حواراتفن

«الجينات المصرية خالية من الخيانة» “أحمد شاكر” بطل الاختيار 2 في حوار خاص لـ مجلة هافن

مجسد شخصية الخائن “محمد عويس” الفنان أحمد شاكر في حوار خاص لمجلة هافن

أعتقد شخصية عويس كانت من أصعب شخصيات المسلسل.

سعدت بالعمل مع دكتور بيتر وكانت تجربة مفيدة بالنسبالي

سعدت بالعمل مع كريم عبد العزيز وأحمد مكي

فنان شاب مثقف، ذو علم، أبدع في الكثير من الأدوار المختلفة، اختبأ قليلاً وراء الستار، ليُبهرنا بأدائه في رمضان هذا العام في مسلسل الاختيار 2

لهذا السبب قمنا بإجراء حوار متميز من نوعه مع هذا العملاق القدير وصاحب الأداء الفني الفريد من نوعه الفنان “أحمد شاكر عبد اللطيف”

وهذا نص الحوار:

أحمد شاكر.. كيف جاءت فكرة مشاركتك في مسلسل الاختيار 2؟

فكرة المشاركة جات عن طريق دكتور بيتر ميمي، الحقيقة هو رشحني في دور محمد عويس

وكانت ترشيحات مبكرة جداً

واضح انه شاف فيا حاجة معينة وقالي الدور ده محتاج ممثل كويس وانا عارف ان انت راجع بعد فترة
قولتله يعني مغامرة إن انا أرجع بالدور ده؟
قالي أنا عارف انت هتطلع منه ايه وبراهن على الممثل فـ الحقيقة شجعني جدا بهذه الكلمات إن أنا أعمل الشخصية.

حدثنا عن كواليس المسلسل؟

كواليس المسلسل كانت اكتر من رائعة يعني احنا في بينا كلنا زمالة ومحبة وكل الناس عايزة تطلع أفضل ما عندها وكل واحد

كان بيحاول يبذل أقصى ما عنده عشان يطلع في أحسن صورة

كمان الإنتاج والشركة المتحدة كانت موفرة كل عناصر الإنجاز والراحة ومفيش أي حاجة الحقيقة كان فيها أي تقصير

بل بالعكس كل الإمكانيات كانت متوفرة وده ساعدنا جداً ان احنا ننجز العمل في جو مثالي

والحقيقة دكتور بيتر بيختار الشخصيات على مستوى احترافي عالي جداً
وده اللي ساعد إن العمل يتم في سلاسة ونخلص قبل رمضان.

الفنان أحمد شاكر
الفنان أحمد شاكر مع الفنانة بشرى والمخرج بيتر ميمي من كواليس مسلسل الاختيار2

أين اختفى أحمد شاكر عبد اللطيف من الساحة الفنية؟

أنا بعدت عن الساحة الفنية جزء منه كان بإرادتي بعد أحداث يناير.

الأعمال الحقيقة يعني من وجهة نظري غير مناسبة ليا
كانت بتروج لفكرة الشاب البلطجي والإجرام والانحدار والانحرافات الموجودة في الشارع المصري

يعني كانت بتدور على أسوأ ما في المجتمع المصري وتقدمه

والحقيقة الفترة دي حسيت إني هسئ لتاريخي لو قدمت هذه الأعمال
فـ بعدت لفترة يعني استغليت الوقت إن أنا أتولى منصب مدير عام المسرح القومي وحققت فيه نجاحات كبيرة جداً

ولما جه وقت العودة التمثيل ملقيتش أفضل من مسلسل الاختيار عشان الواحد يرجع بيه.

ماذا عن شخصية الضابط محمد عويس التي تقوم بتجسيدها؟

بالنسبة لشخصية محمد عويس هي شخصية حقيقية واقعية

الحمد لله كان دوري إن أنا اوصلها بمنتهي الأمانة دون مبالغة والحكم في الآخر للجمهور.

الفنان أحمد شاكر
الفنان أحمد شاكر في شخصية الخائن محمد عويس بمسلسل الاختيار2

هل التحضير للعمل كان صعباً؟

أكيد طبعا التحضير للعمل كان صعب وكان مجهود كبير جدا تلقاه كل عناصر العمل
الإخراج والمساعدين والكتابة الرائعة للأستاذ هاني سرحان ساعدتنا إن احنا طبعا نفهم أبعاد الشخصيات بسرعة وكل ممثل بيجتهد على الشخصية اللي هو بيعملها ويختار منها التفاصيل اللي هيقدمها
وأعتقد إن شخصية عويس كانت من أصعب شخصيات المسلسل؛ لأن هي واقعة بين كذا منطقة لو الواحد زود شوية هيبقى مبالغ ولو قلل شوية الشخصية مش هتوصل للناس

لو قدم الشخصية بشكل كئيب ومُنفّر الناس مش هتحب تتفرج على المشاهد بتاعتها
فـ هو كان عليا إن أنا اوصل للتركيبة السحرية اللي من خلالها أخلى الناس تنفر من الشر والخيانة

وتوصلها شخصية محمد عويس دون مبالغة وفي نفس الوقت تبقى مشاهد جاذبة ومثيرة للفُرجة.

ما الدور الذي يرغب أحمد شاكر في تقديمه خلال الفترة القادمة؟

كل دور بيقدمني بشكل جديد مختلف معملتهوش قبل كده عشان يعمل صدي مختلف زي ما حصل الصدى الكبير لدور محمد عويس انه جه بعد فترة كنت بعمل أدوار مثالية وسيرة ذاتية

ولكن الشخصية جات بشكل جديد ومخالف فـ عملت صدي

كل دور جديد بيقدمني بشكل جديد أتمنى اعمله
خصوصاً إن أنا حابب اشتغل مع المخرجين الشباب؛ لأنهم عندهم لغة سينمائية متطورة وبيعملوا شغل عالي.

