تقاريرفن

يسرا: “بعمل مسلسل بره رمضان وبقدم شخصية شريرة في شقو”

حلت النجمة يسرا وفريق عمل مسلسلها الرمضاني 1000 حمد الله على السلامة ضيوفًا مع الإعلامي رامي رضوان بحلقة الأمس من برنامج مساء dmc، في حلقة خاصة بمناسبة عيد الفطر المبارك.

وخلال الحوار كشفت يسرا عن استعدادها لتقديم عمل درامي خارج السباق الرمضاني، وأن ذلك سيكون قريبًا جدًا، لكنها رفضت الكشف ملامح دورها فيه.

ووجه رامي رضوان سؤالًا لـ يسرا عن إمكانية تقديمها لعمل درامي خارج رمضان، لتجيب يسرا: “آه بعمل قريب جدًا”، وعن ملامح دورها فيه، رفضت يسرا الكشف عنها، قائلةً: “على الدور لسه، بس أنا ناوية أعمل ده بره رمضان، ده بلا شك إن شاء الله”.

يسرا: “أنا مع المسلسلات الـ15 حلقة جدًا”

أما عن رأيها في تجربة المسلسلات الـ15 حلقةً، قالت يسرا: “أنا مع الكلام ده جدًا، ولو تفتكر زمان إحنا كنا بنعمل كده، كنا بنعمل 15 وكنا بنعمل 32 حلقة وكنا بنوصل لـ34 حلقة، وفيه جزء 10 حلقات وفيه جزء 20 حلقة، فكل ده اتعمل قبل كده، أنت كله بيرجع تاني، فأنا مش ضد ده كمان”.

وأضافت، مؤكدةً على رأي رامي: “الصح إنه إدي العمل المساحة، اللي هو يستحقها، لا تزود فيه ولا تضغطه، علشان لما تضغطه كمان بتحس إنه اتلكلك، إيه ده عايز تخلص؟، علشان هما لازم يبقوا 15 أو أنت ملحقتش تخلص في الـ25، فأنت لازم تخلص في آخر 5 حلقات، أنت فاهم قصدي؟، فدايمًا بتبقى فيه الحتة دي”.

يسرا: “طالعة في شقو ضيفة شرف بس شريرة جدًا”

وفاجأت يسرا جمهورها بأنها ستم دورًا شريرًا في فيلم شقو: “أنا بعمل فيلم اسمه شقو، أنا طالعة فيه ضيفة شرف بس شريرة جدًا، فأنا حابة الوشوش دي، أنا حابة التغيير ده من حد كوميدي وساذج زي سميحة لواحدة شريرة بس”.

وتابعت: “فده بيخلي عندي تحدي كممثلة إن أنا أقدم الجديد، وفيه حاجات أنت بتقول أنا عملت كل حاجة، بس فيه حاجات تجيلك كده زي دور سميحة، أنا معملتوش قبل كده، ودي بيديني حماس أكتر طبعًا”.

يسرا: “دور الشر هو تحدي لذيذ”

وعما إذا كانت تقلق من تقديم دور شر، ردت يسرا: “لأ هو تحدي لذيذ، هو لذيذ لذيذ إنك أنت يا ترى هعرف أعمله؟ يا ترى لو عملته هعمله صح وهبيِّن الوش؟، كلنا عندنا مليون وش، كلنا في حياتنا كل بني آدم ربنا خلقه عنده أكتر من وش، طيب إزاي بقى تستعملهم من غير ما تؤذي اللي قدامك؟، فيه شغلانة زي شغلانتنا، عايزة أعمل شريرة هعمل شريرة بس مش هأؤذي حد، بس بعمل شريرة علشان متعملش زيي، مش عشان تعمل زيي”.

يسرا لـ شيماء سيف: “كان نفسي تبقي معانا”

ثم قامت بعدها يسرا بتقديم أبطال 1000 حمد الله على السلامة، والذين انضموا بعد ذلك للأستوديو للمشاركة في اللقاء، وغابت عنهم النجمة شيماء سيف، بسبب سفرها، ووجهت لها يسرا رسالةً، قالت لها فيها: “كان نفسي تبقى معانا، لأن طبعًا دي حدوتة تانية خالص، فبقولها مشتاقينلك ووحشانة وكل سنة وأنتي طيبة هي مش معانا النهاردة”.

يسرا: “عنبة طلع جامد جدًا وأحمد عبد الوهاب موهبة غير عادية”

وبعدها قدمت يسرا أبطال العمل، قائلةً: “بس معانا الأستاذ محمد ثروت، معانا عنبة، عنبة برضو طلع جامد جدًا، معانا آدم الشرقاوي، معانا أحمد عبد الوهاب، اللي أنا اتفاجئت بيه بشكل غير عادي موهبة غير عادية وتألق جدًا، وعايزة أقولك الناس كلهم بيكلموني عن الـ3 ولاد دول”.

يسرا: “مايان السيد في أحلى حالاتها وأوتاكا جابلي كريزة ضحك بدموع”

وواصلت: “مايان من أجمل ما يمكن وفي أحلى حالاتها الفنية، وكمان حاباها في جت سليمة أوي، لايق عليها إنها تبقى أميرة، أوتاكا يا نهار إسود على اللي بيعمله فيا أوتاكا، أولًا فيه مشهد اللي هو بفتح الباب وأنا منكوشة، راح مصرخ وراح قافل الباب، أنا مكنتش متوقعة فجاتلي كريزة ضحك بقيت دموع، أقوله استنى يا أستاذ عمرو لازم دموعي تنشف، ما هو مش معقول، لازم أبقى جد”.

يسرا: “أوتاكا قالي مبعرفش هعمل إيه وديابلو عمل شغل جامد”

وحول إذا كان رد فعل أوتاكا مخططًا له، أكملت يسرا: “أبدًا ولا قالي قلتله مش تقولي إنك هتعمل كده؟، قالي لأ ما هو أنا مبعرفش هعمل إيه، كلهم الحقيقة كل واحد فيهم ديابلو مثلًا أول مرة كان بيمثل معايا، فبرضو عمل شغل جامد، اللي هي الحتة اقفلوا الباب وراكم وتعالوا علشان نفطر، وإحنا كلنا ماشيين وراه ومش فاهمين هو إيه، واتضح في الآخر إنه هو عايز يفطر وياكل ويشرب ويتوصل ببلاش”.

أبطال 1000 حمد الله على السلامة

يذكر أن 1000 حمد الله على السلامة من بطولة يسرا، شيماء سيف، محمد ثروت، مايان السيد، آدم الشرقاوي، عنبة، أحمد عبد الوهاب، صلاح الدالي، ديابلو وغيرهم، بالإضافة إلى ضيوف الشرف بيومي فؤاد، ميمي جمال، الطفلة لافينيا نادر وآخرين.

والجدير بالذكر أن المسلسل من تأليف محمد ذو الفقار، إخراج عمرو صلاح وإنتاج العدل جروب جمال العدل بالتعاون مع المتحدة للخدمات الإعلامية UMS.

اطلب برنامج ويبو للمدارس والجامعات اطلب برنامج ويبو للمدارس والجامعات
error: Content is protected !!