فن

أمير شاهين لـ هافن:” مسلسل الفريدو كان صعب وبستمتع بالشغل مع عمرو محمود ياسين”.

حوار: شهد شاهين

اشاد الجمهور بالاداء الجبار التي قدمه أمير شاهين بشخصية مصطفى في مسلسل “الفريدو” الذي كان من بطولة الهام شاهين واحمد فهمي وكان من اخراج عصام نصار، وقدم أمير خلال العمل شخصية جديدة وفريده من نوعها.

كلمنا عن تحضيراتك لشخصية مصطفى في حكاية الفريدو؟

الحقيقة كانت بالتعاون مع الاستاذ عمرو ياسين والاستاذ عصام نصار المخرج قعدنا مع بعض كتير جداً عملنا بروفات ترابيزة كتير واتناقشنا في الشخصية كتير وفهمت وجهه الاستاذ عمرو ياسين وشايف الشخصية منين وازاي والحقيقة قعدنا اشتغلنا عليها كتير يعني عملنا بروفات كتير والحمد لله التحضير دة هو اللي ادى الشخصية تبقى بالجودة دي يعني وانها تطلع كدة يعني

ما هو اصعب مشهد من وجهه نظرك في تصوير الحكاية؟

يعني مش هقول اصعب مشهد هو الحقيقة يعني المسلسل كله كان صعب لانه هو مسلسل كله مشاعر و كله احاسيس فا يعني بشوف ان مفيش حاجة اسمها مشهد صعب ومشهد سهل انا بشوف ان كل المشاهد لازم تبقى نفس ذات الاهمية يعني

ما رأيك في ردود الأفعال على شخصيتك في حكاية الفريدو؟

ردود الافعال على شخصية مصطفى في الفريدو اتفاجات بيها جداً الحقيقة كنت متخيل انه هو هيتكره هو فعلاً اتكره في الاول ولكن الناس بعد كدة اتعاطفت معاه وحبوه وشافوا انه كان شخص منساق ورا مراته وهي اللي كانت سايقاه ولكن بعد كدة هو يعني رجع لصوابه وصحي كدة وفهم ورجع لعقلة يعني فالحقيقة اتفاجأت جداً بردود الافعال وسعيد بيها جداً يعني

كيف كان التعاون مع الفنان أحمد فهمي ولو جالك فرصة تشارك معه تاني هتوافق؟

من أحسن الحاجات اللي في الدنيا أحمد فهمي أنسان محترم وممثل محترف والحقيقة انبسطت بالشغل معاه جداً واتمني ان احنا يبقى عندنا حاجة تانية نقدر نشتغلها انا وهو مع بعض ياريت

كيف كان التعاون مع المؤلف عمرو محمود ياسين؟ وماهي الرسالة التي تحب ان توجهها له؟

الحقيقة التعاون مع عمرو ياسين هي مش أول مرة إن انا وعمرو نشتغل مع بعض احنا الحقيقة اشتغلنا مع بعض في نصيبي وقسمتك الجزء الاول والجزء التالت اشتغلت معاه فيهم وانا الحقيقة عمرو طبعاً صديق واخ واحنا اصدقاء فعلاً اصدقاء طفولة واصدقاء من عمر مش ان احنا لسة عارفين بعض وانا بستمتع جداً بالشغل مع عمرو حد محترف وبيحب شغله وبيحب الممثل بتاعه ودايماً بيدي تيبس دايماً بتبقى مهمة جداً وبيفتح عنين الواحد على حاجات كتير في الشخصية يعني فانا بستمتع بالشغل مع عمرو جداً يعني واحب اوجهله رسالة اقوله شكراً على اهتمامك بالحاجات اللي انت بتعملها شكراً على المواضيع اللي انت بتختارها واتمنى انه هو من أحسن لأحسن إن شاء الله طبعاً

استقبلت إزاي رد فعل الجمهور على الحلقة الاخيرة؟

الحقيقة رد فعل الجمهور على الحلقة الأخيرة حاجة اكتر من رائعة يعني الواحد مكنش متخيل كدة الناس كلها كانت متعاطفة جداً مع ثريا وكلنا عيطنا على ثريا وزعلنا عليها الحقيقة وهي فعلاً شخصية تتزعل عليها وتتحب يعني ردود أفعال الناس كلها كانت دايماً بتقول ان احنا ان الناس لسة مشبعتش من المسلسل ودي حاجة حلوة ان الواحد ينسحب او يخلص القصة والناس لسة. مشبعتش من المسلسل اتبسطت جدا يعني

بعد عرض الحلقة الأخيرة هل تحب أن توجه رسالة الي جمهورك؟

شكراً على دعمكوا شكرا على فهمكوا لينا وللاحنا بنقدمه وبشكرهم جداً على الدعم طبعاً شكراً

فكرة أن الست تكون مسيطرة على الرجل.. بتشوف الموضوع ازاى ؟

للاسف هو دة الموجود يعني في رجالة مش هنقول ان هي بتسيطر عليه عشان خاطر ان هو ضعيف او الكلام دة ولكن في رجالة بتبقى متسيطر عليها عشان هو بيحب مراته ومش عايز يزعلها الكلام دة كله فابيحاول ان هو يرضيها بشتى الطرق عشان يريح دماغه وعشان يبقى عايش سعيد ومتهني وكل الكلام دة يعني انا ضد دة طبعاً جداً الراجل راجل والراجل لازم يبقى ليه كلمة ورأي ومينفعش ان هو يكون منساق ورا اي ست الحقيقة يعني

