حققت النجمة هلا السعيد نجاح ساحق من خلال شخصية “هبة” التي قدمتها في مسلسل “المداح 3″، حيث استطاعت أن تجذب الجمهور لها من خلال مشاهدها، وتقمصت دور المرأة الممسوسة بجدارة، مما جعل الجميع يشيد بأدائها وصدق مشاعرها، لذلك حرصت مجلة “هاڤن” على التواصل معها من أجل الكشف عن كواليس العمل، وجاء نص الحوار على النحو التالي:
ما سر انجذابك للمشاركة في مسلسل “المداح” ؟
سر انجذابي للمسلسل في الجزء التاني كان أول حاجة أنه إخراج أستاذ أحمد سمير فرج، تاني حاجة أن الجزء الأول كان ناجح نجاح كبير وله جمهور وشعبية كبيرة، ثالث حاجة أن دور هبة كان حلو جدًا وعجبني وجديد عليا عمري ما قدمته قبل كده، وكان دور محير والناس مش عارفة هي طيبة ولا شريرة ومؤثرة في الأحداث ودي نوعية الأدوار اللي تشد أي ممثل.
هل تخوفتي من تقديم جزء ثالث من مسلسل “المداح 3″؟
تخوفت من الدور مش من الجزء الثالث، لأن المسلسل نجح نجاح كبير جدًا في الجزء التاني، والناس كانت في انتظار الجزء الجديد، لكن تخوفت من الدور لأنه مختلف وفي شعرة بين الناس تصدقك وأنت تبقى fake ومش طبيعي والناس تشوف أن الشخصية مش حقيقية وهي شعرة بسيطة عشان كده كنت خايفة جدًا.
هل تعرضتي لمواقف مخيفة أثناء التصوير؟
في مشهد في الغرفه والمفروض أني كنت بسمع أصوات وبعد ما خلصت المشهد ده جالي panic attack، وفضلت أعيط ومنهارة أكتر من نص ساعة وكل الكرو بيحاولوا يهدوني وأنا مش عارفة إيه اللي حصل لي لحد دلوقتي وفضلوا يقرأوا عليا قرآن.
ما هو أصعب مشهد بالنسبة لكي؟ وما أكثر مشهد أرهقك في تحضيره؟
أصعب مشهد كان مشهد القسم عند زيارة صابر، لأن المشهد كان أول مرة يبان تحول الشخصية للممسوسة بالشكل ده، ومن الضعف وعدم تصديقها لقتل والدتها إلى تحولها للشيطان أو الممسوسة.
هل جلستي مع شخصية ممسوسة في الحقيقة من أجل تقمص هذا الدور؟
جلست مع مداح حقيقي وحكى لي كل التفاصيل اللي بتحصل مع الشخص الممسوس ونظراتهم وجسمهم وكل تفاصيل، وكان المفروض أحضر جلسة لكن كان لازم نبدأ تصوير المسلسل.
هل أثرت شخصيتك في مسلسل المداح عليكي نفسيًا؟
أثرت عليا نفسيًا جدًا وتعبتني أوي خصوصًا فكرة قتل الأم، لأنه إحساس كان صعب استحضره حاجة كان جسمي ومخي رافض يتخيلها، ده غير تفكيري في تقديم المشاهد اللي فيها مس كنت بحلم بكوابيس بقالى كذا شهر وبخاف لو النور مطفي، ده غير أن بقالي فترة نفسيًا ماكنتش مظبوطة سواء مع أهلي في البيت أو صحابي.
من وجهة نظرك.. هل سيتم تقديم أجزاء أخرى من مسلسل المداح؟
مسلسل المداح يتحمل أجزاء أخرى لأن الكتابة والإخراج الحقيقة مش محسسنا كمشاهدين بأي ملل، وتحس أن كل سنة هو مسلسل جديد بكل تفاصيل مفيش حاجة شبه السنة اللي فاتت كتير والقصص اللي زي كده مابتخلصش ومش هتخلص.
حدثينا عن تجربتك مع فريق العمل وخصوصًا حمادة هلال؟
كل فريق العمل عبارة عن أسرة وعائلة واحدة وخلاص بقينا عيلة بجد، وحمادة طيب ومهذب وذو أخلاق عالية ودمه خفيف طول الوقت بيهزر ويضحك.
