*الإذاعة بالنسبة لي حياة وأهم حاجة الإذاعة
*أفخر إني مذيعة إذاعة أكتر من إني مذيعة تليفزيون
إذاعية، مقدمة برامج تليفزيونية، ممثلة ومغنية، متعددة المواهب وتمتلك حضورًا طاغيًا، ملمة بجميع جوانب العمل الإذاعي.
لا يوجد حدود لخيالها أو لطموحها، فهي دائمًا تسعى للأفضل، صاحبة مدرسة خاصة في تقديم البرامج، ودائمًا ما يحرص المستمعون على متابعة برامجها على أي محطة تتواجد بها.
إنها الإذاعية الموهوبة زهرة رامي، وفي عيد الإذاعة المصري، كان لنا معها هذا الحوار الممتع والشيق، فإلى نص الحوار…
ماذا يمثل لكِ الراديو؟
لو لم أكن إذاعية لوددت أن أكون إذاعية، أنا إذاعية بنت إذاعية بنت إذاعي، يعني أبًا عن جد.
مخرجة إذاعية حفيدة أول مخرج إذاعي في الإذاعي، فالإذاعة بالنسبة لي حياة، يعني أهم حاجة الإذاعة.
وأفخر إني مذيعة إذاعة أكتر من إني مذيعة تليفزيون كمان، يعني لما حد بيقولي أنتي مذيعة إيه؟، بقوله أنا مذيعة إذاعة الأول وبعدين تليفزيون.
فبحس بكل الفخر الحقيقة، لأنه مذيع الإذاعة هو اللي بيبقى مسئول عن كل حاجة والأفكار والحاجات اللي بيطرحها.
هو المخرج وهو المذيع وهو المنتج وهو كل حاجة، فده أنا بعتز بيه جدًا، بحس إنه بيدي قيمة أكبر للشخص يعني.
وأنتِ صغيرة ما الإذاعات التي كنتِ تحبين الاستماع إليها قبل الذهاب إلى المدرسة؟
كنت بسمع كل الإذاعات، أنا متربية في صوت العرب مع أمي، بس كنت بسمع الشباب والرياضة، وكنت بسمع كل الحاجات اللي في الكون.
ونجوم fm طبعًا ده في ثانوية عامة، طبعًا أول ما فتحت كنت بسمعها.
وما هي أكثر إذاعة أثرت فيكِ بخلاف صوت العرب؟
كل الإذاعات اللي اشتغلت فيها أكيد، أول إذاعة اشتغلت فيها وبنيتها كانت هيتس.
ونجوم fm كانت مدرسة مهمة ومحطة مهمة جدًا جدًا جدًا في حياتي.
وإنرجي مبسوطة جدًا إني فيها، بحس إنها الأجدد في وقتنا الحالي والروح الخالصة يعني، واللي بحب جدًا أنتمي إليها.
تحبين لقب الإذاعية أولًا ثم مقدمة البرامج التليفزيونية وماذا عن الممثلة؟
طبعًا، ممثلة ومطربة بييجوا بعدين، بس دايمًا اللي يقولي بتشتغلي إيه؟، أقوله مذيعة في الإذاعة.
وبعدين التليفزيون وبغني بقى وبمثل وحاجات تانية، بس الأصل وكينونتي مذيعة إذاعة طبعًا.
وكيف جاءت العلاقة المتميزة التي تربط زهرة رامي بمستمعيها؟
جت على مدار السنين، فدي السنة الـ13، فضلت 12 سنة بقدم برامج صباحية، أول سنة السنة دي أغير البرامج الصباحية.
12 سنة عايشة مع المستمعين الصبح، كان فيه مستمعين كانوا في المدرسة واتخرجوا واتجوزوا وخلفوا وإحنا قاعدين.
فعشان كده الألفة يمكن جاية، مرينا بقى بحاجات كتير أوي مع بعض يمكن.
هل سمعتِ الإذاعية إيناس جوهر وهي تقول أنكِ أكثر إذاعية تشبهينها في طريقة تقديم البرامج؟
يعني دايمًا بتقول كلام حلو في حقي، وأنا دايمًا شايلاه على راسي وبحسه وسام على صدري بصراحة.
أنا بحبها جدًا جدًا جدًا، وهي قدوة طبعًا، يعني يا ريت الاسم والتاريخ اسمي يتكتب وأبقى حد زي أستاذة إيناس جوهر.
وكيف جاءت تجربتكِ في الإخراج الإذاعي؟
جدي فؤاد شافعي كان أول مخرج إذاعي في صوت العرب، هو اللي عمل الدراما الإذاعية أصلًا، فشفت جدي وهو بيشتغل في ده.
وكان ممثلين كبار يقولولي ده إحنا اشتغلنا مع جدك في الإذاعة، فطبعًا ملمة بده
وبعدين لما جينا في إنرجي نعمل الدراما إنتاج ذاتي إنتاج إنرجي.
والحقيقة إن ثقة عايدة سعودي فيا، بس ذاكرت شوية وقعدت أشتغل على الإخراج الإذاعي.
والحمد لله تالت رمضان على التوالي عملت خمس مسلسلات إذاعية.
دعيني أسألكِ عن آخرهم دبل شفت كيف جمعتِ بين الفنانة إنجي المقدم والتي تتميز في التراجيديا والفنان عصام عمر وهو كوميديان؟
إنجي بدايتها كانت في أحمد اتجوز منى وهو عمل كوميدي، كمان إنجي أصلًا كانت مذيعة.
وهل من الصعب أن تقودي مذيعةً كـ إنجي؟
بالعكس، هي إنجي شخصية جميلة أوي أوي أوي أوي، يعني فوق ما تتصور، وبجد فنانة بتحب شغلها أوي متخصصة في شغلها.
بالعكس دي هي كانت سايبة نفسها خالص، وأنا ماكنتش بحتاج أقولها حاجات كتير، فعلًا مركزة في دورها ومركزه في الموضوع.
بس لما كانت تنسى بس شوية حاجات، أقولها ارجعي تاني، فتقول أيوه صح وتروح عاملة كذا كذا.
بس كانت بتفاجئني بتديني أكتر من المتوقع كمان، بتديني أكتر من اللي بطلبه منها.
فبالعكس ماكنش فيه أي حاجة، وهي بجد إنسانة تجنن في التعامل، فماكنش فيه أي حساسية خالص.
