حل المخرج كريم العدل ضيفًا لدى برنامج “أسرار النجوم” مع الإعلامية إنجي علي، على راديو نجوم إف إم، وخلال لقائه تحدث عن كواليس مسلسل “أزمة منتصف العمر”، وكواليس مسلسل “ريح المدام”، وكشف عن فيلم جديد مع الفنان أكرم حسني، وتحدث عن علاقته بوالده محمد العدل.
وترصد مجلة هافن أبرز تصريحات المخرج كريم العدل في برنامج “أسرار النجوم” على راديو نجوم إف إم.
●أي message في أي عمل موجودة، يعني مفيش فيلم أو project أو مسلسل أو اي حاجة أيًا كان مفيهوش رسالة هتوصلك حتى لو صناع العمل نفسهم مش قاصدين.
●أنا لما أجي أعمل فيلم عن حرامي، مش معنى كده أن أنا بقولك إسرق والرسالة هتيجى امتى في النهاية لما تشوف الراجل ده اتحبس ولا الراجل ده هرب بالفلوس وبقى مليونير وعاش برا..هنا الرسالة هتختلف، وانت بتحاول تشوف وجهة نظرك أنت كمخرج شايف الموضوع إزاى، وأنا مش شغلتي كصانع لفن إن أنا أقدم حلول..أنا بطرح مشكلة موجودة سواء في “أزمة منتصف العمر” أو غير “أزمة منتصف العمر”، حتى لو بتكلم فى حاجة جزء منها كبير خيال.
●انا بحب الكلام في النفسيات وهتلاقي ده موجود سواء في “أزمة منتصف العمر” أو “اسود فاتح” أو “ولد وبنت”، يعنى هتلاقى كل الحاجات هتلاقي فيها الجانب ال psychological اللي في الموضوع ده دايمًا اللي بيهمني “البني آدم”.
●إحنا كنا من الأول خالص في المعهد بندرس علم نفس، وانا والدتي دكتورة نفسية، فكنت أنا أصلا بحب المنطقة دي وبحب فكرة ان البني آدم بشكل عام أيًا كان مين هو لا يوجد على وجه الأرض بني آدم سوي..كلنا غير أسوياء بنسب متفاوتة.
●في “أزمة منتصف العمر” تحديدًا كنا بنحاول نشتغل على حتة إن سواء فرح أو ياسمين أو أيا كان الشخصية.. أنت بتبقي كرهاه جدًا وبتيجي في لحظة تانية تبقي حباه أو تفهمي على الأقل إيه اللي وصله لده، ودي كانت الفكرة الأساسية.
●الفكرة في علاقة الحب بين عمر وفيروز في “أزمة منتصف العمر” أن الناس خدت بالكلام اللي طلع من عمر، بس هو الحقيقة ان الموضوع مش قصة حب، أنا مش بعمل مسلسل رومانسي على الإطلاق..أنا عندي شخصية اسمها (عمر) مرت بحاجات كتير جدًا في حياتها وهو شخصية على مدار حتى المسلسل هتلاقيه شخص هارب..كل أما يقع في مشكلة بقول أنا همشي، وبالتالي هو لما قال بحبك لفيروز هو مش بيحبها بس هو شايف فيها البديل لأمه.
●هند عبد الحليم في “أزمة منتصف العمر” عملت دور أنا نفسي اتخضيت، وانا شايف ان هند ممثلة شاطرة وفاجئتني اكتر ما انا كنت متوقع بكتير، وعمر السعيد وش السعد، وهاجر عفيفي شاطرة جدًا ووشها مصري، وأنا اتبسطت بالشغل معاهم كلهم بصراحة.
●لولا أستاذ صادق الصباح وأستاذ أنور الصباح مكنش مشروع “أزمة منتصف العمر” طلع للنور.
●أنا أي فيلم أو مسلسل قبل ما اقرر اني أخرجه بقرأه كإني مشاهد أو كأنه كتاب أو رواية وبيبقا الموضوع بالنسبالي بسيط جدًا، ولو حسيت وانا بقرأ عايز أعرف إيه هيحصل خلاص أنا هعمل ده، ولو حسيت أن أنا هكمله بعدين كده بالنسبالي السكربت فيه مشكلة .
●الهجوم إحنا اتعودنا عليه، وأنا من وجهة نظري إن السوشيال ميديا أدت فرصة لناس عايزة تهاجم لمجرد الهجوم.
●إحنا أن شاء الله في فيلم بنحضر له دلوقتي كوميدي أنا وأكرم حسني، والكاتب أستاذ وائل عبد الله، وفكرة أكرم حسني ومحمد سامي، وأن شاء الله ربنا يكرمنا، وإحنا لسه في الأوائل يعني لسه بنظبط الاسكريبت.
●والدي محمد العدل أكيد نفسه في كل حاجة كويسة ليا، وانا علاقتي ب أبويا احنا صحاب أوي، وهو صريح جدًا معايا ولما مش بيعجبه حاجه يقولي، و”أزمة منتصف العمر” كانت بالنسباله أحسن حاجه أنا قدمتها..حس أن فيها نضج، وبيحب جدّا “ولد وبنت”.
●أكتر نجمة أحب أشتغل معاها الفنانة (منة شلبي)
●عايز في رمضان أتابع “الهرشة السابعة” وأشوف مسلسل منة شلبي ومسلسل منى ذكي..يعني في كذا مسلسل.
https://youtu.be/FiU_84SDWlA
آخر أعمال المخرج كريم العدل
مسلسل “أزمة منتصف العمر”، ويصنف عمل درامي، وشارك في بطولته كلا من: كريم فهمي، ريهام عبد الغفور، رنا رئيس، هند عبد الحليم، ركين سعد، عمر السعيد، ومن تأليف أيمن سليم، وإخراج كريم العدل.
