استضافت الإعلامية بسمة وهبة الفنانة لوسي في برنامج العرافة، الذي يعرض عبر شاشة النهار.
وكشفت الفنانة لوسي عن تفاصيل ما حدث لها في كواليس مسلسل ” المداح 3″ أسطورة العشق، حيث تقوم بدور الجنية هند بنت الأحمر فقالت: “روحنا نصور في الفيوم وعملت ميكب وهلبس اللبس بتاع الجنية وأروح للفيلا بتاعت صابر والدنيا حر وقبل أن أدخل على اللوكيشن بتلات أربع دقائق لقيت المخرج بيقولي أرجع الأوتيل وفي عاصفة فظيعة والشجر بيخبط في بعضه ودخلت لقيت رموش إلى أنا مركباها بتطير من الهوى والجو صعب والهوا كان هيطيرني ومصورتش”.
وتابعت: “الجنية هند بنت الأحمر بتلعب معايا أنا واخدة اسمها وكل حاجة وقريت عنها كتير عشان وهند بنت الأحمر موجودة معايا وبتلازمني في الحقيقة كمان مش في المداح أسطورة العشق بس برغم إنها تحت الأرض، أنا بقول المشهد من هنا وبقرأ قرآن من هنا وبحلف بالله إنها معايا وبتلمسني”
وأضافت: “في جن طيب وجن شرير وعشان أعمل الدور ده في المداح كان لازم أعرف شكلهم إيه ولازم أشوف الطلاسم والطقوس وكل حاجة وربنا بيسلط الجن الطيب علينا عشان يساعدنا وأنا ذاكرت الست هند بنت الأحمر لأن مبعملش دور من جنسي أنا بعمل دور من جنس الخفاء، بيحصل لي حاجات غريبة أوي وبحس أن في حاجة بتلمسني ولكن عشان بقرأ قرآن وبصلي الموضوع بيبقى مختلف وربنا بيحافظني”.
لوسي تتحدث عن رأي ابنها في عملها كراقصة:
أشارت الفنانة لوسي إلى أن ابنها فتحي ينظر لمهنة الرقص الشرقي، أنه “فن محترم”، وقالت: “بيقول لي هزي كويس، وده معناه إنك لما تشتغلي أي حاجة بتركيز وجد، عشان تنجحي، وتربية فتحي وثقافته بالفن عارف أن الفن محترم، ولما قال لي هزي كويس، تعبيره أني أشتغل بتركيز وجدية وبذمة عشان أنجح، فتحي بيحب الهزار”.
وتابعت لوسي: “فتحي عنده ثقافة مختلفة وتربية مختلفة وبيلعب مزيكا، وطالما فكرتي تخلفي يا تربيه كويس وبما يرضي ربنا يا متجيبش أطفال، ابني مصري ابن مصرية جدعة، فتحي بيحط علم مصر على ظهره وينتخب رئيس الجمهورية، أنجبته في أمريكا لأن أمي ماتت ومات توأم لي في بطني بمصر، كنت بروح للدكتور ميعرفش إني حامل في توأم وأنهم متوفين بقالهم أسبوعين وكنت بموت وعملت عملية واكتشفت إن في جسمي سم، وحزنت عليهم، ولما توفت أمي بحثت على أم لي، فذهبت إلى أمريكا حيث كانت أختي تعيش هناك”.
وأشارت لوسي إلى أن أصحاب نجلها فتحي، يحبونها ويطلبون أن ترقص في أعياد ميلادهم، وذويهم يعتبروها صديقة للعائلة، فقالت: “بيشدوني وأرقص، كل أصحاب ابني أولاد وبنات صحابي، أنا صاحبة العائلة، كلهم بيحبوا يتعرفوا عليا، وبيقولوا فخورين بإن ده ابنك عشان متربي وجدع وشهم”.
