حواراتفن

يوسف الأسدي في حوار خاص لمجلة هافن: أستاذ شريف سلامة فنان جميل ومتعاون بشكل كبير

يوسف الأسدي هو ممثل مصري، ولد في 11 يونيو 1995، ودرس في معهد الفنون المسرحية بقسم التمثيل والإخراج، وشارك مؤخراً في مسلسل ورق التوت وتم عرض المسلسل يوم السبت الموافق 14 أكتوبر عبر منصة watch وقناة cbc.

 

حدثني عن تفاصيل دورك في مسلسل ورق التوت؟ 

بعمل دور نبيل، ولد من الصعيد من المنيا هو شاب بيحب الفن جداً من زمان وشخصية معقدة ومركبة بشكل كبير ويعتبر دة أصعب دور بدأت فيه من أول ما اشتغلت في التليفزيون بس هو أحب دور وأقرب دور لقلبي بعد دور توفيق في مسلسل الطاووس بس الدور ده أنا بحبه جداً، هو بيقى جاي من الصعيد على فترات طول الوقت فا بينزل من الصعيد للقاهرة بيشارك في نشاطات فنية هو فنان في كذا حاجة بس بيحب الفن عموماً ولحد ما بيشتغل كول سنتر وبعدين بيدخل أكاديمية الفنون بيدخل الدفعة اللي هو فيها وبيتحط بقا في حوارات ومشاكل وصحاب وحب وتفاصيل وفن وتمثيل تفاصيل كتير جداً يعني هتبان إن شاء الله ويارب الناس تحب الشخصية وتحب المسلسل لأنه هو مسلسل مختلف.

 

هل واجهت صعوبات أثناء تصوير المسلسل؟ 

 

لا خالص مكنش فيه اي صعوبات في التصوير بس هو المسلسل كانت ظروفه حلوة جداً الفريق كله حلو ورا الكاميرا قدام الكاميرا كلنا كان فيه تفاعل بينا وحب بينا جميل جداً يعني حاجة اعتقد إن شاء الله الناس هتشوفها كلها في المسلسل بس هو الدور كان بالنسبالي صعب مذاكرته صعب إن أنا اقدمة وتركيبته كانت صعبة هي دي الصعوبات اللي قابلتني في أول الدور وانا بذاكرة بعدين تغلبت عليها.

 

ماسبب حماسك للمشاركة في المسلسل؟ 

هو مسلسل مختلف ودرامياً مختلف كقضايا بيناقشها كافرومات للمسلسل هو شكل مختلف جداً فكان طول الوقت اي عنصر في المسلسل دة كان شغال فيها وكان متحمس بشكل كبير جداً إن هو يقدم المسلسل ده واعتقد لما يتشاف إن شاء الله هيبان هو قد ايه مختلف ويستاهل الحماس لأي حد كان شغال فيه.

 

كيف كانت كواليس تصوير المسلسل؟ 

 

من أحلى الكواليس اللي عشتها فعلاً الكرو كان في بينا كيميا لذيذة بينا كلنا كممثلين كإخراج كتصوير ككل الناس دي مطلعة حاجة مختلفة وإن شاء الله الناس هتشوفها يعني.

 

كيف كان التعاون مع المخرج حسام علي؟ 

 

من أحلى التعاونات في حياتي لأني انا من زمان كنت فان له يعتبر كمخرج أنا من أول مبدأ مسلسلاته، وانا بتفرج على مسلسلات وانا كان نفسي أشتغل مع استاذ حسام علي جداً بصراحة كنت انا واثق ان انا كنت هشتغل معاه امته وفين معرفش بس جت صدفة الحمد لله وربنا جبر ودخلت معاه المسلسل ده وهي تجربة اتمنى انها تتعاد اكتر من 100 مرة فانا بحب استاذ حسام علي جداً على مستوى الفني هو مخرج مهم جداً واعي جداً وفنان بشكل كبير وعلى المستوى الإنساني هو أنسان جميل جداً.

 

كيف كان التعاون مع الفنان شريف سلامة؟ 

 أستاذ شريف سلامة فنان جميل وشخص جميل وهادي ولذيذ وكان متعاون بشكل كبير اوي وبجد كان مساعدنا كلنا بشكل كبير وكان متحمس للموضوع وهو كفنان يعني محدش يقدر يختلف عليه ابداً لا كانت تجربة حلوة جداً بالنسبالي مع أستاذ شريف سلامة وهو فنان مهم واتمنى إن أنا اشتغل معاه اكتر من مرة.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!