مرض الزهايمر لم يتم لتسليط الضوء عليه بشكل كبيرفي الأعمال مثل ماحدث في حماية الفريدو.. من وجهه نظرك ماذا نفعل أيضاً للحديث عنه ماذا نفعل أيضاً للحديث عنه بشكل اوسع؟

الحقيقة انا اكتشفت بعد ماشتغلنا عمل الفريدو انا اكتشفت ان في ناس كتير جداً هتلاقي في محيطه يعني مثلاً عنده جدته مامته عمته باباه قريبه اياً كان موجودين حوالينا مكنش متسلط عليهم الضوء اعتقد بعد مسلسل الفريدو هنبدا نسمع عن حاجات كدة كتير لان في حالات كتير غير معلنة وفي ناس كتير لسة اعتقد مش فاهمة ان اللي عند اهاليهم او اللي عندهم دة مرض الزهايمر فانا شايف ان يعني الحمد لله قدرنا ان احنا نوجه النظر ليه وللمرض دة ونتكلم عنه بتفاصيل كتير جداً مهمة ان كل واحد هيبدا يشوف العلامات اللي شافها في المسلسل على حد من عيلته عندة هيبدا يفكر ان ياترا دة عنده ولا معندوش ويبداوا يهتموا بالموضوع شوية يعني

مارايك في الانتقاد الذي تعرض له العمل منذ طرح البوستر؟ وماهي الرسالة التي تحب ان توجهها للاشخاص اللي بينتقدوا الاعمال قبل عرضها؟

الحقيقة الانتقاد اللي اتعرض ليه العمل قبل مالعمل يبدا دة كلام مش منطقي الحقيقة يعني مش معقول ان انا اشوف صورة او اشوف بوستر أو أفيش واتكلم عنه وانا معرفش اي الحكاية ولكن للاسف هي دي بقت طبيعة بعض الناس بقا في بعض الناس فاضية انها تقعد تركز لحاجات تافهه كدة وانها مجرد تنتقد من اجل الانتقاد هو مش بينتقد من اجل إن هو يقول حاجة صح او ان هو يصلح حاجة لا بالعكس هو بينتقد من اجل الانتقاد فقط لاغير

عودة العمل مع الفنانة إلهام شاهين بعد عشر سنوات.. ايه المختلف في الفنانة إلهام كزميلة عمل وكشقيقه؟

الحقيقة سعيد جداً ان انا رجعت اشتغل مع الهام بعد اكتر من عشر سنين مشتغلناش مع بعض الهام طبعاً في الليوكيشين هي النجمة الهام شاهين احنا في الليوكيشين مبنتعملش كأمير والهام الاخوات استاذة الهام وأمير اتبسطت جداً ان انا اشتغلت معاها السنة دي ويارب ان شاء الله يبقى في اعمال تانية تجمعنا مع بعض

هل في دور معين يرغب أمير شاهين في تقديمه خلال الفترة المقبلة؟

الحقيقة مفيش دور معين احب ان انا اقدمه انا احب اقدم كل الادوار الحقيقة انا شايف ان انا لسة مقدمتش ادوار كتير جداً وشخصيات كتير جداً فانا عندي شخصيات كتير احب ان انا اقدمها مش شخصية واحدة يعني أو دور واحد

هل الاعمال ذات الحلقات القصيرة.. أصبحت اكثر راحه للفنان من ناحية الاستعدادات والتحضير عن الأعمال الطويلة ؟

الاعمال الحلقات القصيرة الحقيقة انا بشوفها صحية جداً الناس بقت مبسوطة منها لان الناس بقت بتشوف القصة في وقت قصير وفي وقت سريع وبتبقي جرعة مكثفة من الفن الحقيقة يعني فابالعكس هي ناجحة جداً فكرة القصص القصيرة ولكن هي طول عمرها كانت موجودة كان موجود السبعية وكان موجود السهرة والسبعية دي اللي هي بتبقى سبع حلقات والسهرة هي يوم واحد بس حلقة واحدة ساعة كل الكلام دة كان موجود زمان ولكن للاسف كان جالو فترة كدة وانقرض ودلوقتي اهو رجع تاني. بالعكس دي حاجة كويسة جداً وصحية هي مش اكتر راحة للفنان ولا حاجة بالعكس الفنان كدة كدة بيحضر. لعمل سواء. حلقة سواء عشرة سواء تلاتين الفنان كدة كدة بيحضر نفس تحضيره مذاكرته. واحدة يعني الفنان لكن مش استسهال ولاحاجة بالعكس

هل يوجد أعمال جديدة في الفترة القادمة؟

نتنمنى ان شاء الله يبقى في حاجة في رمضان يعني لسة في كلام ومفاوضات ان شاء الله اول مايبقى في حاجة بجد ونمضيها ويبقى تمام. ان شاء الله نعلن عنها

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!