تشارك النجمة مي سليم في السباق الرمضاني لعام 2023، من خلال مسلسل “تلت التلاتة”، التي تقوم ببطولته برفقة النجمة غادة عبد الرازق، ويتألف العمل من 15 حلقة فقط، وتم عرض أولى حلقاته في النصف الثاني من شهر رمضان، وبعد عرض أولى حلقات العمل أشاد الجمهور بأداء مي سليم الذي خطف أنظار المتابعين.
وظهرت مي سليم في دور سمر التي تقع في عشق رجل متزوج، ومع تتابع الأحداث تكتشف زوجة عشيقها الخيانة وتطلب منها قتلها، وأبدعت مي سليم في هذا الدور وجعلت الجمهور ينتظر عرض الحلقات المقبلة من أجل مشاهدة تألقها، لذلك حرصت مجلة “هاڤن” على التواصل معها للكشف عن كواليس العمل، وجاء نص الحوار على النحو التالي:
كيف جاء ترشيحك لمسلسل تلت التلاتة؟
ترشيحي جاء من النجمة غادة عبد الرازق إحنا اشتغلنا قبل كده مع بعض في “لحم غزال”، وهي كلمتني وقالت لي مي عندي دور مش شايفة حد تاني خالص في الدور ده، وانبسطنا وأرتحنا جدًا في الشغل مع بعض.
وقالت لي أنا جت لي ترشيحات كتير للدور لكن مش شايفة حد غيرك في الدور وعايزاكي معايا، فانا انبسطت جدًا بالمكالمة دي وأنا أصلا بحب غادة وبحب اشتغل معاها، مع أني شايفة أن المشاهد هنا مختلفة عن “لحم غزال”، يعني “لحم غزال” كنا إحنا الاتنين صحاب وقرايبين من بعض، ولكن هنا حاجة مختلفة تمامًا وهي حبت أننا نقدم تجربة جديدة سوا.
حديثنا عن كواليس العمل وأجواء التصوير هل كانت متعبة؟
مش متعبة خالص لما بتبقي بتشتغلي مع ناس بتحبيهم أوي مبيبقاش في تعب، الكيمياء بيني وبين غادة وأستاذ هيثم مدير التصوير والأستاذ حسن صالح أول مرة نشتغل مع بعض فكانت الأجواء حلوة ومريحة وكل واحد عارف هيعمل إيه ومذاكرين كويس والورق جميل وسلس مفيش فيه عواقب الحمدلله.
هل هناك مشهد أرهقك في التحضير أو تم إعادة تصويره أكثر من مرة؟
يمكن المشاهد اللي بيني وبين غادة في مشهد في الحلقة الخامسة أرهقنا أنا وغادة أوي.
من وجهة نظرك.. لماذا تقبل المرأة أن تدخل في علاقة مع رجل متزوج؟
-أنتي هتشوفي الشخصية دي ليه عملت كدة، هي عندها أسباب وشايفة أن معندهاش اختيارات غير أنها تعمل كده.
إذا كنتي مكان غادة عبد الرازق كيف تتصرفين مع زوجك بعد معرفة خيانته لكي؟
-زي اللي عملته بالضبط، هطرده بشنطة هدومه برا البيت.
ما وجه الشبه بين شخصيتك في مسلسل “تلت التلاتة” وشخصيتك الحقيقة؟
ولا أي حاجة مفيش نسبة تشابه ولا بنسبة 1% حتى، يمكن الشبه الوحيد هو حبها لأهلها والتضحية من أجلهم.
هل تخوفتي من ردود الأفعال حول شخصيتك في مسلسل “تلت التلاتة”؟
مبحبش أعمل الحاجات كلها شبه بعض مبحبش أعمل الطيبة كلها على طول ولا الشريرة على طول، بحب أكون متنوعة في أدواري وماكنتش قلقانة لأني بذلت مجهود في التحضير للشخصية، أنا مابجسدش شخصية مي سليم أنا بجسد نماذج كتير أوي.
