حواراتفن

جوري بكر لـ “هافن”: “مشهد البطحة في جعفر العمدة جاب لي ارتجاج ومحمد رمضان وش الخير عليا”

✍️شهد شاهين

فنانة صاعدة قدمت العديد من الشخصيات بشكل مبدع، مما لفتت إليها الأنظار ومن أهم أدوارها كانت من خلال مسلسل “لؤلؤ، البرنس، قواعد الطلاق الـ 45، ليه لأ، الفرح فرحنا، ورانيا وسكينة”، استطاعت أن تحجز مقعدها في الدراما الرمضانية، وهذا العام نجدها من خلال مسلسل جعفر العمدة بطولة النجم محمد رمضان.

وبما أن مجلة هافن تحرص دائمًا على التواصل مع كافة النجوم الذين حققوا نجاحات كبيرة، تواصلت أيضّا مع النجمة جوري بكر لتكشف لكم عن تفاصيل كثيرة في مشاركتها الرمضانية هذا العام.. وإليكم نص الحوار كالآتي:

كيف جاء ترشيحك لدور وداد في مسلسل “جعفر العمدة”؟

أستاذ محمد سامي هو اللي كلمني، بس قال لي إن أستاذة مي عمر هي اللي رشحتني ومبسوطة جدًا إن هي ساعدتني إن أنا أكون موجودة في المسلسل.

ما الذي جذبك لقبول الدور؟

عجبني جدًا علشان هو مش شبه شخصيتي في الحقيقة خالص بصراحة فعشان كده وافقت به وأنا دائمًا بحب اختار أدوار مختلفة.

كيف كان التعاون مع الفنان أحمد فهيم ؟

يعني تقريبًا من أجمل الممثلين اللي أنا حرفيًا وقفت قدامهم، لأن بسببه وبسبب إن هو كان هادئ معايا وكان مريحني في التمثيل ماكنش مضايقني عارفة اللي هو من الناس أول ماتشوفيه وترتاحي وتشتغلي معاهم متحسيش إن هو حد تقيل كده وتبقي مش قادرة تتطلعي الموهبة اللي جواكي، فهو ساعدني فعلاً بجد إني أنا أطلعها.

كيف كانت كواليس تصوير مسلسل جعفر العمدة؟

الكواليس كانت جميلة جدًا بس كان فيها أيام ما يعلم بها إلا ربنا، حرفيًا كنا مضغوطين جدًا أنا تعبت أوي كنا بنشتغل 18 ساعة و20 ساعة وفي يوم صورنا فيه 24 ساعة، أنا بروح بيتي بوصل اللوكيشن 12 بطلع من التصوير الساعة 8 الصبح فأتعبني نفسيًا وجسديًا.

ماهي الصعوبات التي واجهتك أثناء تصوير المسلسل؟

إن إحنا مكناش بنام أنا حرفيًا لا كنت بنام ولا كنت بأكل أنا في يوم كان عندي مشهد أغمى عليا في التصوير، كنت في الكرفان ونقلوني المستشفى وشركة الإنتاج راحت جابتني من هناك يعني كنت تعبانة كنت تعبانة ومن قلة الأكل ومن قلة النوم ومن الحاجات دي كلها أغمى عليا مكنتش خلاص قادرة أستوعب أي حاجة بتحصل حواليا.

ماذا أضافت شخصية وداد للفنانة جوري؟

إن الجمهور شافني والجمهور عرفني من بعد 14 سنة أنا في الميديا ومن بعد ما عملت “لؤلؤ، البرنس، وقواعد الطلاق ال 45، ليه لأ، الفرح فرحنا، ورانيا وسكينة”، يعني تخيلوا بعد كل المسلسلات دي ربنا يجبر بخاطرك من بعد البرنس الجمهور يرجع يفتكرني تاني ويعرف إن أنا الشخص اللي عملت المسلسل ده الحمد لله إن ربنا جبر بخاطري بعد تعب 14 سنة.

كيف كان العمل مع الفنان محمد رمضان؟

يعني مش قادرة أوصف لك قد إيه هو إنسان جميل ومتواضع وكان بيساعدنا في الشغل وكان بيساعدني جدًا، وكان بيقول لي إزاي أطلع المشهد ده كويس وكان دائمًا يعني يجي جنبي ونتكلم ويقول لأ لازم تعمليه كده أعمليه بالطريقة دي هتبقي كويسة زشاطرة، وهو يتنبأ لي إن أنا هكسر الدنيا وتنبأ بالضجة اللي حصلت دي وبشكره جدًا من كل قلبي وسعيدة إن أنا لتاني مرة بشتغل معاه في مسلسل وأبقى وش الخير ونبقي وش الخير على بعض.

كيف حضرتي نفسك لمشهد “البطحة”؟

والله عايزة أقولك إن أنا اليوم ده جالي ارتجاج، الناس بتحسب إن الشبشب الاي كنت ماسكاه في أيدي ده خفيف، لكن ده كان بلاستيك والكعب ناشف جدًا والمشهد تم إعادته أكتر من ست سبع مرات، وقعدت أضرب نفسي جامد عشان المشهد يبان حقيقي وفعلًا رأسي وجعتني.

من مثلك الأعلى في التمثيل؟

هما ناس كتير وبلاش أقول اسم معين عشان محدش يزعل مني.

فنان أو فنانة تتمني العمل معهم في الفترة القادمة؟

يعني مي عز الدين، غادة عبد الرازق، مني زكي، ومنة شلبي، يعني أنا شغلوني مع مني زكي ومنة شلبي نفسي أدخل معاهم أعمال، وكمان كريم عبد العزيز، أحمد السقا، أحمد عز، أمير كرارة دي من الناس الجميلة اللي بجد نفسي أمثل معاهم وطبعًا بقى الأساتذة الكبار زي عادل إمام أو أستاذ يحيي الفخراني يا سلام.

ما رأيك في السباق الرمضاني لهذا العام؟

مقدرش أحكم عشان أنا في مسلسل فأنا هتبقى شهادتي مجروحة، وهيقولك دي بتنحاز لمسلسلها وكل الناس اللي اشتغلت في رمضان السنة دي كتر ألف خيرهم الناس بجد تعبت إن إحنا كنا بنصور في الشتاء اللي فات وكان الوضع سيء جدًا في مصر والجو ما يعلم بيه إلا ربنا.

من مكتشف موهبتك في الفن؟

والله أنا من زمان بمثل وبعمل إعلانات وكليبات من أيام ما كنت عايشة في دبي، بس يعني اللي أكتشفني هو الأستاذ محمد سامي وهو اللي طلعني في البرنس.

ماذا تفضلي بين تجربة المسلسلات الـ ١٥ أم الـ 30 حلقة؟

والله على حسب المسلسل بس يعني أنا ممكن الفترة الجاية أحب أعمل حاجة خمسة أو 15 حلقة لأن الـ ٣٠ دي مهلكة أوي بس بردو جميلة.

هل مواقع التواصل الاجتماعي لها فائدة في مجال التمثيل أم لا؟

أكيد طبعًا مواقع التواصل الاجتماعي دي مهمة جدًا هو ده الجمهور بتاعك الحقيقي اللي بقي موجود في الشارع، زمان كان الشارع دلوقتي بقى الشارع والسوشيال ميديا فمن غيرهم الفنان مالوش أي قيمة من غير وسائل التواصل الاجتماعى، من غير السوشيال ميديا من غير الناس اللي بتعملي كومنت وشير الممثل مالوش أي قيمة من غير الجمهور، إحنا حرفيًا كممثلين لا قيمة لنا من غير الجمهور بتاعنا.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!