*لا أحرص على حاجة معينة أنا الدور الحلو اللي بحبه بعمله
*أول حاجة جذبتني لـ ساحر النساء الورق والورق كله على بعضه حلو أوي والمجموعة كلها حلوة
*عندي فيلم عين حورس لسه بنكمله وهو فيلم كبير أوي وفيه مجموعة كبيرة من الفنانين
*مفيش حاجة اسمها موسم شتوي وموسم رمضان والعمل الحلو بيفرض نفسه
*الدور اللي كان نفسي أعمله عالمة الذرة المصرية سميرة موسى
*ممكن مشروع سميرة موسى يتعمل بعد رحيل سمير سيف ويا ريت نبيّن الناس الكويسة في تاريخ مصر
*نور الشريف علمني قيمة الثقافة بالنسبة للممثل وكان دايمًا يقول إن الممثل لازم يتعلم طول الوقت
*ببقى سعيدة جدًا لما حد يقول لي إني فتاة أحلامه وبسمع الكلام ده في السوشيال ميديا لحد دلوقتي
أقيم مساء الخميس، 16 مارس 2023، العرض الخاص لفيلم ساحر النساء بأحد الفنادق الكبرى بالقاهرة، وذلك بحضور عدد من أبطال الفيلم وصناعه.
حيث حضر كل من النجمة ندى بسيوني، المخرج أحمد عيّاد الرشيدي، راندا البحيري، حلمي فودة، المؤلف محمد مكي، جهاد عصام، نيجار محمد والبلوجر هلا سمير، وذلك من أجل الاحتفال بعرض فيلمهم الجديد.
وعلى هامش العرض الخاص لـ ساحر النساء، التقت مجلة هاڨن بالنجمة ندى بسيوني، وكان لنا معها هذا الحوار الممتع والشيق حول تجربتها في الفيلم، فإلى نص الحوار…
ساحر النساء به قدر من الرومانسية فهل تحرص ندى بسيوني على أن يكون هناك مساحة من الرومانسية في أعمالها؟
لا، أنا لا أحرص على حاجة معينة، أنا الدور الحلو، اللي بحبه بعمله، أما بالنسبة للفيلم بتاعنا ساحر النساء، فهو رومانسي صوفي روحاني اجتماعي، يعني هو خلطة.
وما هو أكثر شيء يميز هذا الفيلم وجذبكِ لتقديمه؟
أول حاجة الورق، الورق مش دوري لوحده، الورق كله على بعضه حلو أوي، والمجموعة كلها حلوة.
تعودين للسينما بعد فيلم آخر ورقة أليس كذلك؟
لأ، أنا عندي حاجات تانية، فيه عين حورس لسه بنكمله، فيلم كبير أوي وفيه مجموعة كبيرة من الفنانين، وعاملة دور جديد خالص شرير جدًا، فـ لأ يعني فيه حاجات تانية.
لكِ أفلام معينة في السينما ليست كثيرةً ولكنها مميزة فكيف تختارين أعمالكِ السينمائية؟
لازم أحس بالحاجة وأحبها، اللي بحسه وبحبه بعمله.
آخر أعمالكِ كان مسلسل أعمل إيه فكيف ترين الأعمال البعيدة عن رمضان التي تعرض في الموسم الشتوي؟
مفيش حاجة اسمها كده، العمل الحلو بيفرض نفسه.
دوركِ في أعمل إيه قمتِ فيه بتغيير جلدكِ بعض الشيء حيث كان به قدر من الشر فكيف ترين ذلك؟
لأ، ما هو عادي أنا بعمل شر، أنا خريجة أكاديمية دارسة وفاهمة، يعني بعمل كل الأدوار.
وما هو أكثر دور تطمحين لتقديمه؟
هو أنا الدور، اللي كان نفسي أعمله عالمة الذرة المصرية سميرة موسى.
اسم هذا المشروع كان مرتبطًا بـ المخرج الراحل دكتور سمير سيف فهل يمكن تقديم الفيلم بعد رحيله؟
آه طبعًا، هو ممكن يتعمل، ويا ريت نبيّن الناس الكويسة في تاريخ مصر، العلماء اللي عملوا حاجات وإنجازات العالم كله بيشهد لها، لازم نرجع تاني للقدوة.
ما هو الأصعب بالنسبة لكِ تقديم البرامج أم التمثيل؟
لأ طبعًا التمثيل، أصل إنك تبقى مذيع ده جزء من التمثيل، لكن المذيع مالوش علاقة بتمثيل الأدوار المختلفة، لكن المذيع كأنك بتعمل دور مذيع.
وبالنسبة للتمثيل هل التمثيل في الإذاعة أصعب أم في التليفزيون؟
لأ التمثيل مفيش أصعب وأسهل، كل التمثيل حاجة واحدة.
وقفتِ أمام العملاق نور الشريف مرتين في المسرح والسينما في عيش الغراب فحدثيني عن نور الشريف.
عايزة أقول لك إن الأستاذ نور الشريف غير إني مثلت معاه، هو علمني قيمة الثقافة بالنسبة للممثل، كان دايمًا يقول إن الممثل لازم يتعلم طول الوقت، كلما هتتعلم أكتر كلما هتبقى أعمق.
بماذا تشعرين عندما يقابلكِ أحد ويقول لكِ أنكِ فتاة أحلامه في فترة هوانم جاردن سيتي والفجالة؟
هو أنا بسمع الكلام ده كتير طبعًا وببقى سعيدة جدًا بيه في الحقيقة، وفي السوشيال ميديا كلها لحد دلوقتي بسمع الكلام ده.
