صحة

“القولون العصبي”

✍️دكتورة دينا حسن عثمان

أعراض القولون العصبي ممكن تحصل لأسباب مختلفة ممكن نعالجها ونخلص منها لذلك مهم اوي أننا نبقى متأكدين أن المشكلة اللي عند المريض هي فعلا القولون العصبي وبكل آسف القولون العصبي بيتعرف بالاستبعاد يعنى لازم تفحص الأسباب التانيه اللي بتعمل المشكلة دي كويس وتتاكد أنها بريئه وبعدين قول أنه قولون عصبي يلا بينا

العصبي غير التهابات القولون

القولون العصبي يعني irritable bowel syndrome 

التهابات القولون يعني inflammatory bowel diseases 

الفرق بينهم إيه؟

أن القولون العصبي مرض وظيفي يعني الخلل حصل في وظيفة القولون وحركته أما التهاب القولون زي ما في اسمه التهابات يشمل يبقي فيه تقرح القولون ودم في البراز وال crohn diseases عرفتم الفرق بينهم إيه؟

تعالو بقي نتكلم عن المرض الوظيفي دا القولون العصبي

أهم معلومة مهمه اوي تكون عارفها هي أن القولون العصبي مفيش علامة نقدر من خلالها نقول أن الشخص دا مريض قولون عصبي لكن لما بيظهر بعض الأعراض نستبعد كل الأسباب الأخرى اللي ممكن تعمل نفس الأعراض ولما منلاقيش أي حاجه تاني يبقي القولون العصبي يعني دا تشخيص اللي مش لاقي تشخيص

يعني ممكن عيان يكون عنده fibromyalgia , backache , genitourinary symptoms وتظهر على هيئة نفس أعراض القولون

طيب إيه هي أعراض القولون؟

-ألم في البطن أحيانا بيكون محزم الوسط كدا من تحت السره حاسس وكان حد ماسك قولونك بيزيد بإيه وبيقل بإيه؟

– الألم دا بيزيد عند الإناث قبل وأثناء الدورة الشهرية

– بيزيد الألم دا بالتوتر “مش علشان اسمه القولون العصبي يبقى بيجي من العصبية” يا جماعة بتزيد أعراضه بالعصبية فقط يعني لازم يبقى موجود أساسا والعصبية تزوده

– كمان بيزيد بالأكل

– وبيقل بدخول الحمام أو passing flatus يعني تفريغ الغازات اللي في القولون بيرتاح المريض

– أكتر وقت الألم دا بيكون موجود فيه هو عند أول ما المريض يصحي الصبح

– تغيير في عادة القولون يعني إسهال أو إمساك أو الاثنين مع بعض بالتبادل

بس اللي قريته أن الأغلب بيكون إمساك هو الغالب وبيكون معاه إسهال أحيانا

بعدين بيخرج البراز على هيئة دفعات وعيارها صغير narrowed caliber افهمها زي ما تفهمها بقي

دا غير إحساس المريض بأنه لما يدخل الحمام ويخرج يحس أن بطنه لسه معبيه طيب ليه الإمساك هو الغالب؟

لأن التقلصات بتاعت القولون دي بتقلل من حركته أو تشل حركته وبالتالي بيحصل امتصاص زيادة عن اللزوم للمياه من القولون وبالتالي بيحصل جفاف شديد وإمساك للبراز

يبقى أغلب الأحيان إمساك وقلما لما يكون إسهال ولما بيكون فيه إسهال خلي بالك أن التوتر والأكل بيزودوا من الإسهال

الغازات والانتفاخ الصدمة: مريض القولون جسمه لا ينتج غازات أكتر من البني آدم الطبيعي يعني سيادتك الغازات اللي عامله مشكلة دى عند غيرك بس فيه مشكلة عندك انت أن الغازات دى موجودة عند كل الناس متوزعة على القولون والأمعاء أما عندك بسبب التقلصات فهي مجتمعة مع بعضها في مكان واحد بتضغط على الجدار بتاع القولون وتعمل الانتفاخ والألم دا لذلك الألم بيروح والانتفاخ بيروح بمجرد ما بياخد أدوية الانتفاخ اللي هي أساسا لا تؤثر على إنتاج الغازات ولكن هي بتخلي السوائل اللي في الجسم ما تعملش فقاقيع وما تخزنش يعنى بتقلل surface tension

حرقان في فم المعدة epigastric heart burn حوالي 25% إلى 50%من مرضى القولون عندهم حرقان في فم المعدة وحموضه وغثيان خلي بالك العلاقة بين العيانين اللي عندهم حموضه وبين القولون العصبي كبيرة يعني المرضي اللي عندهم حموضه بالأغلب هتلاقي عندهم القولون العصبي

دي بقي الأعراض اللي بتظهر يبقي أنا إيه المعايير اللازمة للحكم أن دا مريض قولون؟

– ألم في البطن على الأقل يوم في الأسبوع لمدة 3 شهور مثلا لأنه مرض مزمن

– خروج البراز على دفعات

– الشعور بعدم التفريغ بعد عمل الحمام

– الغازات و إمساك أو إسهال

البراز لو فيه دم أو فيه فقدان للوزن بمرور الوقت دا مش القولون العصبي دى حاجة غيره وهنعرف ازاي نعرف اذا كان هو القولون ولا حاجة تانية البوست اللي جاي

