*بدارة تعتبر كبيرة الحرس لـ سيدة الأعراف
*اتبسطت إن إسلام خيري هو اللي طالبني وهو اللي عايزني وهو اللي حابب وجودي
*إسلام خيري سابني براحتي جدًا في أول يوم تصوير ليا
*إيمان السيد ممتعة واتبسطت إنها معايا
فنانة شابة متميزة، قدمت العديد من الأدوار الناجحة، تجيد تقديم الأدوار الكوميدية والتراجيدية بمنتهى البراعة، فهي تعد إحدى الفنانات الشابات المتميزات.
وتخوض، من خلال مسلسل جات سليمة، تجربةً دراميةً جديدةً، بالماراثون الرمضاني القادم، والذي يُعد أول عمل كوميدي لها في الدراما.
إنها الفنانة الشابة زينب العبد، والتي كان لنا معها هذا الحوار الممتع والشيق، حول دورها في جات سليمة، فإلى نص الحوار…
حدثيني عن دوركِ في جات سليمة.
أنا لسه نازلة على الهوا حقيقي، يعني لسه مكلمينّي هما بقالهم تلات أيام بيكلموني وأنا ماكنتش عارفة أظبط مواعيدي بينهم وبين حضرة العمدة، فكلموني وكنت لسه بتفق وحاجات زي كده، فحصل لي drop يعني إن كان النهاردة تصوير حضرة العمدة وبرضو جت سليمة، بس بصراحة أستاذ عادل أديب عفا عني، وخلاني أروح علشان أول علشان أتراكوَر وكده.
وما الشخصية التي تلعبينها في العمل؟
بعمل شخصية اسمها بدارة، وهي تعتبر كبيرة الحرس لـ سيدة الأعراف، يعني كبيرة الحرس لـ سلوى خطاب.
وهل الأحداث تدور داخل القصر؟
في القصر آه، لكن في المرحلة التانية أعتقد، يعني هو أنا مش عارفة، أنا لسه علشان أنا جديدة، فما قريتش المسلسل كله، فأنا بالظبط مستنية كمان إن هما يبعتوا لي، يعني أنا قريت شوية من دوري، لأن كان لازم أصور النهاردة، فأنا لسه ماتعمقتش أوي، بس اللي أنا عارفاه إنها كبيرة الحراس، ودراعها اليمين ومعاها دايمًا، ومعايا برضو أستاذة إيمان السيد، هي حاجة أنا مش عارفة المسميات لسه بتاعتهم، أنا لسه ماقريتش أوي بس قريت الحاجات، اللي ليها علاقة بدوري، بس أنا وإيمان المفروض اللي هما الكبار بتوع سيدة الأعراف، اللي هي سلوى خطاب.
تعودين بعد فترة إلى الكوميديا بعد تقديمك لأعمال اجتماعية أو لايت كوميدي أكثر كيف ترين ذلك؟
آه، يعني هو المسلسل كله كوميدي أكيد، وأنا مبسوطة كمان، علشان بصراحة أنا اعتذرت وبعدين رجعت تاني، أستاذ إسلام خيري بصراحة يعني أنا كان نفسي أشتغل معاه أوي.
وهل هذه هي المرة الأولى التي تعملان فيها معًا؟
آه، واتبسطت إنه هو اللي طالبني، هو اللي عايزني وهو اللي حابب وجودي، رغم إن فعلًا الظروف ماكنتش مواتية خالص إني أنزل معاه، بس هو بصراحة فضل مصّر لحدما الدنيا ظبطت.
وما هو شعوركِ خاصةً وأنكِ لم تقدمي اللون الكوميدي منذ فترة؟
أنا دايمًا بلعب كوميدي في المسرح، بس في الفيديو بلعب لايت أوي، فأنا بالنسبة لي في مسلسل كوميدي، فعندي المساحات، اللي تخليني أقول، وأستاذ إسلام سايبني بصراحة، اللي هو أول يوم كان إمبارح كان أول مشهد، فسابني براحتي جدًا، بالعكس لطيف أوي.
وإلى متى ستستمرين في التصوير؟
هما أكيد مصورين من بدري، أنا لسه علشان الدور بتاعي تقريبًا أنا وأستاذة إيمان لسه طالع طازة، فكان أول يوم بالنسبة لي إمبارح.
وكيف وجدتِ تجربتكِ مع الفنانة إيمان السيد؟
ممتعة، أنا اتبسطت إن إيمان السيد معايا، اللي هو لو مش هعمل كوميديا أنا هقعد أضحك، بجد فظيعة أنا بحبها، إحنا اشتغلنا مع بعض مسرحية، بس اتقابلنا بقى في الفيديو إمبارح، فبجد أنا بقيت سعيدة، اللي هو حتى أنا كنت مترددة شوية، بس إيمان السيد وجودها اداني باور كبير.
وهل أنتِ في جعفر العمدة مع الفنان محمد رمضان؟
لأ، حضرة العمدة، لا مش في جعفر العمدة، ده كان إفيه في الفيديو.
