بقلم / ملك احمد كمال
بحس ان 99% من مشاكل الواحد سببها الوهم، واهم نفسه بحاجات وافكار مش صح فمخلياه حزين طول الوقت ، واهم نفسه بحاجات هتحصل مخلياه قلقان طول الوقت ومضطرب رغم انها ممكن متحصلش عادي بس هو شال همها اضعاف لمجرد خوفه منها…
هتقعد تفكر في الحاجه اللي خنقاك ومضيقاك وانت بتعمل كل حاجه في حياتك وطول ما انت مفضي نفسك ومش بتعمل حاجه مخك هيجيبك يمين وشمال وهتعيد كل سيناريو وكل مشهد وكل حاجه لو كانت اتقالت او اتعملت بطريقه مختلفه بل ممكن تقعد تدور علي حلول انت عارف ومتأكد انها مش هتنفع…..
تبدأ واحده واحده تفقد الثقه فنفسك وفي افعالك وتبدأ تشكك في كل حاجه انت عملتها او بتعملها وهتبدأ تعاتب نفسك وتفقد قدرتك علي تحديد الصح من الغلط وهتبدأ يا تنام كتير هربان يا اما متنمش يا اما بتعمل حاجات كتير تشغل بيها وقتك يا اما تبقي متنح مش عارف تعمل حاجه…
فتبدأ تفتكر الحاجه اللي وراك سواء شغل او مذاكره اللي انت اصلا مش عارف تركز فيه من غير حاجه لحد ما هتلاقي ميت الف عذر يخلوك اصلا مرتاح نفسيا وانت مش مركز في ولا حاجه عشان شايف نفسك تايه مش عارف تتصرف…..
فتبدأ تحبط نفسك اكتر لان مشاكلك هتيجي ع حاجات اساسيه المفروض البني آدم الطبيعي بيبذل مجهود انه يعملها وانت عندك صفر مجهود انك تعمل حاجه فتبدأ تحط لنفسك خطط جديده كيفية حل المشاكل والتخلص من ادعاء الاكتئاب ايه دا هو انا حزين ولا مكتئب ولا اي بظبط ولا قلقان بتبقي مش عارف انت فيك اي…
تبدأ تحط لنفسك وعود انك من بكره هتبقي شخص احسن وافضل من انهارده وان حلمك اللي سبته امبارح هتمسكه بكره وهترسم لنفسك جنه في عقلك بس هتلاقي كل الظروف حواليك مش مساعده وهتلاقي نفسك تاني اتحشرت في نفس المكان اللي اصلا انت مطلعتش منه من الاساس…
كدا مبروك عليك بقيت خسران نفسك وخسرت طاقتك وخسرت حتي تفكيرك اللي اصلا معملتش بيه حاجه وبدأت مرحلة اللامبالاه مرحله انت هتضحك وتهزر فيها واللي قدامك مش هيعرف اصلا انك زعلان عشن حتي الحزن بقي عندك لامبالاه انك تبينه او مكسل تشرح للناس فبتكمل عادي عشن اصلا محدش هيفهمك…..
وكل دا في الاخر بيخلى مخك ف النهاية بيهرب من حاجات كل شوية فى النص كدا لانه مش آلة وبيجهد من فرط التفكير دا…
هتستنتج انك في الاخر هتلاقي نفسك ديما تايه وفكرك مشتت ومش مركز اهاا بتكون قاعد بتتكلم مع ناس عادى لكن تفكيرك في حتة تانى خالص التفكير مسيطر عليك بشكل كبير فى كل وقت وفى اى مكان….
هوب هتلاقي نفسك في دوامه الأوفر ثينكنج هو نوع من أنواع الانفصال عن الواقع وعدم الإدراك الزمنى والمكانى….
بتنفصل عن الواقع لمجموعة من العوالم الافتراضية بتصنعها مجموعة الأفكار المسيطرة عليك بتختلف العوالم دى باختلاف نوع وطبيعة الأفكار المسيطرة عليك فى الفتره الزمنيه اللي انت فيها….
يعنى لو مسيطرتش ع جلد الذات والتأنيب الزايد عن الحد دا حرفيا هتلاقى نفسك دخلت ف الأوفر ثينكنج لغاية ما توصل للاسف انك هتكون عايش ف العالم دا بجسدك بس….
فا المفروض انت هتعمل اي عشن تطلع من الدوامه اللي انت حطيت نفسك فيها سامح نفسك ع كل ردة فعل مبالغ فيها ع كل لحظة فقدت فيها التحكم في مشاعرك ع كل تجربة غير ناجحة أسأت فيها التقدير ع كل هدف سعيت له بكامل قواك ولم تصل إليه لانك لو عملت غير كدا فتوقع استنزاف طاقتك الاحتراق الداخلي والأسوء من ذلك العيش في الماضي….
افتكر دايما انك انسان وكلنا في معظم الاوقات بنعمل حاجات غريبه وملهاش اي مبرر ودا شئ طبيعي ..
