علي الرغم من إن الأعمال الفنية اللي بتتعرض علي التلفيزيون لا تتعدي مجرد مشاهد مصطنعة لا تعطي أي إضافه للحقيقة اللي بنعيشها في حياتنا،إلا إنها كلها إتفقت علي حاجة واحدة .. إننا لما بنحب بنخلق تبريرات مالهاش أي علاقة بالحقيقة مهما كان اللي قدامنا وحش ، تبريرات هزلية جايه من العدم لا هي مرئيه ولا مسموعة .. بس قلبك مصمم يقنعك بيها عشان إنتا بتحب.
العقل هنا مالوش أي تدخل .. ممسوح .. مغسول .. حتي لو كنت شخص بتفكر بعقلك زي ما بيقولوا .. لا ياحبيبي .. أحب أصطدمك بالحقيقة المرة ، الحقيقة الواضحة قدام كل الناس ، بس للأسف محدش عايز يعترف بيها.
إنتا طول عمرك بتفكر بقلبك مش بعقلك .. الأوردر اللي بياخده عقلك عشان يحوله لفعل يتنفذ، بيطلع من قلبك .. بتساعد مامتك من حبك فيها .. بتستقبل نقد باباك بكل راحه من حبك فيه .. بتستحمل رخامة اخواتك عليك من حبك فيهم .. مع إنك لو حد داسلك علي طرف ممكن تقتله .. بس صعب جدا إنك تقتل أخوك مثلا لمجرد أنه دايقك.
هنا القلب بيحول المشاعر السلبية لمشاعر ايجابية .. فأنت كل ما هتشوف وحش من الناس اللي بتحبهم كل ما قلبك هايوجدلك مبررات سطحية قد يكون ملهاش أي علاقة بالحقيقة في شئ .. بس قلبك بيخلقهالك بس لمجرد إنك متكرههمش.
