حواراتفن

حسن عبد الله لـ مجلة هافن يكشف عن دوره في مسلسل وكل ما نفترق وعن كواليس العمل

الفنان حسن عبد الله في حوار خاص مع مجلة هافن

ممثل مصري حاصل على بكالوريوس حاسبات ونظم معلومات عام 2005
بدأ العمل بمجال التمثيل منذ عام 2000، وبدأ دراسة في معهد الفنون المسرحية قسم التمثيل والاخراج عام 2009
عمل في عدة مسرحيات لعدة سنوات وشارك في الكثير من المسلسلات والأفلام.

وشارك في الموسم الرمضاني هذا العام بمسلسلي “وكل ما نفترق” ومسلسل “نسل الأغراب” كضيف شرف.

وكشف لمجلة “هافن” عن دوره في مسلسل “وكل ما نفترق ” وعن كواليس العمل وإلى نص الحوار.

من رشح حسن عبد الله للدور في مسلسل وكل ما نفترق؟

اللي رشحني للدور أستاذة ريهام حجاج وأستاذ سيف جوهر
رشحوني لأستاذ كريم العدل والحمد لله أنا مبسوط إني ثاني مرة اشتغل مع الأستاذة ريهام حجاج، وثاني مرة مع سيف جوهر
وكنت اشتغلت معاه قبل كدة في فيلم بين بحرين.

كيف كانت استعدادك للشخصية؟

السنة الي فاتت كنت في مسلسل لما كنا صغيرين مع أستاذة ريهام حجاج، والسنة دي معاها في كل ما نتفرق
والشخصيتين مختلفين تمامًا، السنة اللي فاتت كنت ظابط، السنة دي لاعب أكروبات
استعدادي للشخصية مختلف تمامًا، المفروض يكون هو خفيف في حركته وفي طريقة كلامه واسلوبه ده غير أنه عنده جانب رومانسي
شخصية مختلفة ومركبة أوي لو بصيت في أعماقها تتخض لأنه عنده مشاكل كتير
وعنده مشاهد كتيرة فيها اكشن مشهد وهو تحت المياه ومربوط ويفك نفسه
محتاج جراءة محتاج حد له القدرة على الغطس وفي ناس بتخاف منها وانا مستخدمتش دوبلير في العمل نهائي.

هل وجد حسن عبد الله صعوبة في الدور؟

أنا بشوف أن أي دور له صعوباته بس مش بالضرورة صعوبات تعجز
وصعوبة شخصية سعيد الشقلباظ أنه عنده أكتر من جانب في شخصيته والجوانب دي كلها مركبة أوي
يعني هو رومانسي وعايز ينتقم لنفسه في نفس الوقت تحسه معقد وترجع تحس أنه طيب وغلبان
الشخصية هتعدي بأربع مراحل، مرة هتحبه جدًا ومرحلة هتكرهه
في نقلات للشخصية كتيرة وأنه عنده نصف الشخصية فلاش باك والنصف الآخر واقعي
وكان صعب أن جزء في الفلاش باك بشكل والجزء الآخر الواقعي بشكل.

كيف كانت كواليس العمل بالنسبة لـ حسن عبد الله ؟

الكواليس بالنسبالي كلها شغل وانا كنت مبسوط جدًا في الكواليس عشان فيهم أصحابي محمد الشرنوبي وهند عبد الحليم من قبل ما يتواجدوا في الوسط الفني وهما أصحابي
واتعرفت على أحمد النجار وعرفت أحمد طلعت، من السنة اللي فاتت كنا شاغلين سوا في مسلسل لما كنا صغيرين واتبسط لما لقيته موجود لأنه احلي طاقة إيجابية، وبنقعد نذاكر سوا وده كان مريح أوي
كنت مرتاح في الكواليس جدًا مكنش فيه أي توتر أو أي قلق.

الفنان حسن عبد الله
حسن عبد الله من مسلسل وكل ما نفترق

من رشحك للدور لمسلسل نسل الأغراب؟

اللي رشحني لمسلسل نسل الأغراب الأستاذ محمد عبد السلام مساعد مخرج الأستاذ محمد سامي وهو اللي قرر أن أستاذ محمد سامي يعرفني
الدور مش كبير هو ضيف شرف لكن كان مطلوب أنه اشتغل مع أستاذ محمد سامي ويعرفني في الشغل وده أحسن بكتير من أنه يشوفك في كاست او اوديشن
قررت اعمل ده حتى لو كان صغير والحمد لله أستاذ محمد سامي قال إني شاطر جدًا في الشغل وان شاء الله نكون مع بعض في اللي جاي
واتمني ان ده يحصل، محمد سامي من المخرجين اللي الواحد يتمني يشتغل معاهم.

وهل وجدت صعوبة في اللهجة الصعيدية؟

اللهجة الصعيدي مكانتش صعبة لإني انا من أصول صعيدية، مكانش عندي أزمة في ده بمجرد لما راجعنا الاسكريبت وكان مصحح اللهجة متواجد عشان لو في حاجة غلط قالي تمام واني مش محتاج وهو عارف إني من أصول صعيدية مكانش متوتر من ناحيتي.

الفنان حسن عبد الله
حسن عبد الله من مسلسل نسل الأغراب

حسن عبد الله يفضل السينما أم الدراما أم المسرح ولماذا؟

انا بفضل السينما والدراما وفي الآخر المسرح برغم إني بشتغل مسرح كل فترة لازم يكون عندي عمل مسرح
لكن لو فكرة أفضلية انا بفضل السينما ثم الدراما ثم المسرح وده ترتيب طبيعي ومنطقي حاليًا وإن كان في طفرة بتحصل الفترة دي يقودها أستاذ أشرف عبد الباقي
أنا شايف أنه بيعمل شغل عظيم وبشكره وبدعيله لأن اللي بيعمله ده شيء عظيم جدًا وبيحيى المسرح من أول وجديد
وده مش معناه إني مش بحب المسرح بالعكس بحبه جدًا لاكن بحب الكاميرا أكثر.

وختم الحوار: أوجه رسالة لكل العاملين على المسرح وخاصة مسرح الدولة واقول لهم مسرح الدولة محتاج لتطوير ومحتاج دم جديد يدخله ومحتاج لشغل يتعمل يتركز عليه ويتعمله دعاية كويسة ويتعمل إعادة هيكلة اتمني أن الدولة تأخذ بالها من مسرح الدولة.

وانتظروا مسلسل تفتيش بعد رمضان تأليف ميرنا الفقي وإخراج تامر سامي ودور مهم جدًا والمسلسل نصفه جرافيك 3d وأقوم فيه بشخصية ” علي” ودور مركب جدًا.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!