حواراتفن

خاص ل “هاڤن”.. صبحي خليل: “بقدم شخصية جديدة عليا في جميلة وعبد الرازق في المداح أصبح كينج الوكالة”

✍️ نجلاء علاء الدين

تحرص مجلة هاڤن بشكل دائم على التواصل مع أبرز النجوم المشاركين في السباق الرمضاني، ليكشفوا لنا بشكل حصري عن أدوارهم وأعمالهم ضمن قائمة مسلسلات رمضان 2023، وضمت هذه القائمة الجزء الثالث من مسلسل المداح الذي يحمل اسم أسطورة العشق، والذي ينتظره الجمهور من كل عام، فهو عمل جديد على الدراما المصرية تدور أحداثه في إطار مشوق حول السحر والشعوذة.

وتواصلت المجلة مع النجم صبحي خليل صاحب شخصية عبد الرازق في مسلسل المداح، وكشف لنا خليل عن التغيرات التي حدثت على شخصيته في العمل، كما أعلن عن دوره في مسلسل جميلة برفقة النجمة ريهام حجاج.

حدثنا عن كواليس عمل الجزء الثالث للمداح مع نجوم المسلسل ؟

-أساس نجاح الجزء الأول والتاني في المداح هو الحالة الجميلة الموجودة في كواليس المسلسل واللي صنعها رقم واحد المخرج الجميل الأستاذ أحمد سمير فرج ودائمًا في تهريج وحاجات بتحصل في النص وبنسأل على بعض دائمًا وفي حالة حب بين فريق العمل.

هل تتوقع أن يكون المداح “أسطورة العشق” حصان الرهان هذا الموسم ؟

-بنجتهد في الحاجة اللي بنعملها دائمًا والمشكلة أننا بنختلف عن كل المسلسلات التانية إن إحنا لينا رصيد عند الجمهور من خلال الجزئين اللي فاتوا فبنبقي خايفين أكتر من المسلسلات التانية لأنها بتبقى عمل من أول وجديد إنما إحنا عندنا جزئين محققين نجاح ونتمنى الجزء التالت ينجح زي اللي فاتوا.

“الله وكيل إحنا عايشين وسط بهايم” جملة عقلت مع الجمهور في الجزء الماضي، هل سنشاهد ارتجال جديد ممتع مثل ذلك في الجزء القادم؟

-جملة لازقة في أذن الجمهور وتخرج عن إطارها لأن حتى كل الطاقم وإحنا بنصور هنا عايزين يسمعوا “الله وكيل إحنا عايشين مع بهايم”.

هل توقعت أن تعلق تلك الجملة مع الجماهير وتصبح تريند ؟

-صبحي خليل من الممثلين اللي بيشتغلو وخلاص وبيقول يارب وبيعمل اللي عليه والتوفيق ده بتاع ربنا، دائمًا بختار لكل شخصية كده لازمة زي مسلسل حبيشة “ابن حلال” كان عندي لازمة أنا اللي عاملها اللي هي “حلاوتك ياحبيشة”.

هل اختلفت شخصية عبدالرزاق في هذا الجزء عن الجزئين الماضيين ؟

-هو بقي صاحب الوكالة بقي اللي قاعد في الوكالة الكينج بتاع الوكالة فنضف شوية وغير من شكله لكن لسه طموحه محدود.

ما رأيك في تجربة التعاون مع حمادة هلال؟

-حمادة أخويا وحبيبي ووشنا حلو على بعض، ودائمًا الجمهور بيقول أنت وحمادة دائمًا بتنجحوا رغم أني مشتغلتش مع حمادة غير فيلم “حلم العمر” ومسلسل “المداح” وبالرغم من ذلك الجمهور بيقول أن نجحنا سوا.

هل تفضل عرض المسلسلات خلال السباق الرمضاني أم خارج السباق ؟

-رمضان هيظل له زهوته وكثافة مشاهدته العالية لكن دلوقتي بعد وجود منصات كتير جداً بقى في مسلسلات بتتشاف كويس جدًا، الممثل بينبسط أكتر لما عمله بيجي في شهر رمضان لأن نسب المشاهدة بتكون أعلى.

