للرسم نكهة خاصة، و سالي مجدي تُبدع في الرسم بالمأكولات
رسامة مصرية موهوبة، ولدت في محافظة بني سويف
تخرجت من جامعة بني سويف قسم اقتصاد وعلوم سياسية
تعشق الرسم من صغرها، واستثمرت موهبتها لكي تُبدع في مجال الرسم بالمأكولات، لتصنع من أطباقها لوحة فنية رائعة.
فصنعت لوحات من “الملح والفلفل، العسل والطحينة، الكشري، النسكافية، الكاتشب، الشاي، النعناع، وغيرها من المأكولات”
كما قامت برسم العديد من الفنانين منهم: “حمزة نمرة، محمد منير، شيماء سيف وعمرو وهبة، حمادة هلال، أحمد حلمي، محمد هنيدي، وغيرهم”.
وفي حوار خاص لمجلة هافن معها سألناها
متى اكتشفتِ أنكِ تمتلكين موهبة الرسم؟
وأنا عندي 3 سنين بالضبط، بابا أكتشف موهبتي في الرسم.
حدثيني عن بدايتك في مجال الرسم؟
أنا الأول كنت برسم بالخامات العادية اللي هي مثلاً “الألوان والفحم”، فضلت كدا لحد مرحلة الجامعة.
وفي فترة الكورونا بدأت إني استخدم مواد تانية.
ما هي رسمتك الأولى وكم استغرقت من الوقت؟
أول حاجة نزلت رسمة بالخامات اللي هي الحاجات البسيطة “رسمت منير بالنعناع، اينشتاين بالملح، محمد صلاح بالنسكافية، مستر بن بالشاي”.
الرسومات دي ماكنتش بتاخد مني نص ساعة، بعد كدا لما جيت استخدمت المربى أخدت مني وقت شوية.
جيت أول مرة أرسم بالعسل، أول رسمة أخدت مني 7 ساعات بالضبط لأن أنا كنت بحاول أشوف أي اللي ممكن يطلع
متوقعتش أبدًا أن أنا ممكن أرسم بالعسل، بس قولت طالما أنا رسمت بالمربى فعادي أن أنا ممكن أرسم بالعسل ونجحت الفكرة.
ما هي الأدوات التي تستخدميها في الرسم؟
بستخدم معلقة وخله فقط.
ما هي المأكولات التي تستخدميها في الرسم؟
بستخدم عسل، مربى، توابل، محشي، رز، كفتة، بطاطس، مكرونة، نعناع، شاي، كشري، رمان، كيوي، صوصات، يعتبر بستخدم كل الخامات في الرسم”.
ما هي الصعوبات التي تواجه سالي مجدي أثناء الرسم بالمأكولات؟
الصعوبات أن الرسم بالمأكولات محتاج مجهود، ودقة، وأنا لحد دلوقتي ماتملكتش فيها كويس
يعني أنا لحد دلوقتي الرسمة بتاخد مني مجهود ذهني ومجهود بدني كبير، بس علشان انتي بتعملي حاجة بتحبيها فمش بتحسي بالتعب.
ما هي أكثر رسمة أخذت منكِ وقت؟
رسمة “زبيدة ثروت وعبد الحليم” اللي هي كانت أول رسمة بالعسل، ودي أخدت مني 7 ساعات
وعلى حسب عدد الشخصيات اللي برسمهم، يعني في أطباق برسم فيها بالخمس والست شخصيات دي ممكن تاخد مني وقت بس الموضوع قل عن الأول أكيد.
من هم الفنانين الذين قمتي برسمهم؟
رسمت فنانين الزمن الجميل، والعوضي وياسمين عبد العزيز، حمزة نمرة، محمد منير، شيماء سيف وعمرو وهبة، حمادة هلال، أحمد حلمي، محمد هنيدي، علاء ولي الدين، يسرا، إيهاب توفيق، مصطفى قمر، هشام عباس، حميد الشاعري، محمود يس، أحلام الجريتلي، يوسف شعبان، رجاء الجداوي، حسن حسني.
ما هي أقرب رسمة إلى قلبك؟
مفيش رسمة معينة قريبة لقلبي لأن كل رسمة كان ليها حدث وكان ليها موقف معين رسمتها فيه
فأنا بالنسبة لي يعتبر أن كل رسوماتي قريبة من قلبي.