هل تتابع مي سليم آراء الجمهور عبر مواقع التواصل الاجتماعي؟ وكيف ترد على الانتقادات؟
آه أنا منبهرة، وماكنتش متوقعة أن ردود الفعل تكون بالشكل الجميل ده، وبحترم النقد البناء جدًا ولو في نقد يستاهل أن الواحد يأخذ باله منه فـ ليه لأ؟، لكن في نقد وتنمر مالوش أي لازمة فـ بتلاشاه خالص.
ما هو رأيك ف المسلسلات الـ 15 حلقة بدل من الـ 30 حلقة وأيهما تفضلين؟
-أحسن حاجة حصلت في السباق الرمضاني هي مسلسلات الـ 15حلقة، الأحداث فيها مشدودة والرتم سريع، أنا شايفها أنها واقعية جدًا عن الـ 30 حلقة.
هل توقعتي خروج مسلسل “السجل الأسود” من المنافسة الرمضانية لعام 2023؟
-مسلسل “السجل الأسود” خرج لأسباب فنية، لأنه يحتاج إلى وقت كافي وشغل وتركيز.
قبل خروج “السجل الأسود” من المنافسة الرمضانية.. هل بدأتي التصوير فيه؟
-بالفعل بدأنا التصوير، وهنستأنف التصوير بعد العيد، والمسلسل سيعرض خارج الموسم الرمضاني لعام 2024.
ما هو الدور التي تمنيت أن تقدميه في الفترة المقبلة؟ وهل تقبلي تقديم أدوار أكثر جراءة؟
-أي دور ماكنش قدمته قبل كده.
أي نوع من التمثيل تفضلين الكوميدي أم الدرامي أم الرومانسية أم الأكشن؟
-بفضل كل الأدوار، لو كل شخصية مختلفة عن التانية هيكون أفضل.
هل تقلقين من الظهور في البرامج مثل “العرافة”؟
-مبفضلش الظهور فيها، وحتى برامج المقالب بسبب أن في حاجات صعبة جدًا، وأنا معنديش حاجة أخجل أو أخاف منها كل حاجة واضحة وصريحة، ولكن مبفضلش الظهور في هذه البرامج.
من وجهة نظرك.. هل أسئلة بسمة وهبة صعبة أم سهلة؟
-هي صعبة للي هو حاسس أنها صعبة عليه، ولكن أنا ماكنتش صعبة عليا لأني معنديش حاجة أخجل منها.
هل فارق السن هو السبب الوحيد في رفض ارتباطك بلاعب النادي الأهلي؟
-مش عشان فارق السن، بس ماكنش في توافق فكري، وأنا معنديش مانع أن يكون اتنين في بينهم فرق سن المهم يكون في توافق.
هل تقبلي التعاون من جديد مع محمد رجب أو لوسي؟
-طبعا أقبل التعاون معاهم لأني بحبهم جدًا، وأنا ولوسي بقينا أصحاب جدًا، الفكرة أنها كانت بتحب ميس أكتر مني.
إذا طلبت منك ابنتك الدخول إلى عالم التمثيل هل هتقبلين؟ وما هي النصيحة التي تحبي أن تقديمها لها؟
-أوافق، ونصيحتي لها أن مهنة التمثيل مرهقة للأعصاب.
هل سنشاهد مي سليم في السينما خلال موسم عيد الفطر المبارك؟
-عندي فيلم “كابتن جاك” هيتعرض في العيد الكبير، وفيلم “التاروت” ولسه باقي في يوم هيتصور بعد رمضان، وعلى صعيد الدراما عندي “السجل الأسود”، وفي كذا حاجة بقرأها حاليًا.
ما رأيك في تجربة دراما المنصات؟ وهل تقبلين تقديم أدوار جريئة؟
-كويسة جدًا، وموضوع الخمس حلقات حلو، هي بتقدم أفكار موجودة في المجتمع، وبرضو بتكون على حسب الفكرة اللي بتقديمها، ولو الدور مناسب ليا هقدمه.
هل تجهز مي سليم في الوقت الحالي لعمل غنائي؟
-أن شاء الله في الصيف على شهر 6 هيكون عندي أغنية سينجل.