ما أصعب المشاهد التي قدمتها في المداح ؟

مفيش أصعب وأقل كل المشاهد بتأخذ نفس الجو والاهتمام عشان تقدري تعملي حاجة اسمها في عرف التمثيل “مياه واحدة “.

هل واجهتك عواقب أثناء تصوير العمل ؟

-لا خالص مفيش صعوبات لأن الحتة بتاعتنا أنا وخالد سرحان واخدين المسلسل للحتة الكوميدي شوية فبالتالي إحنا اللي بنعمل البسمة في المسلسل ده.

لماذا أطلق على هذا الجزء اسم أسطورة العشق؟

هو من بدري أسطورة العشق من الجزئين اللي فاتو ولكن في منه إمتداد تاني عشان الأسطورة دي تستمر، وممكن نشوف جزء رابع من المسلسل.

ما هي الرسالة التي تحب أن توجه إلى المشاهدين؟

-أقول لجمهور المداح هتستمعوا بالجزء التالت ده وذهنكوا هيقعد يفكر وده أحسن من أنكم تتوقعوا الحلقات زي ما بيحصل مع بعض المسلسلات الأخرى.

هل قدمت أدوار من أجل المال؟

  • الفلوس آخر حاجة عندي، عندي رصيد نجاح واحترام كبير عند الجمهور بحافظ عليه ومقدرش أتخلى عنه أبدًا في سبيل إغراء مادي.

ما رأيك في الأعمال التي تتناول موضوعات جرئية؟

-الدراما دراما في أي وقت وفي أي مكان، ومبحبش الدراما اللي بتخدش حيائنا وتدخل بيوتنا.

ما هي الأعمال التي تنوي متابعتها في رمضان؟

-أنا مشاهد رديء جدًا ومبشوفش نفسي في المينتور خالص ولا حتى في الإذاعة، ولو أتفرجت مش هيعجبني نفسي، ودي ميزة وعيب في نفس الوقت، ميزة أنك متتغريش بنفسك وعيب أنك لو أتفرجتي هتفضلي مش حابة نفسك وحاسة إن عندك أفضل.

ما هي أعمالك في رمضان بجانب مسلسل المداح؟

عندي مسلسل تاني في رمضان مسلسل ” جميلة ” للنجمة ريهام حجاج وعامل دور متميز اوغي اللي هو “رجب داغ” شخصية كبيرة في السن ودي حاجة جديدة عليا شوية وأنا عاملها بشكل كويس الحمدلله وأتمنى لها النجاح وإن الجمهور يتقبلني في السن اللي بلعبه ده.

كيف تم اختيارك إلى مسلسل جميلة؟

  • الترشيح جاء من ريهام حجاج نفسها كلمت المخرج تامر عبدالعزيز وتمت الموافقة، صورنا كتير تقريبًا اقتربنا من النهايات وعلى نصف رمضان نكون خلصنا المسلسل.

ما رأيك في الانتقادات التي تتعرض لها بعض الأعمال فور طرح البوستر الرسمي؟

  • مبحبش الاستعجال، لازم الجمهور يستنى أما يتفرج الأول وبعدين يحكم، الجمهور ذكي ويقدر يقيم مسلسل من أول خمس حلقات، لا يمكن للجمهور مشاهدة كل المسلسلات لذلك هناك صراع بين المسلسلات وده في صالح الجمهور.

هل تفضل أن تشارك في السباق الرمضاني بأكثر من عمل؟

-لا حلو أوي كده عشان منبقاش تقال على الناس، رغم أن السنة اللي فاتت كان ليا أربع أعمال بيتعرضوا في رمضان والأربعة أعمال نجحوا السنة دي ليا عملين فقط لكن الحمد لله الرزق بيجي زي ما ربنا موزعه.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!