*ريهام عبدالغفور كانت بتتعرف علينا و تشجعنا وتباركلنا على شغلنا ودايمًا بتدعمنا على عكس ناس تانية
*مروة أنور حبيت الشغل معاها كانت لذيذة جدًا
فنان شاب موهوب إستطاع بموهبته وكاريزمته وتألقه أن يلفت نظر المخرج أحمد حسن له أثناء تواجده في أحد عروض معهد الفنون المسرحية، ليساعده الحظ ويختاره في مسلسله الجديد، ليكون بداية إنطلاقه في مجال الفن، ومن خلاله إستطاع أن يجذب أنظار الجمهور إليه وحظى بقاعدة جماهيرية كبيرة، فمن خلال دوره إستطاع بصدق مشاعره وإتقانه أن يجسد مشاعر كثيرة يعاني منها الشباب، إنه الفنان المتألق محمد صلاح، وكان لمجلة هافن حوار معه ليحدثنا عن تفاصيل دخوله مجال الفن وأعماله القادمة.
كيف بدأت دخولك لمجال الفن؟
كان بسبب إن شخصيتي إنطوائية فبدأت أشوف حاجة تكسر ده وأقدر أواجه الناس وأتعامل معاهم وأكسر الحاجز اللي بيني وبين الناس، وأقدر أعبر عن مشاعري بشكل كويس وملقتش أنسب من ده فبدأت أخد ورش تمثيل من ساعتها حبيت الموضوع جدًا وبعدها بدأت أشتغل مسرح لفترة والموضوع كان بشكل مكثف جدًا اللي هو كنت بشتغل على طول ومأخدتش راحة في النص إتعرفت على ناس صحابي بيعملوا مسرح و إشتغلت معاهم وقدمت في معهد فنون مسرحية لأن لقيت إن ده المكان الأنسب ومتخصص، قدمت في أول سنة متقبلتش وبعدها كملت زي ما كنت في الأول زي ما بدأت فكرة الورش وبعدها قدمت السنة التانية وإتقبلت وكان بيدربني على التقديم السنة التانية محمد هاني في الورشى المجانية، ومن وقتها وأنا شغال في المعهد الموضوع بقى متخصص أكتر بقي في معلومات أكتر وبقي في إحتكاك بناس خبرتها أكبر في الموضوع، وأنا بقالي سنة في المعهد وبقيت في تانية دلوقتي .. اللي كان سبب في دوري في مسلسل الأصلي نشاط عندنا اسمه “المهرجان العالمي” ساعتها كنت شغال في عرض الافتتاح مع مخرجة إسمها أسماء إمام، وكان بيحضر الإفتتاح المخرج أحمد حسن والمؤلف أمين جمال و “الكاستينج دايركتور” محمد نبيل كنت علي المسرح في العرض وأستاذ أحمد لما شافني عرفت أنه كان مركز معايا جدًا وكان بيقول عليا شاطر وبعد ما خلصت العرض قال للأستاذ محمد نبيل أنا عايز الولد ده فنبيل بلغني وأنا أتبسط وكنت مستنيه يكلمني وده حصل فعلًا .
كيف كان إنطباعك حينما قرأت شخصية أدهم؟
لما روحت الشركة في اليوم الأستاذ أحمد حسن كلمني فيه بدأ يكلمني عن الشخصية فـ إتبسط إنها هتكون قريبة مني شوية فهيكون لامس مشاعري أكتر والمشاكل اللي بيمر بيها أدهم في المسلسل بالنسبة 90% من الشباب اللي في سني تعرضولها، فكرة أنهم بيدخلوا في علاقة عاطفية تكون مش ناضجة ومش قادر تسيطر عليها بشكل كويس عشان خبرتك في الموضوع ده صغيرة و أنت لسة سنك صغير فكلنا كشباب واجهنا المشاكل دي.
هل واجهت صعوبات أثناء تصوير مشاهدك في مسلسل الأصلي؟
لأ، أنا كنت فعلًا خايف من ده في الأول واللي هو يا ترى الناس في اللوكيشين ومساعدين الإخراج والكرو كله هيكون لطيف ولا لأ والدنيا هتبقي حلوة ولا لأ فكان الموضوع عكس ما توقعت تمامًا .. كنت قلقان في أول يوم بس بعد تاني يوم الموضوع إختلف وبقى كل الناس صحابي وده بفضل أحمد حسن كان بياخدني ويفضل يعرفني بالناس وعلى النجوم ويقولهم ده محمد صلاح ده شاطر جدًا و طأنا بتنبأله بحاجات كتير حلوة فكسر حاجات كتير بسبب اللي كان بيعملوا ده فطلع أي رهبة مني.
كيف كان تعاونك مع الفنانة ريهام عبدالغفور و إيناس كامل؟
أستاذة ريهام عبدالغفور دي سكر ورغم إني مليش مشاهد معاها بس لما كنا بنتجمع في مشاهد عيلة في لوكيشن واحد وتتعرف علينا وتفضل تشجعنا وتباركلنا على شغلنا ودايمًا بتدعمنا وكانت لطيفة معانا جدًا، وأستاذة إيناس كامل أول يوم إتقابلت معاها في اللوكيشن أول ما شافتني المشهد لما الحرامي خبطني فكنت على الأرض وحطنلي دم بيظبطوا المشهد، فـ هى طلعت قبل ما نصوره وقالتلي يا حبيبي يابني عملوا فيك إيه وفضلت تهزر وكده فكانت جميلة جدًا واتبسطت بالشغل معاها، الحمدلله الكرو كله كان جميل أوي.
