✍🏻 هاجر زينهم
قامت بالمملكة العربية السعودية بتكريم الموسيقار الكبير هاني شنودة ، برئاسة تركي آل شيخ بعمل حفل بعنوان “ليلة ذكريات هاني شنودة” تكريمًا لأعماله الفنية الخالدة في أذهان الملايين، وتجمع نجوم ونجمات الفن والغناء من جميع أنحاء الوطن العربي، بالرياض.
وانفردت مجلة هافن بحوار مع الموسيقار الكبير هاني شنودة عقب رجوعه من السعودية أمس الخميس، وأليكم نص الحوار:
ما شعورك عندما قامت السعودية بتكريمك؟
أنا بشوف ناس كتير بتفتكر أن السعودية كرمتني ضد أي حاجة وده مش صحيح لأن أنا طول النهار والليل بتكرم، ولما بقابل الناس فرحانة باللي أنا بعمله وتقول لي اللي أنت عملته كويس وبرافو عليك أنك عملت كذا ده في حد ذاته تكريم، وأعلى تكريم أن كل موسيقيات بتاعتي مشهورة عند الناس في مصر وإذا جاء التكريم من برا مصر فـ ده تكريم للفن المصري وده شعوري اللي أقدر أوصفه وأنا على فكرة مقدرش أوصفه بكلمات لأن أعمق وأعلى من أي كلمات
ممكن تُقال.
كلمنا عن ترتيبات حفل ذكريات هاني شنودة؟
الناس في السعودية عارفين بيعملوا إيه بالضبط وإحنا إن شاء الله هيكون في بينا وبينهم تنافس ، وأنسي الفشل لأن هم كل حاجة مظبوطة الشعرة مفكرين فيها من شهور، إحنا إن شاء الله نعمل حفلة بكرا وربنا يسهل وربنا مش بيسهل غير للي بيعموا اللي عليهم ودول ناس بتوع تنظيم على أعلى مستوى من الدقة.
كيف كانت استعداداتك الخاصة للحفل الهائل ؟
الناس قالوا لي إحنا هنجيب كل اللي أنت أشتغلت معهم طبعًا ماعدا نجاة لأنها اعتزلت وفايزة أحمد لأنها توفيت، وأنا تفاجأت من القائمة اللي حضرت اللي منقدرش نجمعها في حتة وإزاي هما قادرين يعملوا ده وينظموا وقت معين بحيث يتوافق مع كل الناس، يعني محمد منير ربنا يعطي الصحة غنى وبليل كان كان بيأخذ الطيارة عشان كان عنده حفلة في السودان.
فـ أنا مش هتكلم عن التنظيم السعودي ولكن هكلمك عن معدن الأصيل بتاع الفنانيين المصريين لما يطلع عمرو دياب يقول أن هاني هو اللي وصلني لطريقي، ولما يطلع محمد منير يقول نفس الكلام ولما يجي عدوية وهو قاعد على كرسي متحرك ويحاول يغني حضوره ده عندي بالدنيا على فكرة المصريين دول عندهم معدن أصيل.
عمرو دياب فاجئ حضرتك بعبارات رائعة تحب توجه له رسالة؟
في أكتر من أن الهضبة يقول الكلمتين دول المفروض أنا ماردش عليه، لأني مش هقدر ألاقي كلام أرد عليه لا هو ولا منير ولا عدوية ومي فاروق ولا أنغام وهي مطربة هايلة وجاءت وغنت مع منير أنا بعشق البحر كانت حاجة في منتهى الجمال الحقيقة، وفرقة كايروكي اللي غنوا أغنية الشوارع حواديت من ألحاني ربنا يكرمهم يارب دول ناس متطوعين وجاءوا مخصوص عشان يجاملوا، ولا كل الناس اللي جاء الحفلة ومش عايز أنسى منى عزيز عشان جاءت من سويسرا مع زوجها عشان تغني في الحفلة، أنا مش هنسى الكلام ده دي حفلة لن تنسى بالنسبة لي أبدًا.
حدثنا عن تحدي حضرتك مع فيلم المشبوه ؟
فيلم المشبوه كان بعد فيلم ولا عزاء للستات لـ فاتن حمامة وده الباب الملكي لعبور الموسيقيات التصويرية فلما سمعه أستاذ سمير سيف قالي أنت دم جديد وحاجة جديدة وحاجة مسمعنهاش قبل كده، وأنا عايزك تعمل فيلم لـ عادل إمام اللي جاي بس حط عليا جملة شديدة الوطئة، قال لي عادل إمام هيغير لأول مرة من الكوميديا للأكشن فـ إذا مكنتش قد الأكشن قول لي عشان أجيب حد تاني، لأن الفيلم ده هيطلعه فوق أو هينزلوا تحت في رأيه هو،
قولت له بص إحنا هنعمل إتفاقية جينتل مان أنا هعمل التتر عجبك نكمل الفيلم ولو مش عجبك نرميه في الزبالة قالي ماشي.
وبالفعل عملنا التتر وسجلناه وهو أخده عشان يسمعه في البيت وبعد 3 أيام قال لي يلا نعمل الفيلم أنا النهاردة عرفت أنه هو سمعه لـ عادل إمام واتأخر عليا 3 أيام عشان يوافق أو يرفض، وأنا رجل حظيظ ومن حظي أني أشتغلت مع عادل إمام في أفلام كتير يعني أنا أكتر واحد تعاونت مع عادل، ومحظوظ أني قابلت عمرو دياب ومحمد منير وهما بيعتبروا نفسهم حظوظين وأنا بعتبر نفسي محظوظ لأني قابلتهم.
