامر هجرس” في بطولة الفيلم الكوميدي”شوجر دادي” بطولة النجمة ليلى علوي ومن إخراج محمود كريم، ويعد الفيلم أولى تجارب “تامر” في الأعمال السينمائية الكوميدية، ومن المقرر عرضه في عيد الفطر المبارك.
وكان لمجلة هافن حوار خاص مع النجم تامر هجرس..
في البداية.. غبت عن السينما لمدة 4 سنوات، إحساسك ايه وأنت بترجع بفيلم “شوجر دادي”؟
غبت 3 سنوات؛ لأن لم يكن هناك أعمال عرضت عليا تستحق أن أشارك بها، فكنت مركز في التلفزيون أكتر، لأني قررت إني لن هقدم أعمال نص نص.
فيلم “شوجر دادي” به العديد من المواهب الكوميدية الجبارة.. حدثنا عن المواقف الكوميدية بالكواليس؟
الفيلم به “بيومي فؤاد، حمدي الميرغني، مصطفى غريب” لذاذ جدًا على طول بنضحك في الكواليس، دائمًا في ارتجال كتير، بنطلع بمواقف جديدة، والفيلم تجربة جديدة ولذيذة.
تعاونت مع “يسرا، إلهام شاهين، ليلى علوي” بتحس بأيه لما بتقف قدام نجمات سينما بالقوة دي؟
طبعًا ليا الحظ إني اتعاملت مع “يسرا، إلهام شاهين، مديحة يسري” ناس قوية وأسامي وعناصر أساسية في السينما المصرية.
ودلوقتي “ليلى علوي” وأنا دائمًا على علاقة بيها كويسة من زمان جدًا اتقابلنا في مهرجان دبي وبقينا أصدقاء من أول مقابلة، ودائمًا بتسأل عليا وصديقة عزيزة عليا جدًا.
إحساسي: بحس إن أنا قدام نجمة بجد، مع كل احترامي، النجومية في وقت “يسرا، إلهام شاهين، ليلى علوي” ليها طعم مختلف جدًا، وليها مقام مختلف السينما كانت في ليفيل تاني بالنسبة لنا، ماكناش بنشوفهم في السوشيال ميديا كتير زي ما بنشوف فنانين كتير دلوقتي، فإن أنا اشوفهم وأمثل قدامهم كنت بحس أن في حلم اتحقق ليا.
وكيف كان تعاونك الأول مع الفنانة “ليلى علوي” في فيلم “شوجر دادي”؟
أول مشهد مع “ليلى علوي” كان مشهد عميق شوية، ماكنش كوميديا جدًا وقتها، عندنا مواقف كوميدية كتير أوي في الفيلم لكن دا كان مشهد قوي جدًا، واخدنا فيه Takes كتيرة جدًا، وكل مرة كنت بشوف أن هي بتلاقي شخصيتها أكتر وأكتر، وبعد كده فجأتنا في الأخر بعد ما ظبطنا الإضاءة وكل حاجة، لقينا شخص آخر طلع فهي ممثلة بجد بمعنى الكلمة ف برافو.
دائمًا ما تحرص على التواجد بأعمال الفنانة يسرا، ما السبب وراء ذلك؟
يسرا أنتيمي، وجزء من قلبي، فإحنا لو في إمكانية إننا نشتغل مع بعض بنشتغل مع بعض عمياني، يسرا تكلمني “تبقى معايا” يبقى آه على طول مفيش تفكير.
“أحلام سعيدة، شوجر دادي” أعمال كوميدية، ما السبب وراء اتجاهك الكوميديا خلال هذه الفترة؟
أنا بحاول أركز في الكوميديا في حياتي عامة، حاجة ترفع من معنوياتنا شوية وتحسسنا بإحساس ايجابي جميل، بدل العك اللي بنشوفه كل يوم في الدنيا، فمهم أوي إننا نبقى بننشر سعادة وضحك وحاجات خفيفة أنا شايف أن دا مهم جدًا، أنا لو عليا أحب أقدم كوميدي أكتر.
وكيف استقبلت ردود فعل الجمهور على أعمالك الكوميدية؟
رد الفعل لما قدمت مع دنيا سمير غانم مسلسل “بدل الحدوتة 3” كان من أعلى نسبة مشاهدة المشاهد بتاعتي بالنسبة لأي حاجة تانية عملتها، فالنسبة لي الكوميديا ماشية تمام الحمدلله.
دائمًا في أعمالك السينمائية بتميل للأكشن، فيلم “شوجر دادي” أول فيلم كوميدي تشارك به، حدثنا عن هذه التجربة؟
بالفعل بميل للأكشن كتير بحكم شكلي بيتعرض عليا أكشن كتير، لكن أنا بحب الكوميديا والكوميديا أصعب بكتير جدًا فيها ارتجال كتير بس لازم الفنان يبقى مرتاح مع الكرو نفسه ورا الكاميرا ومع الكاست قدام الكاميرا علشان يقدر يطلع كل اللي يقدر يطلعه.
قدمت خلال مشوارك الفني العديد من الشخصيات المميزة، هل هناك شخصية تاريخية تتمنى تقديمها؟
أنا كنت طول عمري حابب أقدم شخصية “خالد ابن الوليد” ويبقى فيلم تاريخي، لأني إحنا تاريخنا قوي جدًا، ممكن أقدم شخصيات كتيرة جدًا بس أنا سمعت أن الفيلم دا بيتعمل أو هيتعمل بس ماليش حظ إن أنا اجسد الشخصية، بس لكن كان نفسي أعملها، بس أي شخصية تاريخية في الوقت دا أحب إني اجسدها في وقت ما.
وعرض عليا اني أقدم شخصية “عمر الشريف” بما أن أنا شبهه، وفي ناس بتشبهني بكتير بس اللي هيجي هيجي قضاء وقدر.
في حديثنا عن الأعمال التاريخية.. ما رأيك في تصريحات الإعلامية ياسمين عز وتشبيها للرجل المصري بالفرعون؟
أنا مش عارف تصريحاتها، بصراحة أنا ماتبعتش في مش عارف.
في النهاية.. ما الرسالة التي تحب أن توجهها لجمهورك؟
كل سنة وأنتم طيبين ورمضان كريم علينا كلنا يارب، وأتمنى لكم كل سعادة وكل يوم تعيشوه، عيشة جميلة وتعملوا ذكريات لطفية.