كيف كانت تجربتك مع المخرج أحمد حسن والمؤلف أمين جمال؟
إستفدت منهم طبعًا، و أنا كنت بتعامل مع أحمد حسن كأخ مش مخرج وهو دايمًا بيقولي بحسك إبني ومبسوط من شغلك وأتمنى إن يفضل اللقب والشعور ده دائم ونشتغل مع بعض كتير وكنت لما بيقف معايا حاجة بروح أساله وبيوجهني، أما أستاذ أمين للأسف متقابلناش كتير بس كان دايمًا بيشجعني و يدعمني قبل عرض المسلسل و بعده أنا وكل صحابي في المعهد.
كيف كانت تجربتك مع مروة أنور؟
مروة طلعت لذيذة جدًا فوق ما أنا تخيلت، وحبيت الشغل معاها و عشان هى كانت قبل مني في المجال كانت بتساعدني في شغلي وتشجعني ونقعد نذاكر سوا.
هل شخصية أدهم قريبة من شخصية محمد صلاح في الواقع ؟
في الحياة الإجتماعية لا ولكن في المشاكل اللي بيمر بيها كـ شاب آه لكن ردود أفعال أدهم غير ردود افعالي تمامًا، يعني أدهم دايمًا كان عنده إحتياج للعلاقة دي و مسالم دايمًا ومفيش حد في حياته غير آية و علاقته بمامته و زوجها مش أحسن حاجة فمفيش قدامه غير آية بيحبها ودي مشكلة إن لو الشخص ملقاش المشاعر دي جوا بيته بيتجه أنه يدور عليها برا أيًا كان بقي الشخص ده مناسب ولا لأ.
ما هو أصعب مشهد لك في الأصلي ؟
أنا كنت بتعامل معاهم إن كلهم صعبين حتى لو مشهد صغير فكانوا كلهم مهمين.
كيف ترى ردود الأفعال على أدهم عبر مواقع التواصل الإجتماعي؟
حلوة جدًا، أنا مكنتش متوقع بصراحة من بعد الحلقة ال ـ12 الناس بقت تعرفني في الشارع والمسلسل الحمدلله حقق نجاح كبير، و كان برضو الجمهور الأول و الأخير، وأهلي قدرت أقولهم إن أنا شاطر، وكانت فرحتهم وتشجيعهم بالنسبة لي مهم، فكرة إن أهلك وأصحابك بيدعموك خصوصًا في البداية بيكون كافي.
من دعمك في خوض تجربة التمثيل؟
في البداية مكنش في حد، بل بالعكس كان في إنتقاد للموضوع في البداية بس بركز فيه، وده برضو مهم جدًا إن إنت متكنش مستني الدعم في الأول عشان بنسبة كبيرة مش هتلاقيه فـ إنت إنجح الأول وهتلاقى الدعم بعدها.
من هو مثلك الأعلى في مجال التمثيل؟
أنا بحب ناس كتير جدًا وبتعلم منهم كلهم بالنسبة لي مهمين أوي بس بحب، كريم عبدالعزيز،ماجد الكدواني، خالد الصاوي، منى ذكي، ريهام عبدالغفور ،محمد ممدوح، محمد فراج، مكي، أحمد حلمي.
بدايتك كانت على خشبة المسرح، فـ هل محمد صلاح يميل للأعمال الدرامية أم المسرح؟
الإتنين لهم المتعة بتاعتهم الخاصة والإتنين منطقتين مهمين جدًا والممثل مبيقدرش يستغنى عنهم، بس المسرح ميزته إنك بتأخد النتيجة في وقتها فبيكون الموضوع حي أكتر، والسينما والدراما ليهم متعة برضو كبيرة منقدرش نستغنى عنهم.
هل هناك شخصية تتمنى أن تقدمها؟
مفيش حاجة محددة حاسس إني عايز أجرب كل الشخصيات وأقدم شخصيات مختلفة.
وجه رسالة لأي شخص لديه شغف تجاه الفن و لم يأخذ الفرصة المناسبة؟
طبيعي إن يجي وقت للشخص يفقد الشغف وأنا شخصيًا مريت بالفترة دي، بس لازم الشخص يواجه الفترة دي ويقنع نفسه إنه هينجح ويكون مؤمن بموهبته وميكنش مستعجل، ويكون متأكد إنه هيقدر يثبت نفسه حتى لو كان مفيش دعم من حد وبعد ما يحقق أهدافه هيلاقي الدعم من كل الناس وفكرتهم هتتغير تمامًا، فأيًا كان الكلام اللي بيتقال هيختلف بس المهم يكون مصدق نفسه و مصدق إنه بيعمل حاجة مهمة ويقدر يعمل ده لأن مفيش حاجة مستحيلة، والأهم بقى من الكلام ده ثقته في ربنا اللي ملهاش حدود.
ما هى الرسالة التي تحب أن توجهها لجمهورك؟
شكرًا لكل حد قالي كلمه حلوة وفرحني، حقيقي كل الكلام اللي بيتبعتلي كل يوم والكلام اللي بيتقالي من الناس في الشارع بيفرحني جدا جدا.
ما هي أعمالك القادمة؟
دور صغير كده في مسلسل حضرة العمدة بطوله روبي في رمضان، و فيلم “ما بعد الجنون ” بطولة محمود حميدة وشيرين رضا، والإتنين من إخراج أستاذ “عادل اديب”والإتنين صورتهم قبل مسلسل الأصلي، بس لسة لم يتم عرضهم.