بيحصل ازاي يا دكتور القولون العصبي؟ وإيه أسبابه؟ وإيه علاجه؟

كل مرض ليه مفتاح لما تفهمه هتبقي فاهمه بنسبة كبيرة وهي آية الأساس في حدوث المرض دا؟

بص يا سيدي المرض دا ممكن تسميه hypersenstivity or hyperalgasia ودي معناها حاله الأعصاب في جسمنا بتتاثر بأقل حاجة من أسباب الإثارة يعني الحاجات اللي لا تسبب ألم للإنسان العادي هي بتسبب ألم للحالة دي تعالو نشوف سوى

القولون فيه نوعين من الأعصاب afferent ودى أعصاب بتحس بالموجود في القولون وتبلغ المخ بيه هي اللي بتحس أن فيه براز كتير تبعت إشارة للمخ تقوله أن فيه براز فيزود من حركة القولون لطرده وفيه أعصاب تانيه efferent ودى اللي جايه من المخ للقولون ودي اللي المخ بيبعت من خلالها الإدارة ويتاثر على العضلات بتاعت القولون

مريض القولون عنده زي ما قولنا حساسيه زايده في الـ afferent وبالتالي الأكل بيثيرها والعدوي بتثيرها والكل يثيرها عامل زي البنت الشعنونه أقل حاجة بتثيرها لذلك لو الشخص ده عنده براز بسيط في rectosegmoid تلاقيه متخيل أن القولون هينفجر من كثرة اللي فيه

يبقى أول حاجة ندور عليها هي هل المريض دا عنده عدوى ( بكتيريا فيروس – فطر – ديدان ) ودا من خلال تحليل براز أو نشوف أو نشوف المريض دا لو عنده حموضه عالية و dyspepsia أحماض المعدة بيخرج بكميات أكبر من الطبيعي اللي الأمعاء والقولون ودا طبعا بيغير من PH بتاعت الوسط ودي في حد ذاتها مشكلة طبعا

وكمان ممكن يكون سبب من ضمن الأسباب وهو خروج كمية كبيرة من العصارة الصفراوية bilesalts في البراز ودا مثلا في بعض الأمراض مثل التهاب القولون

دى كلها أسباب متعلقة بأمراض ومشاكل القناة الهضمية فيه بقي مشاكل خاصة بالجهاز العصبي

أثبتت الأبحاث أن ممكن يكون الشخص دا عنده spinal hyperexcitability with activation of nitric oxide and possibly other neurotransmitters

يعني عنده فرط في إنتاج النواقل العصبية اللي عامله لغبطه عنده في الأعصاب بالشكل دا ودى حالة قليلة لكن علاجها صعب شويتين

من ضمن المشاكل المتعلقة بالجهاز العصبي وهي أن الاكتئاب والتوتر الاثنين بيزودوا من العصبية أنت بطبيعة أمرك لو أنت متعصب جدا بتكون سهل تثار باي حاجة وأي حاجة بتزهقك وبالتالي الشعنونه بتاعت الأعصاب دى بتزيد مع الموضوع دا

يبقي كده اتكلمنا عن أسباب متعلقة بالقناة الهضمية وأسباب متعلقة بالجهاز العصبي

جت اللحظه اللي بيتمناها كل واحد فيكم إيه العلاج:

مبدئيا لو الإسهال فيه دم أو لو فيه فقدان في الوزن دا مش قولون ( دا محتاج منظار ) ممكن يكون التهابات وقرح قولون أو أورام علي حسب الحالة

خلي بالك بردو مريض القولون المفروض أنه لما بيوقف الأكل ويصوم بيتحسن لكن لو صام ومحصلش تحسن الإسهال وقف يبقي مش قولون ياريس

زي ما قولنا أول حاجة تستبعد وجود عدوى زى مثلا الديدان وغيره الأول بتحليل براز لو فيه الكلام دا عالجه وحاول تعمل الخطوة دى بدرى ليه بقي؟

لأن الالتهابات اللي بتعملها العدوي دى بتعمل آثاره مستمره للأعصاب اللي في القولون وبالتالي الجسم بيعمل تخليق لأعصاب تانيه علشان يتحمل الإثارة دى وكثرة الأعصاب دى هيخلي المريض لما يخف من العدوي الموضوع ميرجعش لطبيعته بسبب..

