شارك النجم تامر شلتوت في السباق الرمضاني لعام 2023، من خلال مسلسل المداح 3 “أسطورة العشق” والذي جسد فيه دور جن، كما شارك في مسلسل الكتيبة 101 والذي جسد فيه دور إرهابي، وحقق شلتوت نجاح هائل من خلال العملين، وأصبح حديث السوشيال ميديا منذ أن تم عرضهما.
حرصت مجلة “هاڤن” على التواصل مع تامر من أجل الكشف عن كواليس مسلسل المداح وردود الأفعال التي تلقاها من الجمهور عقب تجسيد شخصيتين مختلفتان عن بعضهم البعض، وجاء نص الحوار على النحو التالي:
ما سبب تواجد شخصية عماد في الجزء الثالث ررغم حرقها في الجزء الثاني من مسلسل المداح؟
-شخصية عماد هى من الشخصيات اللي اتبنت على مدار سنتين في المداح، والحمدلله الشخصية اتعرفت، وحقق حالة من النجاح مع المشاهدين، عشان كده تاني سنة قالوا عماد لازم يكون له دور أكبر، وتاني سنة اكتشفوا أن عماد باع نفسه للجن، هو بني آدم بيجي على هدف الانتقام، بيخسر نفسه، ولكن في الآخر كان طيب و استسلم وكفر عن ذنبه.
بعد تجسيدك لشخصيتين في مسلسل المداح..فما الفرق بين شخصية وليد وشخصية عماد؟
-وليد هو بني آدم أخد فرصة تانية، وحاول يستغل الفرصة التانية إلى آخر لحظة عشان أعرف أخد حقي و اكفر عن ذنبي، وده اللي قاله، عشان كده وليد كان لازم يظهر غير عماد خالص، وليد شخص قوي جاي بهدف معين، معندوش أي نوع من أنواع الانانية، هو شخص عايز يحقق نجاح و يكفر عن ذنبه، أما شخصية عماد هو شخص عايز يحقق مكاسب مادية وحزين وزعلان على وفاة والده.
ما بين شخصية وليد و عماد..ما هى الشخصية الأقرب إلى تامر شلتوت؟
-الشخصية الأقرب ليا هو وليد، لأن وليد عنده هدف واضح، وعنده إمكانيات وإغراءت مستسلمش ليها، حافظ على الهوية اللي خسرها عماد، حتى ملكة الجن قالتله لو سبتني هتخسر قالها انتي اللي هتندمي لانه خلاص عرف اتعلم من الزمن.
حدثنا عن النجمة بسمة ماهر والتي جسدت دور زوجتك على مدار أجزاء مسلسل المداح؟
-بسمة ماهر زوجتي، انا عملتلها سحر في الجزء التاني واتأذت بسببي، وعلى صعيد التعاون وشنا كان في وش بعض، وبقى عندنا علاقة حلوة وأصبحنا اخوات، بقالنا تلت سنين بنمثل أننا متجوزين، فكان في ود والكواليس كانت حلوة جدا.
ماذا عن علاقتك بالنجم حمادة هلال؟
-حمادة هلال هو أخ والعلاقة مكنتش بتختصر على المداح احنا طول السنة بنتكلم، وبنقعد نفكر هيطلع مسلسل المداح ازاي، أجمل حاجة حصلت ليا في مسلسل المداح اني كسبت حمادة هلال كـ اخ، كل التفاصيل اللي كانت في المشاهد بنا فيها انسانيات اكتر ما فيها تمثيل، كل المشاهد اللي فيها شر بنطلع روس بعض، عجبتني كلمة كذوب اكتر من كداب اللي قالهالي، عندنا علاقة متوازية قدام الكاميرا ناس وبره الكاميرا ناس.
ما هي الصعوبات التي واجهتك في الجزء التالت من مسلسل المداح؟
_أصعب شئ هو وليد في الجزء التالت، لأنه كان محتاج تركيز، رغم أن عماد تصويره كان اكتر، عماد انا اتبهدلت في تصويره، لكن وليد كان في ضغط اعصاب رهيب، عشان انتي بانية علي كاركتر ناجح.
ماذا عن رد فعل النجوم والجماهير حينما نشرت البوستر الخاص بك من الجزء الثالث لمسلسل المداح؟
-كمية نجوم علقوا على البوستر لما نزل “عماد رجع تاني ازاي ده اتحرق”، الناس كانت متوقعة أن عماد اتحرق وكل مشهد كان محتاج تركيز كويس جدا عشان تقولي للناس لا في حاجة وراء وليد، الجزء النفسي اصعب من التمثيل.
