✍️ ياسر خالد
حل الفنان أحمد أمين وفريق عمل مسلسله الرمضاني الصفارة، آية سماحة، طه دسوقي والمخرج علاء إسماعيل، ضيوفًا مع الإعلامي رامي رضوان خلال حلقة الأمس من مسلسل مساء dmc.
حيث تحدث فريق العمل عن كواليس المسلسل، الذي لاقى نجاحًا كبيرًا خلال الماراثون الرمضاني، وحصد ردود أفعال إيجابيةً، وكان فرسًا رابحًا خلال الشهر الفضيل.
وفي السطور التالية نستعرض أبرز ما قالته الفنانة آية سماحة، خلال حلقة أمس من مساء dmc.
أي حاجة كوميدي أحمد أمين بيعملها بيبقى فيها هدف
أنا يمكن علشان اشتغلت مع أحمد قبل كده، فعارفة الطريقة اللي بيشتغل بيها، وعارفة الشغل اللي بيحب يشتغله، يعني أنا بالنسبة لي أحمد يعني حتى أي حاجة كوميدي بيعملها دايمًا بيبقى فيها رسالة وفيها هدف.
وأنا بحترم جدًا إني أبقى بعمل عمل، حتى لو هو كوميدي وفيه مساحة كبيرة من التهريج، بس يبقى وراه رسالة أو وراه هدف أو هيغير فكرة عند بني آدم أو هيؤثر في بني آدم بشكل معين.
أول ما قرأت السكريبت حسيت أد إيه لذيذ
أول ما قرأت السكريبت حسيت أد إيه لذيذ، دي أول حاجة، بجد كنت بضحك أوي وأنا بقرأه، ودي مابتحصلش كتير، يعني حتى في الحاجات الكوميدي ممكن يقولوا إن هيحصل تطورات أو تعديلات بعد كده.
بس هو من أول مسودة يعني مبسوطة جدًا بيه، مبسوطة جدًا إن أحمد معايا وطه وأستاذ علاء، يعني الناس كلها حاسة إني في إيد أمينة من الآخر يعني.
فكرة إني أبقى في عمل تصنيفه مختلف كوميدي دي كانت قلقاني
فكرة إني أبقى في عمل تصنيفه مختلف كوميدي دي كانت قلقاني، بس في نفس الوقت أنا كممثلة بحب أجرب، وشايفة إن من حق أي ممثل يجرب، ممكن ماتنفعش أوي، ممكن يتبسط بيها، ممكن هو الممثل نفسه مايحبهاش أو مايحسش إنه مرتاح فيها.
فأنا بجد كنت مبسوطة وفكرة إني كمان أول تجربة ليا في حاجة كوميدي بشكل واضح يعني مع ناس طيبة أوي، ومساعدين جدًا وداعمين جدًا، بجد لوكيشن، طيب مش عارفة أقول غير لوكيشن طيب، بجد بتبقى الناس هادية كده وكله شغال بروقان، أنا بعرف أشتغل في الأجواء دي، اتبسطت جدًا.
أنا اللي بتخض منه ساعات إني بحس إنه أكيد الناس ميتة من الضحك، وبعدين أبص ألاقي كله بيلم الحاجة، فمالهاش مقياس هي مالهاش مقياس، يعني أنا بتضايق إن الناس مش بتضحك في اللوكيشن.
بروح أشرح الإفيه وحش جدًا ومحدش بيشرح إفيه
أكتر الإفيهات يعني ممكن يقولي مثلًا يعني إيه؟، أصل أنا بروح أشرح الإفيه وحش جدًا، يعني محدش بيشرح إفيه، اللي هو أقول لأستاذ علاء وهنا بقى هقول كذا ببقى فرحانة، فهو يقولي ممكن تبقى مش مفهومة.
فيقوم جايب مثلًا أصغر واحد في اللوكيشن، يقوله أنت تعرف، مثلًا أدوجن قالي هي إيه أدوجن دي؟، قلت لأ أدوجن دي معروفة أوي، راح منادي أصغر حد.
بس بيجيب ناس من اللوكيشن صغيرين، فيقوله يا ابني تعرف يعني إيه أدوجن؟، فيقوله إيه أدوجن دي؟، يقولي محدش عارفها، محدش هيفهم، فأقوم قايلها على استحياء، بس مفيش حاجة اتشالت الحمد لله.
كان فيه إفيه كنت محضراه من أول ما مضيت
كان فيه إفيه متمسكة بيه، يعني فيه حتة برضو قعدت أقولها في القعدة بتاعت المهاتما، محدش فاهم خالص أنا بقول إيه، وبعدين أنا محضراه من أول ما مضيت، يعني محضراها دي هقولها هقولها، عشان خاطري والنبي، يعني دي مش هتأثر في حاجة.
حتى قلت لـ أحمد في المشهد ما أنا مش عارف، قلتله والنبي في حاجة نفسي أقولها بقالي كتير أوي، ده بجد، ورحت قايلاله أربع خمس جمل، فطبعًا أنا بقول ضحك، أنا التيك توك بالنسبة لي ماتيريال، بيجيلي دور فأقوم نازلة على التيك توك.
أستاذ علاء جه في الآخر قالي قلتي الأربع جمل خلاص بقى كفاية بقى، قالي الباقي مش مفهوم خالص يا آية خلينا في الأربعة، قلتهم على استحياء برضو.
ممكن أعمل كوميدي صريح تاني، لكن مش ممكن أعمل ستاند أب كوميدي أخاف جدًا، عمري ما جربت بس أخاف أوي، لأني عمري ما جربت أقف على مسرح، غير وأنا صغيرة برقص فرعوني في حفلة أو حاجة كده، حاجة على الضيق أوي، سافرت بيها اليابان، دي كانت حاجة كبيرة جدًا.
لو معايا الصفارة بجد مش هحب أرجع الصراحة
لو معايا الصفارة بجد مش هحب أرجع الصراحة، أنا أصلًا مبحبش أقعد أتكلم في اللي فات نهائي، ولا أفتكر ولا أقول يا ريتني، ومابندمش بحس إن دايمًا أي حاجة عديت بيها، حتى لو وحشة أو أسوأ حاجة ممكن تكون حصلت لي، هي اللي مخلياني في المكان اللي أنا الحمد لله مبسوطة فيه دلوقتي، فبجد مش عايزة أغير أي حاجة.
أبطال مسلسل الصفارة
يذكر أن الصفارة من بطولة أحمد أمين، آية سماحة، طه دسوقي، حاتم صلاح، إنعام سالوسة ومجموعة كبيرة من ضيوف الشرف، من بينهم محمود البزاوي، محمد رضوان، سامية الطرابلسي، ولاء القداح، رحاب الشناط وآخرين.
والجدير بالذكر أن المسلسل من تأليف ورشة كتابة مكونة من سارة هجرس، شريف عبد الفتاح وعبد الرحمن جاويش، إشراف عام الكتابة لـ أحمد أمين ومحمود عزت، إخراج علاء إسماعيل وإنتاج ميديا هب سعدي – جوهر بالتعاون مع المتحدة للخدمات الإعلامية UMS.