اقرأ كدا…

over time,the possible development of long-term hyperalgesia due to development of neuroplasticity, resulting in permanent or semipermanent changes in neural responses to chronic or recurrent visceral stimulation

ونخلي بالنا أن الإمساك المستمر دا أو الإسهال المستمر دا ممكن يكون عرض لمشكلة أخرى زى مثلا فرط أو خمول في الغدة الدرقيه hyperthyrodism an hypothyrodism أو ممكن تكون المشكله أثار جانبية لعلاج مثلا زى أدوية الضغط وأدوية antimuscrinic أو مثلا أدوية اكتئاب مثلا

أول حاجة تعملها في العلاج وهي تغير النظام اللي عايش بيه الشخص دا هو إنك تنصحه بتجنب القهوة والشاي والنسكافيه وأي حاجة فيها كافيين زي الشيكولاته بردو ومياكلش محشي ولو فيه إمساك مزمن يبقي نستخدم الأكلات اللي بتحتوى على الفايبر ودي بقي حضراتكم اللي هتقولو أمثله عليها في التعليقات 

علاج ألم القولون

بنستخدم مجموعة من الأدوية تسمى antimuscrinic drugs زي مثلا ال mebevrin الكولونا أو مثلا الهيوسين الفسرالجين مثلا أو belladona بردو لكن دي ممنوعة مع كبار السن

#ملحوظة

بعض الخبراء بيفضلو استخدام dicyclomine تقريبا موجود في سبازورست دا أقل واحد في آثاره الجانبية أنه ما بياثرش على mucus secretions مبيعملش جفاف في الحلق وهو الأمن في الحمل cat.B الأدوية دى قبل الأكل بنصف ساعة

#ملحوظة

خلي بالك لو فيه غازات لأن الأدوية دى بتقلل من حركة القولون وبالتالي لو فيه غازات انت هتسكن الألم لكن هيتراكم الغازات في البطن

علاج الانتفاخ

أول نصيحة تقولها هو أن الشخص يأكل ويمضغ الأكل كويس بحيث أنه الأكل لو غير ممضوغ كويس بيكون فيه غازات بين قطع الأكل وبالتالي Aerophagia بتاكل هواء لازم يكون فيه غازات

خلي بالك

– لو الانتفاخ دا جاي مع الإمساك يبقي بتحسن الإمساك الحالة هتبقي زى الفل يعني الإمساك يتحل بعدها هيروح الغازات

– لو الانتفاخ ده مع الإسهال يبقى تقلل من الأكلات والمشروبات اللي بتزود المشكلة دى زى منتجات الألبان والفاكهة الفريش والعصائر والمشروبات الغازية وبيستخدم eucarbon موجود كدا أو أدوية تحتوي علي simethicone زى الديسفلاتيل

– جرعتها قرص يمضغ بعد الأكل ثلاث مرات

علاج الإسهال

أفضل علاج للإسهال في حالة القولون هو Loperamide لكن للأسف لا أعلم موجود في آية من الأدوية في مصر جرعته أربع مرات يوميا 2 إلى 4 مجم في المرة

حته بقي هدية ليكم بقي من بين السطور…

#خلي_بالك

ثبت علميا أن حوالي 30% من مرضى القولون اللي عندهم إسهال بيكون سببها مشكلة في امتصاص العصارة الصفراوية يبقي انت تديله إيه؟ cholestyramine أو أي حاجة تمسكها زي ezetimibe مثلا

بردو من أشهر أسباب القولون وهي dysbiosis يعنى زيادة في نمو البكتريا الضارة وقله في نمو البكتيريا النافعة normal flora وبالتالي ضبط الجزئيه دى هيعالج معانا الموضوع…

علاج dysbiosis

أما إني ازود الـ prebiotic وهي بكتريا نافعه موجودة في الصيدلية بنفس الاسم كدا الـ probiotic وهي المواد اللي بتحفز نمو البكتيريا النافعة زى الزبادي مثلا

أو إني استخدم مضاد حيوي بيشتغل علي البكتريا الضارة في القناة الهضمية زي الـ rifaximine 550 mg مرتين لمدة أسبوعين كورس واحد أو الـ neomycine 500 مجم مرتين لمدة 10 أيام كورس جميل فعال وزي الفل وخلي بالك أن امتصاص النيومايسين من القناة الهضمية ضعيف جدا لذلك آثاره الجانبية نادره الحدوث شويه

كدا أنا طولت أوي هعرض سريعا بعض الأدوية اللي بتستخدم في علاج القولون علشان أكون جمعت كل الأدوية

فيه alosetron or cilansetron ودى اداويه بتقفل مستقبلات السيرتوني الموجودة في الأعصاب اللي بتنقل الإشارة من القناة الهضمية إلى المخ

فيه بردو Lubiprostone الدواء ده بيقفل قنوات الكلور في ال lumen بيعمل على زيادة الnacl في القناة الهضمية وبالتالي بيعالج الإمساك اللي في القولون ونتيجته الفعلية بعد ثلاث شهور من الاستخدام

هو أساس دواء لعلاج الإمساك سواء كان معاه قولون عصبي أو لا

خلي بالك أن استخدام السكريات اللي بتحلي المشروبات لمرضى السكر دى بتكون ضعيفة الامتصاص ودى بتدي تاثير ملين وكمان انتفاخ لأنه لما بتفضل بتتكسر بالبكتريا lactic acid وغازات ودا بيعمل تاثير ملين

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!