دنيا ماهر في حوار خاص لمجلة هافن: بحب فُتنة…
ونيللي كريم مش بتستخدم جمالها..
وحديث عن الجزء التاني من مسلسل ب ١٠٠ وش
من سجينة في سجن النسا ل محامية في مكتب محاماة بكير الحلواني لفرد من أفراد عصابة ب ١٠٠ وش وغيرهم كثير من الشخصيات اللتي استطاعت بها أن تصل لكل بيت وكل شخص يشاهدها وتجعلهم مرة يتأثرون جداً ومرة أخرى تدفعهم للضحك،علقت بأذهان الكثيرين في رمضان ٢٠٢٠ بشخصية نجلاء مما جعلهم يستخدمون “إفيهاتها” عبر مواقع التواصل الإجتماعي إلى اليوم،هي الفنانة والكاتبة ومهندسة الديكور والإنسانة جداً جداً دنيا ماهر.
إزاي بدأتي تمثيل او إمتى حسيتي انك عاوزة تمثلي، خصوصاً إن دراستك بعيدة عن التمثيل؟
-التمثيل كان هواية من ضمن هوايات متعددة بنمارسها واحنا في المدرسة، كنا بنقلد المدرسين وبنعمل اسكيتشات وبنعمل مسرح وكنت برسم وبقرا زي أطفال كتير عندهم أكتر من نشاط بيمارسوه، وبعدين اخد مساحة اكبر وانا في الجامعة والتحقت بفرقة الورشة المسرحية لحد ما بدأ يحتل حياتي كلها، وانا دراستي مش بعيدة اوي لإني كنت بدرس ديكور مسرح و فريق أتيليه المسرح لفنون قديمة فريق مسرح قديم ومخرج ممثلين كتير بقوا محترفين.
إيه أول دور عملتيه في التليفزيون ومين اللي رشحك ليه ؟
أول دور عملته في التلفزيون كان مسلسل سجن النسا دور حياة ورشحتني الأستاذة كاملة أبو ذكرى بعد ما شافتني في فيلم الخروج للنهار إخراج هالة لطفي.
بعد ما قدمتي عدة أدوار مختلفة عن بعض تماماً كنتي مرتاحة أكتر في الكوميدي ولا الدراما وقي رأيك إيه فيهم الأصعب؟ وهل بتواجهي مشكلة في تغيير جلدك من عمل ل عمل تاني؟
-أكيد مش هحب اني أثبت على حاجة يعني اعمل مرة كدا ومرة كدا،الكوميدي أكيد مُريح نفسياً أكتر لإن لما تخرجي للناس وانتي معيطة والناس مضايقة حواليكي غير لما تكوني بتضحكيهم، يعني الموضوع بيكون مُريح نفسياً أكتر بس الكوميديا فيها صعوبات لأن بيكون فيها حاجات زيادة زي التوقيت وتكنيكات تانية مختلفة فكل حاجة ليها صعوباتها وليها مميزاتها.
مش بواجه مشاكل بس الواحد بيحتاج وقت عشان يخرج من حاجة ويدخل في حاجة تانية ويحضر نفسه .
من الأدوار اللي عملتيها إيه أقرب دور لقلبك وفخورة إنك عملتيه؟
بحب دور فُتنة في طلعت روحي، وبحب دور دكتورة سارة في مسلسل الحيطة لأنهم بالنسبالي كانوا حاجة جديدة عليا وكانوا تحدي ورد الفعل عليهم كان حلو أوي.
انتي شاركتي لغاية دلوقتي مع الغنانة نيللي كريم في ٣ مسلسلات وفيلم، هل دا فرق معاكي من ناحية التمثيل أو بقيتي تمثلي قدامها وانتي على راحتك أكتر؟
نيللي كريم ممثلة تقيلة بس هي عمرها ما بتدَعي إنها ممثلة تقيلة،زي ما هي كدا جميلة بس عمرها ما بتهتم انها تظهر الجمال دا أو تتعامل معاه إنه أهم مقوماتها، ومن تعاملي معاها هي ممثلة بتعيش الشخصية حتى لو قالت إنها مبتقراش بس من خبرتي معاها هي بتعيش الشخصية وأدائها في اللوكيشن بيختلف وبتتعامل بشكل الشخصية، و لما كنت أول مرة أمثل في التلفزيون في سجن النسا وأقف قدام نجمة وهي من أول يوم كانت شخص بيهتم يعني مثلاً ممكن تظبطلك الطرحة عشان يكون شكلك أحسن أو تقولك ملحوظة، ف هي شخص متواضع ولطيف ومُريح جدا في العمل معاه، ومن حظي اني اشتغلت معاها أكتر من مرة.
جه منين الإفيه اللي اشتهرت بيه نجلاء “ماليش لا حبيب ولا قريب ولا غريب”، إيه كان رد فعلك لما شخصية نجلاء بقت تريند ولما بدأ الناس يشبهوها بشخصيات عبلة كامل؟
-طبعا نجاح شخصية نجلاء دا بالنسبالي حدث سعيد للغاية، المسلسل كله الحمد لله كان رد الفعل عليه رائع ونجلاء كان رد الفعل عليها جميل ودي اكتر حاجة تسعد الممثل ان يكون في تفاعل من الناس مع شغله لدرجة انه يبتدي يبقا كوميكس و يبقا منتشر إفيهاته دي حاجة تسعد أي ممثل، والإفيه الشهير دا كان مكتوب في الورق الأستاتذة الكتاب أحمد وائل و عمرو الدالي كانوا كاتبينه.
هل فعلا بدأ التحضير للجزء التاني من ب ١٠٠ وش؟ وهل هيكون بنفس الأبطال ولا ممكن حد فيهم يتغير؟
معنديش فكرة الحقيقة ولا معلومات حقيقية عن الجزء التاني.
مين من ممثلين زمان كان نفسك تمثلي معاهم، ومين من اللي موجودين دلوقتي حابة انك تمثلي معاهم؟
أنا أصلاً عايشة في الأبيض واسود وبحب كل الممثلين عبد الفتاح القصري، زينات صدقي، استيفان روستي، توفيق الدقن وكل دا غير الأستاذة الكبار زي أحمد ذكي يعني حتى اللي كانوا بيعملوا ادوار تانية بس كانوا عُظام لدرجة انك تتمني بس ان انتي تقابليهم كتار جدا عايزين مجلدات.
احكيلنا أكتر عن آخر مسلسلاتك مسلسل “الحيطة”
-المسلسل موجود على اليوتيوب هو ٢٦ حلقة في إطار تعليمي نقدر نقول ان هو بيروج أفكار ليها علاقة بالتربية وتقبل الآخر، القناة أصلا كانت عايزة تنتج برنامج بيتكلم عن القيم اللي احنا مفتقدينها ف حبوا يعملوا دا من خلال بناء درامي بسيط ك تجربة كدا فيها مخاطرة بس كانت الفكرة كلها فإن كل حلقة يكون ليها علاقة بتقبل الآخر لإن قناة sat7 المرتبطة بالكنيسة المصرية هي اللي أنتجته.
أنتي بتصُنفي كمان ك كاتبة وبالفعل كتبتي رواية، هل لسة بتكتبي وعارفة توازني بين الكتابة والتمثيل؟ او ممكن نشوف فيلم من تأليفك؟
-أنا عندي تجارب في الكتابة، بس بتاخد مني وقت طويل وما اقدرش اقول اني كاتبة، كتبت مسرحية ممكن احاول اخرجها لو في مساحة، مش عارفة لو كنت هاكتب سيناريو لانه موضوع تاني وصنف من الكتابة له قواعده الخاصة.
