مفيش حاجه اسوء من انك تكون حاسس انك وحيد في وسط اهلك، ممكن يبقوا قايدينلك صوابعهم العشرة شمع، بس انت مش حاسس معاهم براحه وفي نفس الوقت حاسس بالراحه دي مع ناس تانيه مش من دمك .. عارف ليه؟.
عشان الناس التانية دي بتقدملك الحاجه اللي ماشيه على هواك بس اهلك مبيعرفوش يدوهالك .. ذم في واحد مبتحبوش، كلمه غلط علي بنت انت مش طايقها، قعدة سيجارتين وكاس .. حاجات اهلك ميعرفوش يدوهالك عشان هي مش صح مش عشان هما ميقدروش .. لأنهم بيخافوا عليك وبيحبوك .. لان هما أولى الناس باهتمامك، ده لو عايز تمشي صح.
يمكن فريق عمل مسلسل “لمس اكتاف” محصلش على الدعاية المطلوبة للمسلسل بس هي داست على كذا فكرة اجتماعية مهمة من خلال الأحداث والسيناريو والحوار حابين نوضحهم في المقال التالي.
١. التمسك بالصديق الوفي والترهيب من الخيانه
انت ممكن يكون فيك كل العبر وتبقي صاحب صاحبك عادي .. هو مصاحبك علي عيبك، بس عند الخيانه محدش هيستحملك .. الخيانه سواء في الصداقة أو في الحب من اسوء الخصال اللي ممكن تبقي موجوده في البني ادم .. وعشان كده حمزه مستحملش خيانة اعز اصدقائه .. وكان معجب بأدهم أوي عشان كان ناوي يضحي بنفسه في مقابل انه ينقذ ابن صاحبه.
٢. التركيز علي اهمية الاخ في حياة الانسان
حمزه “فتحي عبد الوهاب” مبيركزش وهو بيدافع عن اخته واخوه هل هما شقايق ولا لا .. كل اللي يهمه انه ينقذ اخواته مهما كان الثمن .. لأنه على الرغم من أنه تاجر مخدرات فاهم انه في الاول وفي الاخر مالوش الا اللي من دمه.
ولما اخت ادهم “ياسر جلال” باعت البيت اللي هو قاعد فيه بطيبة نيه منها عشان تطلعه من السجن وتدفع فلوس المحامي وراحت قالتله اتضايق .. فقالت له “زعقلي،اضربني،قول اي حاجه” .. قالها “اضربك؟! .. ابوكي قبل ما يموت وصاني اخد بالى منك وعشان كده انا صرفت كل فلوسي اللي ورثتها منهم عليكي .. كان كل همي اني استرك مع ان بيتي كان محتاج وانتي عارفه كده كويس .. وكنت بقول بكره ربنا يعدلها” .. اكتفي بأنه يلومها بالشكل ده علي انه يهينها لانه عارف انها في الاول والاخر من صلبة .. ولما جوزها فكر بس ييجي عليها كان هايقتله مع انه كان معترض على إن حمزة قتل طليق اخوها اللي كان بيطاردها.
٣. التركيز على الاهتمام بالابن
لما حمزة سأل ادهم انت ايه طموحك؟، قاله حاجات كلها تخص ابنه علي الرغم من انه تقريبا مكانش لاقي مكان يبات فيه .. ولما اتحبس كان كل همه أن ابنه يكون مصدق انه برئ عشان ميسيبلوش صورة وحشة يستعر منها .. ولما بطل يهتم بيه في اكتر وقت هو كان محتاج له فيه خسره .. مات بسبب أنه أهمله.
ولما عايده “حنان مطاوع” أدت ابن زيدان “محمد عز” شطه بالحلاوه وتعب فيها .. خد ابنه وطلق مراته وهزأ عايده وساب الدنيا كلها وراه واهتم بابنه .. مهو مفيش اغلى من الضنا.
ولما عايده عرفت ان حمزه كان بيديها حبوب منع الحمل عشان ميخلفش منها، قررت تنتقم منه عشان حرمها من العيل اللي كانت بتحلم بيه طول حياتها
٤. التخلي عن مبادئك اول طريق الشيطان
لما حمزه عرض علي ادهم يشتغل معاه في الوقت اللي هو كان محتاج فيه لكل قرش .. رفض عشان هو مش عايز يشتغل في الشمال وقاله “يعني انا بعد ما كنت رياضي بعلم الشباب ازاي يحافظوا على صحتهم، عايزني اديهم السم ده بايديا .. لا طبعا انا مش هاعمل كده” .. وعشان ابنه ومع الضغوطات اللي اتعرضلها .. وافق .. والنتيجة كانت ابنه.
لمس اكتاف دراما اجتماعية رائعة وكل ممثل أدى دوره فيها بشكل رائع خلاها تلمس كل بيت مصري وقدروا يوصلوا الهدف المرغوب من المسلسل في وسط الأحداث
