✍🏻 محمد حنفي
علقت الفنانة إنجي خطاب على قرار الفنانة ميرهان حسين اعتزالها التمثيل، والتي أعلنت عنه عبر حسابها الشخصي بموقع تبادل الصور والفيديوهات إنستجرام بخاصية الإستوري.
وقالت خطاب عبر صفحتها الرسمية على موقع التواصل الاجتماعي فيس بوك: “ميريهان حسين اعتزلت، ياريت محدش يستهون بمشاعرها وإحساس الظلم اللي هي حساه ويقول بتعمل تريند وزفت لأنه إحساس يقهر بجد، أنا مقدرة جدًا اللي بتمر بيه وإحساسها بالظلم لأنها شايفة ناس كتير أقل منها موهبة واخدة مكانها ومكانة أعلى منها، إحساسها بانتشار الشلالية والقرايب والحبايب والواسطة خلاها تحس بالظلم وأنا حسيت الإحساس ده قبل كده بس حابة أقولها أنها ممثلة هايلة وفي الآخر لا يدوم إلا الموهوب والجمهور واعي جدًا وعارف الموهوب اللي شغال بموهبته واللي شغال بالواسطة كله باين ومعروف متيأسيش وقت ويعدي أن شاء الله وربك قادر يغير من حال لحال في غمضة عين ويرزقك بكل خير”.
وكتبت ميرهان عبر إستوري إنستجرام: “أجازة مفتوحة من السوشيال ميديا، والمكالمات والإلتزامات والتواجد من أجل الآخرين، مش هكون موجودة ولا عايزة حاجة من حد، ولا حد يعوز مني حاجة، واللي زمان أنا عيشته لغيري، أنا دلوقتي هعيشه لنفسي، اللي مابيحبونيش شيلوني من حساباتكم لحد ما أقدر أواجه الحياة الظالمة دي تاني”.
وتابعت حديثها بقولها: “لا عايزة تقدير لا في شغل ولا في الحياة، ولا صحاب ولا حبايب ولا معارف، ولا حاجة تستاهل ولا حد يستاهل، اللي بيحبوني شكرًا وكتر خيركم، واللي مابيحبونيش شيلوني من حساباتكم ، لحد ما أقدر أواجه الحياة الظالمة دي تاني، سلام، تعبت.. لذلك أعتزل”.
وأضافت ميرهان: “تعبت وأشعر بعدم التقدير لشخصي ولموهبتي، ولم أعتد البقاء في مكان مع أشخاص لا تقدرني تعبت، لذلك أعتزل، لن أعرض موهبتي على من لا يراها ولا يقدرها ولا يحتاجها بعدما قدمت العديد من الأدوار، التي لا تشبهني ولا تشبه موهبتي، ولا تستغل أدواتي كفنانة ممثلة محترفة، وحصلت على العديد من ورش التمثيل، وأملك القدرة على التقليد بالأداء والصوت، والشكل والهيئة والملامح، التي أجيد رسمها على وجهي بالمكياچ والشعر”.
واستكملت ميرهان قائلة: “دون مساعدة من أحد وبنفسي فقط وبأبسط الإمكانيات، وأصور بنفسي وأعمل مونتاچ بنفسي، لأعرض عمل مبدع، بشهادة الجمهور الذي ألتقيه في الشارع والمول وكل مكان ليقولوا لي أنتي مظلومة والله إحنا نفسنا نشوفك أكتر مناسبة لموهبتك الكبيرة، ده غير إني أملك صوت حلو وقادر على الغناء الذي أعشقه، لكني تعبت ولم أعد أسعد بجملة أنتي مظلومة، لن أعرض موهبتي على من لا يراها ولا يقدرها ولا يحتاجها، وسط مصالح وشلالية وموضة، ومين متجوز مين ومين مصاحب مين، مش مين شاطر ومين موهوب”.
فيلم اتنين للإيجار:
جدير بالذكر أن آخر أعمال الفنانة ميرهان حسين، فيلم “اتنين للايجار” والتي شاركت في بطولته مع كل من بيومي فؤاد، محمد ثروت، محمد لطفي، ناهد السباعي، إيمان السيد، وعدد آخر من النجوم، تأليف أسماء غازي ، وإخراج شادي علي.
مسلسل مزاد الشر:
بينما آخر أعمال الفنانة إنجي خطاب، مسلسل “مزاد الشر” وشاركها البطولة كل من كمال أبو رية، هالة فاخر، محمد نجاتي، أحمد جمال سعيد، أحمد عبدالله محمود، هاجر الشرنوبي، وعدد آخر من النجوم، تأليف أحمد الأباصيري، وسيناريو وحوار محمد الهادي وإخراج ممدوح زكي.
