تصريحاتفن

محمود زهران لـ مجلة هاڨن: “الفيسبوك بقى صفحة وفيات والحاجات رخصت من كتر ما هي موجودة”

✍️ ياسر خالد

تواصلت فعاليات مهرجان جمعية الفيلم السنوي في نسخته الـ49، حيث تم أمس عرض فيلم ليلة قمر 14 للمخرج هادي الباجوري والمؤلف محمود زهران.

وعقب عرض الفيلم أقيمت ندوةً أدارها الناقد محمد نبيل بحضور المؤلف محمود زهران ومصمم البوستر يوسف عادل، فيما تغيب المخرج هادي الباجوري عن الندوة.

وخلال الندوة تواصلت مجلة هافن مع محمود زهران، والذي أدلى لنا بعدد من التصريحات، نرصدها في السطور التالية.

محمود زهران: “لو معاك فلوس كتير بتروح الجونة ولو مامعكش فلوس بقى بتكتب في البيت”

فعن طقوسه في الكتابة، قال زهران: “بيبقى على حسب أنت معاك فلوس أد إيه، يعني لو معاك فلوس كتير بتروح الجونة بيبقى ده الطقس، لو مامعكش فلوس بقى بتقعد في البيت وتقول أنا بحب أكتب في الأوضة دي”.

محمود زهران: “الحاجة الوحيدة اللي كنت قاصد فيها كوميديا كانت إن أنت تخرج من حدث تقيل لحاجة بتضحك”

وحول وجود لمحات كوميدية في الفيلم، على الرغم من وجود بعض القصص، التي تنتهي نهايات مأساوية، أوضح زهران: “أنا كان بالنسبة لي الحاجة الوحيدة، اللي كنت قاصد فيها كوميديا كانت إن أنت تخرج من الحدث بتاع إبراهيم ومريم، اللي هو حدث تقيل إن أنت تشوف اتنين بني آدمين بيتحرقوا، أنت أول حاجة تخرج منها بعد كده تبقى بتضحك”.

وأردف: “وبسرعة جدًا تشوف المأساة، اللي أنت شفتها دي اترجمت إزاي في عين المشاهد، قالك ده تلاقيه واحد مبرشم رمى سيجارة، ده كان كل التعليق، اللي هو علقه على الحكاية”.

محمود زهران: “الموضوع مبقاش ملفت.. اتنين حرقوا بعض عادي مفيش حاجة”

وأشار زهران: “فيمكن هي فيها شوية سخرية من تلقي مشاكل الناس من كتر ما أنت بقيت شايف قدامك، أنت بقيت تفتح الفيسبوك صفحة وفيات، فمبقاش الموضوع ملفت بالنسبة لك، الحاجات رخصت من كتر ما هي موجودة، اتنين حرقوا بعض عادي مفيش حاجة، فيبقى هو ده اللي هيضحكك”.

محمود زهران: “مش بتغازل المنطق أوي”

وفيما يتعلق بكيفية اجتماع هذه الأحداث معًا في ليلة واحد، صرح زهران “عشان أنت مش بتغازل المنطق أوي، تعالى أقولك على حاجات كده تخيلها، إحنا 110 مليون اللي أنت شفتهم دول خمسة، دول نسبة كام%؟ مفيش، أنت لو كل يوم ده أنت لو عديت بجد، أنت لو قررت تشوف مين اللي كان عنده مأساة إمبارح، عد بقى هتشوف كام واحد كان عنده مأساة إمبارح”.

محمود زهران: “بعض المشاهدين يتقبلون أن يتحرش عادل إمام وتامر حسني في أفلامهما بالفتيات ولا يقبلون قبلةً بين زوج وزوجته”

وبخصوص مشهد القبلة بين خالد النبوي وشيرين رضافي نهاية الفيلم، أتم زهران تصريحاته لـ”هاڨن” أن بعض المشاهدين يتقبلون أن يتحرش عادل إمام وتامر حسني في أفلامهما بالفتيات، ولا يقبلون قبلةً بين زوج وزوجته يعودان إلى بعضهما بعد فراق 18 عامًا.

محمود عبد السميع يمنح شهادة تقدير لـ هادي الباجوري يتسلمها عنه محمود زهران

وفي نهاية الندوة منح مدير التصوير محمود عبد السميع، رئيس مهرجان جمعية الفيلم، شهادة تقدير للمخرج هادي الباجوري، تسلمها بدلًا منه المؤلف محمود زهران.

أحداث فيلم ليلة قمر 14

يشار إلى أن ليلة قمر 14 تدور أحداثه حول خمس قصص حب مختلفة تكون نهاياتها في ليلة واحدة، هي ليلة قمر 14، ويرصد الفيلم كيف ستكون نهاية كل قصة.

أبطال فيلم ليلة قمر 14

والفيلم من بطولة خالد النبوي، شيرين رضا، غادة عادل، خالد أنور، محمد مهران، أحمد حاتم، أسماء أبو اليزيد، أحمد بدير، محمد جمعة، مي الغيطي، بيومي فؤاد، أحمد مالك وغيرهم، تأليف محمود زهران، إخراج هادي الباجوري وإنتاج أحمد السبكي.

مهرجان جمعية الفيلم السنوي

يذكر أن مهرجان جمعية الفيلم السنوي، برئاسة مدير التصوير محمود عبد السميع، هو أحد أقدم المهرجانات السينمائية في مصر، وهو المهرجان الوحيد، الذي تمت إقامته بشكل منتظم على مدار سنوات طويلة، ولم يتم إيقافه، منذ افتتاحه وإنشائه من قبل جمعية الفيلم، على أيدي نقاد وصناع السينما ومجلس إدارة الجمعية، سواء الحالية أو منذ بداية عقده.

والجدير بالذكر أن المهرجان يقام تحت رعاية وزارة الثقافة وبالتعاون مع صندوق التنمية الثقافية ودار الأوبرا المصرية ونقابة المهن السينمائية والمركز القومي للسينما.

اطلب برنامج ويبو للمدارس والجامعات اطلب برنامج ويبو للمدارس والجامعات
error: Content is protected !!