انضم الممثل الشاب محمد توبة إلى فريق عمل مسلسل “حضرة العمدة” وإستطاع محمد أن يلفت أنظار الجميع وحقق الكثير من النجاحات على خشبة المسرح وله العديد من الأعمال من ضمنهم مسرحية 101 عزل.
وكان لمجله هافن حوارا خاصًا معه للكشف عن شخصيته بالمسلسل ومن رشحه لتلك الشخصية.
في البداية عرفنا بنفسك من هو محمد توبة؟
أنا إسمي محمد توبة، طالب في المعهد العالي للفنون المسرحية، وبمثل مسرح من وأنا صغير بدأت اتنقل من مرحلة الهواة للاحتراف من حوالي 8 سنين وده تقريبا تاني أو تالت حاجة في الميديا.
كيف جاء ترشيحك للمشاركة في العمل بمسلسل حضرة العمدة؟
الإختيار وقع من الأستاذ عادل أديب نفسه وده لما كنت متواجد في مقر شركة فنون مصر.
حدثنا عن كواليس تحضير الشخصية؟
أنا بجسد شخصية صريطي ده خد معايا شوية معايشة حلوة، صريطي ده كان بالنسبالي حد تافه جدا وعبيط وهو بالفعل لسة عيل صغير سنًا وعقًلا، لكن هو طول الوقت شايف نفسه كبير وراجل وناضج وكل تصرفاته نابعة من فكرة أنه عاوز يثبت أنه جامد.
رأيك في الكواليس مع فريق عمل مسلسل حضرة العمدة؟
مش مجرد كلام، بس أنا عايز أقولك ان كل الناس بتقول الجملة دي نصًا “هو إحنا هنعمل إيه بعد المسلسل ” لأن الناس فعلا كونوا علاقات صداقة قوية ومترابطة بعيدًا عن الشغل، حتى يعني من ضمن الحاجات اللي كانت بتتقال على سبيل الضحك من أحد اصدقائنا في الإنتاج كان بيقول ” اللوكيشن بدأ يحب بعضه وده خطر” بس كان بيهزر وقتها، هي حقيقي جدا كانت كواليس جميلة جدًا خصوصًا معايا أنا لأن الكواليس مع معظم النجوم كانت حلوة وفريندلي جدا زي الأساتذة ادوارد ومحمد محمود عبدالعزيز واحمد بدير ومحمد مهران ومحمود حافظ ودينا وبسمة بصراحة كواليس كلها حب وضحك.
ماذا عن العمل مع الفنانة روبي أثناء التصوير؟
روبي فعلا إنسانة جميلة ولطيفة لأبعد الحدود ومن الناس اللي مكنتش بسمع صوتهم غير وقت الشغل مع إنها نجمة العمل لكن فعلا هدوئها وطاقتها كانوا طول الوقت حلوين ومحلينها أكتر ما هى حلوة.
هل لك أعمال على خشبة المسرح؟
أيوه طبعا زي ما قولت قبل كدا أنا شغال مسرح من وأنا صغير وطبعا فيه عدد عروض مسرحيات أنا مش فاكرها، لكن أبرزهم وآخرها كانت مسرحية 101 عزل انتاج البيت الفني للمسرح فرقة المواجهة والتجوال إخراج محمد درويش.
من هو الفنان الذي تود العمل معه؟
ناس كتير جدًا الحقيقة من ضمنهم الدكتور يحيى الفخراني وطبعا أستاذ عادل إمام ربنا يديهم الصحة، والأساتذة آسر ياسين كريم عبدالعزيز حنان مطاوع ريهام عبدالغفور وناس كتير بجد.
ما هى الأدوار التي تتمنى أن تجسدها
أنا بحب التمثيل كل دور وليه تفاصيله وانت بتذاكرله وبتعمله history ، لكن بميل أكتر اني أعمل الأدوار المُرّكبة والسيكو أكتر.
المخرج له دور في نجاح الممثل؟
طبعا وأستاذ عادل أديب معروف عنه الاهتمام بالممثل جدا خصوصا إن أستاذ عادل بالذات مخرج متمرس ومتعدد الثقافات ودا بحكم شغله كمخرج برة مصر زي انجلترا وتركيا فالبتالي بيبقى مهم بالنسباله أوي الممثل يكون فاهم كل جملة بيقولها
يعني انا فاكر في بداية البروفات كانت أكتر جملة دايما يكررها خصوصا للمثلين الشباب ان التمثيل “الكلام المكتوب” ولكن هو الsub title “المعنى المراد بيه الكلام”.
