✍️ ياسر خالد
فنان شاب موهوب برع في رسم الشخصيات العامة بأنامله المبدعة، ليخلق لوحاتٍ مميزةً تقترب من الواقع، أبهر متابعيه، عبر صفحته على موقع التواصل الاجتماعي الفيسبوك، فأشادوا بموهبته الفنية الكبيرة.
إنه الفنان التشكيلي إسلام شكري، الذي تميز في أسلوب الشخبطة، وقدم العديد من اللوحات المميزة، التي أثارت إعجاب متابعيه.
وفي السطور التالية، نستعرض أبرز المعلومات عن إسلام شكري.
من هو إسلام شكري؟
يعرف شكري نفسه، قائلًا: “أنا إسلام شكري حسن، 32 سنة من إسكندرية، خريج كلية تربية جامعة إسكندرية،
من صغري كنت بحب حصص رسم، بعد دخولي ثانوية عامة دخلت الكلية اهتميت بمجال الدعاية والإعلان، وبعدت عن الرسم اشتغلت طول فترة الكلية مصمم جرافيك، لحد لما دخلت الجيش، ده خلاني أعيد حساباتي تاني وأفكر في حاجات، اللي كنت بحبب أعملها إني أرجعلها تاني”.
وأردف: “أول ما أخدت أول أجازة أنا فاكر اشتريت، كان بمرتب الجيش، أدوات الرسم وبدأت في وقت الراحة إني أرجع أرسم تاني، زي زمان بعدما خلصت الجيش جربت أرسم بخامات كتير رصاص، فحم وجاف وكنت بطلع رسومات تعجب الناس وكانت بتنبسط منها، لكن محستش إن أنا مميز في اللي لعمله، أو بمعني أصح كنت حابب يكون ليا أسلوبي ناس تعرفني بيه ويكون ليا بصمتي، بحيث إن أول لما ناس تشوف رسوماتي تعرف إنها رسوماتي”.
تأثير رسم الـvnice على إسلام شكري
وتابع شكري: “في خلال فترة كنت بحب أشوف إستايلات رسم كتير، لحد لما اتفرجت على أسلوب رسام ماليزي اسمه vnice عجبني جدًا أسلوبه إن إزاي بخطوط بسيطة قدر إنه يطلع شخصيات عالمية كلنا بنحبها، فاكر ساعتها أنا تقريبًا قعدت شهر بحلل طريقة رسمه، لحد ما الحمد لله قدرت إني أطلع رسومات بالأسلوب ده، أول لما نزلتها عندي على الصفحة الناس انبهرت جدًا بالرسومات، حبيت برضه إني أطور الأسلوب وأدخل فيه ألوان، وإني أغير لون الخلفيات، بحيث يكون مختلف أكتر ومبهر، اللي ساعدني إن أنا لما حبيت أجرب الأسلوب ده استخدمت تقنية الرسم الديجتال، في فترة أجهزة الرسم الديجتال جودتها وكفاءتها بقت قريبة جدًا من الرسم التقليدي، وفي نفس الوقت سوق العمل بقى محتاج الرسم الديجتال، وعشان تعمل الرسمة بالشكل التقليدي وتنفذها بالشكل اللي يرضيك”.
إعجاب يحيى الفخراني بلوحة إسلام شكري له في الملك لير
وأضاف: “الأدوات والخامات تكلفتها بقت عالية جدًا، عشان كده حبيت أنفذ الأسلوب ده بالرسم الديجيتال،
وخلال الفترة دي الحمد لله رسمت عدد كبير من الفنانين، وعجبتهم جدًا الرسومات وطريقة الرسم، كان من ضمنهم الفنان أمير عيد والفنان العالمي تامر حسني، والحمد لله ربنا كرمني كانت فيه مسابقة تبع وزارة الشباب والرياضة إننا نرسم الممثل الرائع الدكتور يحيي الفخراني في أي عمل من أعماله، فحبيت أرسمه في دور الملك لير والحمد لله اتألهت من ضمن 20 متسابق على مستوى الجمهوية، وعملنا معرض للرسومات بجانب عرض مسرحية الملك لير وعجبته جدًا الرسمة”.
أما عن أبرز التعليقات، التي جاءته ويعتز بها، قال شكري: “من أكتر التعليقات، اللي بحبها وجاتلي، إن فيه ناس لما شافت رسوماتي حبوا إنهم يرجعوا مرة تانية للرسم ويرجعوا للحاجة اللي بيحبوها”.
وواصل: “الحمد لله الفترة الأخيرة قدرت أنفذ معرض شخبطة”، موضحًا: “أول معرض في مصر والشرق الأوسط للفن ده”.
وأكمل، كاشفًا عن هدفه، خلال الفترة القادمة: “هدفي فترة القادمة إني أقدر أنشر الفن ده بشكل أكبر من كده وأعلمه للناس”.
إسلام شكري يشكر متابعيه
وأتم الفنان التشكيلي إسلام شكري: “بوجه الشكر لمتابعبيني، بسببهم أنا لسه مكمل وبحاول على قد ما أقدر إن كل فترة أقدملهم رسومات للشخصيات اللي بتعجبهم”.
