موضوع الناس اللي بتهاجم مسلسل النهاية على اساس انها بتنشر فكر ماسوني ده موضوع مستفز جدا .. انت عندك جيل كامل اصلا مش فاهم حاجه عن المسيح الدجال ولا عن الـ ٧٠٠٠٠ من يهود أصبهان اللي هايتبعوه “الطيالسة” .. ولا يعرفوا مين الدجال ده اصلا مع ان في اقاويل كتير بتقول ان “السامري” اللي ذكر في سورة “طه” هو “الدجال” عشان كده سيدنا “موسي” قاله (فَٱذۡهَبۡ فَإِنَّ لَكَ فِی ٱلۡحَیَوٰةِ أَن تَقُولَ لَا مِسَاسَۖ وَإِنَّ لَكَ مَوۡعِدࣰا لَّن تُخۡلَفَهُۥۖ) واللي بالمناسبه اتذكرت قصته في رواية “ارض الإله” لاحمد مراد
مفيش كتاب أعظم من القرآن الكريم عشان تفهم منه كل حاجه بس تتدبره صح .. ولو اتبعت القرآن والحديث هتكمل الصورة اللى ناقصاك، وهاتفهم ان الدجال هو اعظم فتنه في الخليقة، وانه هايظهر في وقت هيكون مفيهوش ميه ولا شرب وان اللي عايشين وقت ظهوره وهايكونوا عارفينه وفاكرينه قليلين اوي عشان لما يقول انا ربكم الاعلي الناس تامن بيه وتصدقه.
اما بقي عن المحتوى اللي بيتم تقديمه في مسلسل النهاية فهو تقريبا اتحرق في اكثر من حاجه قبل كده للي مهتم يتفرج ويقرأ .. زي “فارس بلا جواد” و سلسلة “عصر الاستيقاظ” على اليوتيوب وهيتساب للعرض زيه زي غيره لأنه مضافش أي جديد.
لان الناس اللي بيعملوا الكلام ده وصلوا لدرجات اعلى من اللي بيتم عرضه في أي عمل فني .. انت مش بتعرض غير اللي اتعرف وانكشف لكن هما ما زالوا على السر محافظين.
كمان اللي بيتفرج وصل لمرحلة انه مغيب لدرجة انه ميصدقش ان في حاجه اسمها الدجال مع أن الرسول صلي الله عليه وسلم قال في حديث صريح ان الساعه مش هتقوم إلا بعد خروجه وأنه أعور ومعلومات كتير عنه جيلنا الحالي ميعرفش عنها حاجه .. ابسطهم دعاء اللهم قنا من فتنة المسيح الدجال.
فكونهم يذكروا ولو لمجرد الذكر بس في المسلسل حاجه زي دي في التوقيت ده هيخلي الناس ترجع تقرا وتتكلم وتبحث في الموضوع تاني وبالتالي احنا ممكن نلحق ننقذ ما يمكن انقاذه من الموضوع ده.
