هو المهندس إيهاب أحمد توفيق، حيث استطاع استخدم الذكاء الاصطناعي في أنه يتخيل إذا ديزني قررت تعمل الأفلام الكارتونية الشهيرة، زي رابونزل، موانا والفار الطباخ بفنانين مصريين، فكيف سيكون شكلها؟.
تخيل شخصيات فيلم رابونزل من بطولة سوسن بدر، هنا الزاهد وأحمد مجدي، وجعل أسماء أبو اليزيد تصبح شخصية موانا، وجعل الفار الطباخ من بطولة ماجد الكدواني، محمد فراج وجيهان الشماشرجي.
ونشر إيهاب أحمد توفيق على الفيسبوك بوستات بالأبطال المصريين لأفلام ديزني وفقًا لتخيله، وحققت منشوراته تفاعلًا كبيرًا، وحصدت آلاف اللايكات والتعليقات.
والحقيقة أن منشورات المهندس إيهاب أحمد توفيق وتفاعل المتابعين معاها كان خفيف الظل جدًا.
أبرز تصريحاته لـ مجلة هافن
حابين نعرف إزاي الفكرة جات لحضرتك؟
بالنسبة للفكرة هو أنا دايمًا كنت بشوف أي فيلم بالدبلجة المصري نجاحه في منطقتنا بتكون أعلى من النسخة الأصلية.
بسبب سهولة اللهجة المصرية وسهل التعامل فيها باللزمات والإفيهات، وبتبقى قريبة لمعظم الشعوب العربية.
فعشان كده حبيت أبدأ أجرب أعيد تركيب شخصيات أفلام ديزني بشخصيات ممثلين مصريين، والحمد لله الناس حبت الفكرة.
كمان بتختار الممثلين للشخصيات في الأفلام بتتم بناء على إيه؟
بختار الممثلين بنسبة من الشكل بحاول أقرب لشكل الأنميشن، وبرضه حسب ما أنا شايف الفنان ده ممكن يطلع الدور بشكل مختلف، زي ما عمل في حاجات قدمها.
وبحاول مكررش أكتر من ممثل في فيلم، عشان بس أقدر أوسع دايرة انتشار الفكرة، وإنه فيه ممثلين كتير يقدروا يلعبوا الأدوار مش خمسة أو ستة بس.
دا بالنسبة للناس حابة كمان أعرف من حضرتك الـfeed back الخاص بالممثلين اللي حضرتك وضعتهم في الشخصيات كان إيه؟
ممثلين كتير اتبسطوا ونشروا الموضوع في صفحتهم أو الإنستا زي الفنانة سوسن بدر وهنا الزاهد وأسماء ابو اليزيد ومحمد إمام.
ممكن تقولي هل في نية لعرض الفكرة للجهة المسئولة لتنفيذها؟
فيه أحد الأصدقاء قالي هيعرضها لحد من صناع الافلام
وهنشوف إن شاء الله إذا في رد أو لأ، بس انا عمومًا يعني هدفي دايمًا بيكون إني أستمتع باللي بعمله، فعشان كده بعمله أيًا كان بيوصل لفين.
ممكن نشوف أعمال كارتونية في نسختها العربية بالذكاء الاصطناعي؟
مع التطور هيحصل قريب إن شاء الله، لأن رتم تطور الذكاء الاصطناعي سريع جدًا أكثر مما نتخيل.
وإذا تم إضافة دوبلاج صوت؟
هو حاليًا سهل نسخ البصمة الصوتية، فممكن يتعمل ده، بس الموضوع لسه مش بسيط، الفكرة في حركة الأنميشن، إنما الصوت أصبح أمره سهل.