وجه رسالة لشهداء مصر؟

الشهداء مهما نقول ونوفي ونحاول إن احنا نشرح ونوصل اللي جوانا تجاههم وتجاه بطولاتهم العظيمة وتضحياتهم مش هنعرف نديهم حقهم
مهما نذكر هما عملوا ايه، اللي عملوه أعظم بكتير من الكلمات

وبتحضرني كلمة من بيت شعر رائع لو هنتكلم عن الشهيد:

“الله قد أثنى عليه.. فما يساوي القول منا او يكون ثناؤنا”

ربنا بادر بالثناء على الشهيد وأعد لهم أجمل جزاء، لكن ممكن اوجه رسالة لأسر الشهداء:

إنتوا فعلا أبطال وبتتحملوا غياب رب الأسرة وسند الأسرة وبتعيشوا فعلا حياة تفتقدوا فيها العُزاز جدا عليكم

وإحنا بنعمل العمل ده عشان نحسس كل الأسر المصرية بالبطولة والتضحية اللي إنتوا قدمتوها
وان شاء الله يوم القيامة هنشوف الشهيد بياخد أهله ويدخل بيهم الجنة

وربنا سبحانه وتعالى قال 72 من الناس يشفع فيهم الشهيد فـ اي حد يتمنى إن يبقى من أسرة شهيد
رحمة الله على الشهداء والعار على كل الخونة وربنا ينصر مصر دايماً.

أحمد شاكر .. حدثنا عن شخصية احمد مكي؟

طبعا أنا عايز اتكلم عن الفنانين كريم عبد العزيز وأحمد مكي

لأن فعلا هما مفاجأة بالنسبالي وبالنسبة للجمهور في فن التمثيل

كريم وصل لدرجة عالية جدا من النضج والتفاعل والتوحد مع الشخصية وأقنع الجميع
وبيقدم مشاهد ممتعة ويستحق هذه المكانة الكبيرة كنجم مهم من نجوم الصف الأول في مصر والعالم العربي

واحمد مكي ممثل استثنائي رائع بيمزج بين الكوميديا والشخصيات الجادة وده الجديد اللي قدمه أحمد مكي في هذا العمل
وانا طول عمري رأيي في أحمد حتى في فن التمثيل انه لما بيقدم الكوميديا بيقدمها بالشكل الصحيح
بمعني لا يلجأ للإفيهات والإستظراف بالعكس بيلجأ لفكرة معالجة الشخصية وتمثيلها والكوميديا الحقيقة اللي بتطلع من الموقف والتمثيل
وده اللي حريص عليه طبعا النجم أحمد مكي وسعدت بالشغل معاهم.

أحمد شاكر .. أتقنت دور الخائن ببراعة وذكاء، فكيف جمعت بين التظاهر بالود والمكر الداخلي؟

دي أدوات الممثل والحمد لله الواحد ربنا مديله الموهبة وهو قايسها وعارف هيروح بيها لحد فين، ولذلك الدكتور بيتر كمان راهن عليا
على الموهبة وليس الشكل؛ لأنه فكرة الشكل المريح ممكن يبقى أصعب على الممثل لان مطلوب منه يبين التفاصيل الشريرة من خلال مجهود كبير جدا
إنما هي تركيبة سحرية وأنا زي ما يكون كنت ماشي على خيط رفيع عشان أوصل الشخصية دون مبالغة ومفيش حاجة تنقص من التفاصيل المهمة بس أهم حاجة إن أنا اوصل مِزاج الشخصية وروحها وده بيجي من خلال لغة الجسد وتون الصوت
ولازم الممثل يُجيد أدواته لأن الأدوار الصعبة تكشف الممثلين وتحتاج مجهود.

هل يوجد أعمال قادمة؟

في فيلم حالياً بصوره وهنكمل تصويره بعد العيد.

هل توقعت ردود الأفعال القوية من الجمهور؟

طبعاً أنا لم اتوقع هذا الرد من الفعل ولكن رد الفعل ده لو هيدل على شيء مش هقول ادائي ولا المجهود اللي أنا بذلته
إنما كل ده ميجيش جنب الإنسان المصري اللي رد فعله أثبت تجاه دور محمد عويس إن الجينات المصرية خالية من الخيانة

ان المصري يكره الغدر ويكره الطعن في الظهر
فـ الحقيقة ده أحد الأسباب اللي خلت الناس تتفاعل مع الدور بهذه الطريقة والحمد لله إن أنا كنت قادر أوصله بصدق دون مبالغة.

من وجهة نظر أحمد شاكر هل الفن اختلف زمان عن الآن؟

الفن اختلف شوية عن زمان

زمان كان التركيز على المضمون بغض النظر عن الشكل، دلوقتي التركيز بقى في توازن بين الشكل وبين المضمون
والصورة البصرية بقى فيها ابهار كبير وده بيرجع لجيل المخرجين الشباب اللي حققوا مفاجآت وطفرات على مستوي الصور والتكنيك وحرفية الإخراج
وسعيد بالعمل مع دكتور بيتر وبالنسبالي كانت تجربة مفيدة ويارب يفضل دايما الفن المصري عند حسن ظن الجمهور كله من المحيط للخليج.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!