في حالة عمل جزء رابع من مسلسل المداح..بأي شخصية منهم ستكمل الأحداث ؟
-هما بيتكلموا علي جزء رابع بس مش عارف ممكن توصل لاي، وبيتهيالي لو كملت هكون بشخصية وليد، لانه مع الشيطان والجن.
ماذا عن ردود أفعال الجمهور في الشارع؟ وما أغرب موقف تعرضت له بسبب شخصيتك في مسلسل المداح؟
-حلوة فكرة الجن الطيب وكواليسها في الشارع كوميديا، كنت بعمل دور يستفز الناس ولما بيقبلوني في الشارع يكلموني على اساس بني آدم، دلوقتي وانا بعمل عمرة الناس بقت فكراني بجد جن، مخرج تونسي أول ما شافني في الطواف في السعي قال “اعوذه بالله” قعدت اضحك، الراجل صدق والناس صدقت.
حدثنا عن المشاهد التي جمعتك مع النجمة لوسي؟ وهل تخوفت من أدائها في المداح؟
-شفت كوميكس على لوسي عشان التاج وشايف ان احنا شعب دمه خفيف بنقعد نضحك على أي حاجة بس معلش انا مثلت مشهد قدام لوسي هى ممثلة شاطرة قدرت في المشهد تروح لطبقتين، طبقة بتهددني، وطبقة بتجلبني براحة، وتغير صوتها في المشهد ده خضني، بجانب بعد الميكاب والتصوير كانت تخوف، وبليل مع الإضاءة المنظر كان يخوف، ولوسي عاملة دور هند حلو جدا، وسهر الصايغ كانت عاملة دور حلو السنة اللي فاتت.
تامر شلتوت يتحدث عن دوره في مسلسل الكتيبة 101
ماذا عن شعورك حينما تم ترشيحك لمسلسل الكتيبة 101؟ وما هو الدور التي تمنيت تجسيده؟
-أنا كنت مبسوط جدا بالمسلسل وكان نفسي اكون في عمل وطني جدا، وكان نفسي اكون ارهابي، لأن هنا الدور هيكون أصعب، لو طالع في دور ضابط من الضباط اللي راحوا من أجل الوطن هيكون في تعاطف، وجزء كبير هيكون قلبك علي الشخصية، ولكن دور الإرهابي عايزة توصلي رسالة الناس مشفتهاش كتير، شافت الناتج على الوطن، ولكن مشفنهمش وهما بيخطبوا، مشفنهمش وهما بيقولوا اقتل ده واعمل ده لان ده بيستفز اي ممثل.
هل واجهت صعوبات أثناء مشاركتك في مسلسل الكتيبة 101؟
-انبسط جدا اني اترشحت للدور ده، تصويره كان صعب خالص، لانك بتصوري في واقع موازي، بتمشي في شوارع مبنية بشكل كامل مع عربية مفخخة بتفرقع جنبك الموضوع كان موتر جدا، وتجهيز أبو زيد كان صعب وكنت يقعد ساعتين اركب الدقن عشان تطلع بالشكل ده، وبعدين ميكاب ويكحل عيني واللبس وبعدين تقعدي في اللوكيشن، وكل التجهيزات كانت صعبة.
ما هي الأعمال التي تحضر لها في الفترة المقبلة؟
-مسلسل أوف سيزون هنبدأ تصوير بعد رمضان.
تامر شلتوت يتحدث عن الأعمال الخيرية و يشكر هؤلاء النجوم
حدثنا عن الأعمال الخيرية التي تقوم بها؟
-أنا بحب عمل الخير، ربنا ادانا شهرة ونجاح و قبول عند الناس يبقي لازم نستخدمها صح، نستخدمها عشان نفيد ناس، مثال مالك طلعنا لايف عشان نجمع مليون جنية، لو طلعتي لايف وانتي عندك ملايين المتابعين وكل واحد دفع جنية المشكلة هتتحل، لانه عنده ضمور عضلات يعني لو مخدش علاجه ممكن يبقي قاعيد أو يفقد حياته، واللايف مش صعب وفي نجوم كتير بيعملوا كده.
هل يتعاون معاك النجوم في الأعمال الخيرية؟
-كان في حالة عليا و فريدة محتاجين 80 مليون جنية، حمادة هلال جه معايا، دينا فواد، أحمد صلاح حسني، نهال عنبر، رانيا فريد شوقي، كل النجوم مبيتاخروش، احنا شغالين و خدامين للناس.