ما هو مصدر الإلهام في رسوماتك؟
هو مفيش أي مصدر إلهام، بس الفكرة بتجيلي مثلاً وأنا قاعدة، وأنا باكل مثلاً، آفيه متدارج، فأروح أرسم رسمة.
أكل أكله فأفتكر موقف معين، أفتكر مثلاً شخصيات ممثلين عملوا مشهد خاص بالأكلة دي فأروح رسماهم وهكذا.
من هو أكثر مشجع لكِ؟
أكتر مشجع عندي أصحابي وأهلي هما أكتر ناس شجعوني، وكمان أصحابي في الجامعة.
من مثلك الأعلى في الحياة وفي الرسم؟
مثلي الأعلى في الحياة وفي الرسم بابا طبعاً
بابا أصلاً فنان ورسام وأنا واخدة الموهبة منه.
ما هي أبرز المسابقات التي شاركتِ بها؟
مسابقة في الجامعة وأخدت مركز أول على مستوى الجامعات
ومن وأنا صغيرة كنت بشترك في المسابقات العادية؛ المسابقات الخاصة بالمعارض وكنت بكسب فيها بردو.
هل لديكِ موهبة أخرى غير الرسم؟
عندي موهبة الخط العربي؛ موهوبة في الخط.
من وجهة نظرك ما هي إيجابيات جائحة كورونا، وكيف استغليتِ تلك الفترة؟
إيجابيات جائحة كورونا أنها كانت بدايتي في الرسم بالمواد الغذائية
اكتشفت موهبتي في الرسم بالمواد الغذائية في فترة حظر كورونا وإن أنا كنت قاعدة وفاضية وماكنش عندي أدوات
فقولت إن أنا أدخل المطبخ وكدا وأجيب أدوات ارسم بيها، فالموضوع بدأ معايا من هنا.
وكان في مسابقة في الفترة دي، والمسابقة كانت أن أنا أسوق منتج معين “المربى” عن طريق أكلة
فأنا روحت بدل ما أرسم أكله فروحت رسمت بالمربى ونزلتها وبدأ الموضوع من هنا.
هل تتابع سالي مجدي ردود الأفعال على السوشيال ميديا؟
أكيد بتابع ردود الأفعال، وردود الأفعال بتبقى بصراحة إيجابية والناس بتحب الرسومات اللي أنا بنزلها.
وفي طبعاً إيجابي وفي سلبي
الردود السلبية: مابردش أو أن أنا أرد بذوق مثلاً، ومش بهاجم أي حد وغالباً أي رد سلبي وكدا يعني برد بكل ذوق، ولو هي حاجة مالهاش لازمة بالنسبة ليه فهي ليها فايدة بالنسبة ليا.
وبلاقيهم بقى بعد ما ردوا رد سلبي وأنا رديت بذوق بيتأسفوا لي وبيغيروا الكومنت وكدا، زي ما تقول بيتحرجوا.
ما هي أحلامك القادمة؟
نفسي إني اوصل للناس أن لازم يكون في كل بيت مرسم، أن أنت تخرج هوايتك فيها، أو أن أنت تخرج فيها حزنك وفرحك
وأنا بالنسبة لي أعمل مرسم بدل غرفة الأطفال، ولما الاطفال بقى يكبروا نبقى نعملهم غرفة أطفال.
ونفسي إني أشترك في معرض، واني أشترك فيه برسوماتي بالأكل.
واني أعمل مشروع خاص بذوي الاحتياجات الخاصة
وأنا حالياً عاملة كورسات رسم للأطفال الأصحاء، فأتمنى إني أشترك في جمعيات خيرية يخدوني إني أقدملهم حاجات بسيطة وتكون أكيد بالمجان.
ما هي نصيحة سالي مجدي للرسامين المبتدئين؟
سالي مجدي تنصح الرسامين بأنهم يرسموا كتير؛ لأن الرسم دا فعلاً ممارسة وأن فقر المواد أو الخامات اللي حواليك دا مش عائق ليك أنك ماترسمش
أنت ممكن ترسم وتبدع بأي خامة بسيطة.
أنا بشوف أن الفن هو أي حاجة بعملها بأيدي
مش شرط أن أنا أخلي الرسم دا في قالب محدد، لازم يكون في حاجة تكون مبدعة أو مبتكرة
والرسم مالهوش مجال محدد، لأ دا مجالات كتير وكل واحد ليه أسلوبه بردو وليه بصمته اللي هو بيحطها في الرسم.
